坤哥 龔嘉欣 上契做姐弟

《愛．回家》台前幕後出席新年聚餐，緋聞男女吳業坤同龔嘉欣大方合照，期間又異口同聲表示有重要事宣布，唔通佢哋公開戀情？
正當大家以為二人宣布拍拖，點知坤哥突然從購物袋中拎出一對足金飯碗，仲表示二人即場上契，令在場所有人O晒嘴！坤哥說：「今次交換禮物先，pre上契！上契要搵日正正式式擺番圍。大家以後可以叫佢（龔嘉欣）坤姐，咁我又有坤媽同坤妹！」嘉欣更豪氣表示：「我都算係呢餐飯搞手，大家話夾錢埋單，唔夠咪我哋兩姐弟包底囉。」