我要做業主2|楊卓娜廿年前老笠細妹楊茜堯夾錢上車 為供樓放棄去旅行
撰文:東方新地 圖片:《我要做業主2》YouTube、楊卓娜IG、新傳媒資料庫〉
《我要做業主2》楊卓娜靠個「勇」字上車
楊卓娜在《我要做業主2》中透露自細與家人租屋住,入行後早已想買樓做業主,原來當年她為實現買樓夢,不惜氹阿妹楊茜堯一齊夾份,二人當時收入都未穩定,楊卓娜為供樓都要咬緊牙關,死慳死抵,二人買入將軍澳中心單位後,楊卓娜每月都要拿收入的 3份之2 來供樓,雖然辛苦,但楊卓娜認為堅持買樓是人生中最正確的決定。
![身為家姐的楊卓娜,廿年前提出與妹楊茜堯合資買樓。(圖片來源:《我要做業主2》YouTube)](https://imgs.orientalsunday.hk/wp-content/uploads/2021/10/3_1708001678615aab9dae47c.jpg)
為方便返工堅持上車
楊卓娜與妹妹楊茜堯在02年以約200萬購入將軍澳中心一個700呎單位,楊卓娜表示當時母親住沙田,她與楊茜堯都在將軍澳電視城返工,交通好唔方便,所以她覺得要搵個適合的地方定居。未幾楊卓娜就向母親借了少少錢,那時只需付5%首期就買到。
![當年楊卓娜要買約200萬的樓,只需付5%首期,即是10萬元左右。(圖片來源:《我要做業主2》YouTube)](https://imgs.orientalsunday.hk/wp-content/uploads/2021/10/2_1628870110615aab9c07a32.jpg)
楊茜堯被逼就範
主持胡諾言在訪問中表示廿年前將軍澳是剛發展的新城鎮,大讚楊卓娜獨具慧眼,她說:「又唔可以咁講,純粹工作需要。阿怡(楊怡)當時話唔好呀唔好呀,我要好多錢買衫,我要錢去應酬……(你依家爆佢啲嘢?)唔係,大家都知做呢行乜嘢環境。其實當時我同阿媽都計清楚,我知我嚟緊要點洗,之後阿妹就同我講,你傾過你點洗,你有冇計過我點洗呀?其實我都幫佢計過,10年之後就會好開心,佢都有聽,因為我同阿媽一齊去說服佢,應該係打劫老笠佢,我哋呢頭睇完轉頭就買咗,佢就話你哋去買棵菜呀?」
![楊卓娜笑言當年唔係游說楊茜堯,係打劫佢啲鏘去買樓!(圖片來源:《我要做業主2》YouTube)](https://imgs.orientalsunday.hk/wp-content/uploads/2021/10/22_721891059615aad90a1220.jpg)
為供樓慳住洗唔去旅行
楊卓娜透露初入行月薪只有6,000元,所以上車前都要慎重考慮,上車後更死慳死抵:「我放棄咗好多同朋友出街去飲嘢食嘢,你知呢行幾多應酬,出去飲嘢閒閒地要三嚿水,百幾二百蚊對我嚟講已經好好用。大家要有個共識,一齊去渡過艱難嘅時期,入咗行十幾年,我冇去過一次旅行。」
![楊卓娜表示自己為供樓好慳,不過末至於要捱麵包。(圖片來源:《我要做業主2》YouTube)](https://imgs.orientalsunday.hk/wp-content/uploads/2021/10/8_86958524615aaba565c78.jpg)
![楊卓娜與楊茜堯兩姊妹都出身無綫,不過楊茜堯5年前已離巢向外闖。(圖片來源:新傳媒資料庫)](https://imgs.orientalsunday.hk/wp-content/uploads/2021/10/200505171218539596712260_1548106565615aabab45de8-667x1024.jpg)
升值500萬唔捨得賣
事過境遷,楊茜堯貴為視后吸金力強,楊卓娜亦與燈箱大王楊志翹組織家庭,生活總算無憂,至於與楊茜堯合資的單位早已供滿,持貨至今已升值500多萬,市值700多萬,楊卓娜更透露楊茜堯不想把這間發跡屋賣出去,近年用作收租。
![楊茜堯的星運比家姐楊卓娜好,拎完視后身價急升,當年與楊卓娜合資的單位亦早已供滿。(圖片來源:新傳媒資料庫)](https://imgs.orientalsunday.hk/wp-content/uploads/2021/10/201004071144467503575727_844871246615aabae2c84c-1024x680.jpg)