為冧女友陳瀅 猷亨冷掟波贏公仔

陳瀅同猷亨相當sweet，不時十指緊扣，猷亨又旁若無人攬實女友纖腰！相反麥明詩同林作就較為避忌，全程最多並肩而行！

為氹女友開心，猷亨主動拉陳瀅去玩掟波波，猷亨為贏《Big Hero6》公仔，晒冷大灑金錢狂掟，最後贏晒大細獎，令女友即時心花怒放，大讚男友：「嘩！你好犀利呀！」猷亨被讚面都紅晒！到揀公仔時，二人十五十六，一個話要紅色、一個就話要白色，最後猷亨索性要晒兩隻色，仲幫女友拎公仔，認真貼心！

入夜時，四人食完爆谷隊完啤酒後，陳瀅雖然被粉絲認出，但仍大方任影！

之後四人結伴玩「Star Flyer」機動遊戲盪鞦韆，期間陳瀅同猷亨自拍甜蜜合照，而陳瀅白色帽飛脫揈落地，猷亨玩完遊戲梗係第一時間幫女友執番頂帽，盡顯風度！

約晚上七時，麥明詩與林作搭的士先行離開，猷亨與陳瀅則步行至四季攞車，男方載女友去麼地道會合其家人，最後依依不捨獨自駕車離開。

全文完