鄭秀文演唱會海報造型難駕馭 fit爆狀態全靠夠勤力
廣告
Viu1HK報導：天后Sammi鄭秀文七月將會喺香港紅磡體育館，舉行一共8場「AXA 安盛呈獻You & Mi 鄭秀文世界巡迴演唱會香港站 2023」。演唱會海報日前已曝光，大晒弗爆身材同逼人氣勢，連Sammi自己都話好滿意，仲透露事前好勤力地做咗唔少準備功夫：「我喺拍攝前做好皮膚護理、瞓好啲、做Mask等基本準備，影海報呢條裙確實有少少難著，因為剪裁特別又好多元素，有舞台感、高貴感，仲有啲Punk，所以我都要做好身形管理。結果無問題，已經過咗一關啦，我好滿意！」Sammi仲自爆以前為咗keep fit，飲食好節制，而家嘅心態就比較隨意，有時一日仲會食三四餐，最緊要係做多啲運動，咁樣食多啲都唔怕啦！
Sammi不嬲都係細節控，所以對於演唱會有好多諗法：「除咗唱歌部份，點樣呈現不一樣嘅演繹方式都好重要，希望多啲嘢睇、多啲元素。服裝造型，我自己都好鍾意著靚衫，好鍾意Fashion，所以呢方面一定唔缺少。至於歌曲同音樂部份，我同基爵（音樂監製梁基爵）咁多年夾得好好，我哋都想做到多嘢聽同睇，我好鍾意一個演唱會內有不同元素，亦都係我自己做演唱會嘅方向。」
訂閱 Viu1HK YouTube Channel: https://bit.ly/3lYFNLW
觀看更多精彩內容：https://www.viu.com
撰文：東方新地圖片來源：Youtube@Viu1HK資料或影片來源：Youtube@Viu1HK
