56歲黎耀祥苦訴被社交恐懼症折騰多年 吸金力高揸靚車買生果住上水獨立屋

撰文、圖片：東方新地

《殺手》黎耀祥練成六嚿腹肌 被社交恐懼症折騰多年

三屆無綫視帝黎耀祥的演藝事業屢創高峰，今次在《殺手》中飾演殺手，除了角色破格，更證明56歲的大叔都可以減走大肚腩換成六嚿腹肌，祥仔在劇中一幕赤裸上身倒吊做運動，引來不少觀眾大讚，令他沾沾自喜，並表示那段時間是其人生巔峰 ︰「從來未試過咁fit，就算監製冇叫我除，我都要求除衫，真係未試過咁fit，我都有啲自戀。」眼前對自己副偈信心爆晒棚的祥仔，原來小時候曾因自卑而患上社交恐懼症。

鏡頭前為人幽默而且非常健談的祥仔，向本刊記者坦言：「好驚同人接觸！」他表示多年來為發展演藝事業迫不得已要social，平時除工作以外應酬可免則免，遇上台慶及頒獎禮等大堆頭墟冚場面，祥仔會自動抦埋角落絕不搶fo。可幸的是祥仔病情並非嚴重，唔使睇醫生唔使食藥，最緊要有個結婚廿三年性格相近的賢內助Julia在身邊扶持，夫妻同心，踢走恐懼。

幸冇嚴重生理反應未需要就醫

上周三（5日）祥仔現身《殺手》宣傳活動，另一男主角陳豪冇到，祥仔負責擔大旗，無論在台上玩遊戲抑或接受訪問都見他非常投入，而且滔滔不絕，當本刊記者問他是否患有社交恐懼，祥仔直認不諱說 ︰「少少啦！唔係好知點解會有，可能細個自卑，初時以為自己只係怕醜，細細個讀書返學聽到隔籬鄰居開門，我就唔出門口住，好怕見到人。到十幾廿年前拍無綫一個心情行動節目，我做其中一個case，先知道呢啲係一種社交焦慮同恐懼，不過我唔係好嚴重，唔使睇醫生，未至於去到好驚心跳加速，係怕同人接觸啫！性格上我向來都怕好多人，係工作先迫住接觸人㗎咋！我係嗰種如果你畀我揀，我係唔會揀去好多人好熱鬧嘅地方。如果人多我整整吓會去咗角落頭，唔會好social，有少少避，好似公司台慶同頒獎禮，咁多年我都係騰吓騰吓去咗角落頭，唔會博企中間同人打招呼，我又唔係唔識social，只係心理上嘅問題，唔關溝通技巧事，不過未去到有生理反應，冇唔舒服如頭暈身㷫標冷汗同心跳勁快。總之就最好唔好啦！唔好接觸到，唔好見到人啦！唔鍾意同人接觸咪少啲出去，好多人都話我成日唔去應酬，老實講我真係好怕去，可以唔去一定唔去。」

夫妻同步愛慢活 吸金力高住上水獨立屋

祥仔認為這個怕接觸人的心理問題並無對他人構成任何影響，他亦習以為常，不過最關鍵是太太Julia亦喜歡簡單而寧靜的生活，祥仔說 ︰「呢樣嘢我同我老婆好夾，我喺圈內都係得幾個好朋友，佢都係冇乜朋友，亦唔會好social，佢同我一樣唔鍾意約人開party。性格啱唔啱係天生，我同老婆嘅生活習慣同要求都好一致，我哋可以喺屋企食個早餐用兩個鐘，飲吓咖啡好慢活，有啲人唔得，食完就要走，呢啲生活節奏配合好重要，如果一個趕一個唔趕，永遠唔會夾。」結婚廿三年，祥仔與Julia依然如膠似漆，老婆大人身兼埋經理人，日見夜見都咁恩愛，祥仔表示老生常談，夫妻之道貴乎包容及遷就。

曾離巢北上搵銀的祥仔，近年回歸無綫繼續稱帝，雖然明顯減產，但所拍的每部劇是大製作而且角色一定有發揮，打開有條路的他，做完殺手再做拳手，在稍後開拍的新劇《拳王》中飾演打泰拳的拳手，繼上次苦練腹肌反應熱烈，祥仔表示今次會再狂操，不會令粉絲失望，可惜因疫情關係拳館停業令訓練受阻，他惟有在家與老婆Julia一齊上網睇片做運動，至於飲食方面，祥仔話會減食，烚菜烚雞肉刻苦少少都要。

唯一愛好買車百萬跑車買生果

有愛妻陪住修身做運動，祥仔食鹹魚白菜也好好味，雖然唔鍾意應酬可以慳番一大筆社交費，不過祥仔最大興趣是買靚車，近年除了經常被影到駕駛百七萬的Land Rover出入，他還擁有寶馬及積架多架跑車，而兩架價值共8百多萬的麥拿倫超跑更任22歲兒子黎正橋揸，祥仔單是座駕已花費過千萬。早前本刊記者撞到祥仔與老婆外出，一日揸車去九龍城買生果，一日去拎新車牌，兩日都揸住唔同靚車。

近年密密做密密賺搵埋唔少的祥仔，更由深井搬到上水天巒獨立屋，即使吸金力強，祥仔開支一樣唔細，特別是對寶貝仔黎正橋錫到燶，阿爸辛苦賺錢仔享福。三年前被送去美國讀書的正橋，已經愛揸辣車又愛戴名錶追求時尚，曾在社交網大晒祥仔的千萬戰車被指過分炫富，正橋在美國留學每月使費要成二十萬，難怪祥仔近年做到冇停手，四出登台唱夜場做商演，唔放過任何一個賺錢機會。

阿爸早已預備 兒子未出身已經有千萬靚車任揸

早前因疫情關係，正橋上月已由美國返港並完成14天家居隔離，祥仔表示兒子會留港透過網上教學完成餘下一年的大學課程，至於畢業後的計劃，祥仔說 ︰「唔擔心得咁多，見步行步，（係咪已經幫佢鋪好路？）佢都要有自己人生，建立自己事業㗎！冇得為佢準備，佢都要靠自己。」雖然祥仔口口聲聲話冇得靠父幹，叫阿仔自食其力，但未出身已經有千萬靚車任揸，早前祥仔嘅公司仲加埋正橋個名擔任董事，阿爸就好似上帝咁早已預備，正橋仲使乜憂呢？