28歲吳若希與十哥藕斷絲連老公Alex靠做司機成功化解婚姻危機

Apr 15 2020

28歲的吳若希（ Jinny）自從出道以來便緋聞不斷，還特別有大叔緣，先後獲得多名叔父輩城中富豪特別照顧，居所愈住愈豪、座駕愈揸愈豪，長久以來收入與支出極度不成正比。想不到大叔緣直到產女結婚之後依然暢旺，代步繼續用富豪名下靚車、收工繼續喜孜孜由關係千絲萬縷的億萬富豪十哥接送。去年底與十哥藕斷絲連關係曝光再引軒然大波，才激到另一半何兆鴻 (Alex)出招，搖身一變成為跟得老公連日蒲頭電視城等收工，亮點係入手新車由兩公婆名下公司持有，個女都就快滿三歲才終於行出自立第一步！

撰文、圖片：東方新地

吳若希「疫」市派歌有成績廿四孝老公幫手Plug歌

早於去年暑期飛去台灣錄新歌、拍MV，可惜人算不如天算，吳若希新歌新碟計劃一推再推，今個月終於「疫」市發放〈有位蠢才〉，可幸旋律洗腦啷啷上口，時勢影響亦多了觀眾樂迷留家聽歌睇電視，成績可謂十分亮眼。人人疫市停工居家，吳若希就為宣傳連日出入各大電台和電視城做訪問及錄影節目。記者發現Jinny勤Plug歌，老公Alex比她更勤力，連日現身電視城做柴可夫司機，有時連下午茶、晚餐都在電視城飯堂解決，熟路到當正自己地頭！

囡囡何姿秋（Giselle）今年3歲，為了給女兒最好的生活及教育，經濟壓力不少。

吳若希出新歌動員全家幫手宣傳，快滿三歲囡囡由吳若希抱住唱〈有位蠢才〉，得意到爆。

唔再用十哥座駕新車終於有自己名

出道十年，吳若希言行比食神更難估計。福建出生家境清貧，卻在短短兩年間從400呎公屋搬入何文田豪宅、座架換得密更升級快，架架登記都在頂級富豪名下；與老公Alex 17年高調拍拖高調分手，分手後又失驚無神懷孕復合再結埋婚；與澳門Alex結婚兩年、囡囡Giselle月尾就滿三歲，去年底卻驚爆依然與富豪十哥關係密切，對方親自驅車到電視城接收工搬行李，吳若希面上的興奮笑容更十足懷春少女急不及待甜到漏。

婚前與吳若希關係千絲萬縷的富豪十哥（林棣權），被發現在婚後依然來往密切，去年尾十哥親自駕車等收工，吳若希甜笑的興奮表情與今日見到老公不相伯仲。

吳若希結婚前後名字都一直離不開富豪十哥林棣權，林是林裘謀後人，家族是老牌地產發展商，家族經營的聯益建造有限公司在港超過百年歷史。

十哥為人豪爽亦交遊廣闊，與圈中多位紅星如張智霖夫婦、郭富城還有伍詠薇夫婦都係老友。

那邊廂被爆婚後密友接收工，呢邊廂愛晒恩愛的Jinny都明顯少了放閃，婚姻生活現危機。老婆交遊廣闊又難捉摸，好彩Alex死心塌地未肯認輸，據知情人士透露，去年報道一出Alex即時勤出招收復失地：「一家人生活重心本來以經商Alex為主，一家三口一直居於澳門，後來Jinny為咗囡囡升學先搬番香港，而Alex為生意故兩邊走，但呢幾個月因為大環境影響生意，Alex聽晒老婆話搬咗大本營番香港。結婚咁多年被人踢爆仲用緊十哥名下車，Alex嗱嗱聲買車，仲要揀七人車，方便老婆開工用，架車登記係Alex公司名，而間公司係Alex同Jinny持有，變相咪就係送新車畀老婆囉，Jinny點會唔冧先？」

之前Alex一直用以接載老婆的黑色車，跟十哥接吳若希放工是同一架車，任由生命中兩個重要男人開同一架車載自己，吳若希對男人果然有一手。

吳若希連日開工出入電視城，而有她的地方亦見到老公 Alex身影接收工，全新置入新車亦是在兩公婆名下，終於唔係用富豪公司名下登記，Alex振夫綱之作初步成功。

重拾恩愛吳若希轉口風肯追多個

搬屋送車再做埋跟得老公日日管接管送，吳若希接受電台訪問，表面上話對多咗老公對到厭，實情態度與半年前都180度徹底轉變。近來在個人IG做直播、次次梗有老公在左近糖黐豆一樣；日前做Live話嫌棄老公掛住打機，曲線勞役Alex下廚煮宵夜，又突然自爆閨房秘密話老公寧願打機都唔願打X機，其實都係暗示兩公婆閨房趣事多又美滿，另一半根本無此需求。

一向大情大性口沒遮攔，與Alex近月感情有轉機，亦體現在吳若希社交網絡動態上。月初玩直播、背景係Alex入神打機，吳若希突然轉話題自爆夫妻性趣，表面上話老公唔會打X機，實情晒恩愛指另一半無需要自我解決。

失驚無神爆老公秘密，連一齊玩直播嘅老友林盛斌都O晒嘴唔識畀反應，網友亦一片嘩然話兒童不宜。

呢頭爆完閨房性事，嗰頭又當眾表演御夫有術，成功馴服Alex放下遊戲機入廚煮宵夜。

連被記者問幾時追多個，吳若希都從生完Giselle怨聲載道嫌一孕蠢三年、又推卻無計劃無需求，到日前去電台錄節目推新歌，轉口風話順其自然又嫌老公唔勤力：「其實都有諗過，都有計劃，囡囡都想要個妹妹，但呢啲可遇不可求，所以順其自然。(係兩公婆努力緊？)唔知係唔係算努力啦，總之係正常生活囉！」言下之意即是夫妻感情大進、房事頻率正常，睇怕好快有機會再報喜！Alex成功化解婚姻危機可記一功！