爸知弊你嚟湊吖|太太狠批易䒐䒏對仔特別惡二女爆料真相林盛斌教乘數表忙過打仗
男人湊仔一定有破壞冇建設?為以最真實角度直擊時下藝人家庭爸爸代表獨力湊仔表現,無綫開拍實驗性真人騷《HiPP 有機 HMP 嬰兒奶粉特約:爸知弊!你嚟湊吖!》,邀來黎諾懿及陳敏之化身「爸知弊幼稚園」校長及副校長,先後向「食腦爸爸」林盛斌、「喊包爸爸」林子善、「暖男爸爸」陳展鵬,及「無為爸爸」Alex 下戰書,節目將於 8 月 31 日起,逢周四及五晚十點半翡翠台播映。
四位爸爸將在「無劇本」、「無預警」及「無得傾」的「三無」情況下「突發性」獨力湊小朋友、並不自覺地誤墮全家親子拍攝騙局陷阱。四位預先與製作組串通好的媽媽會假裝中途離開,移師秘密基地並在逾 20 部隱藏鏡頭幫助下,全面監察老公 100%真實湊仔舉動。為增加難度,製作組會事先與媽媽進行一對一訪談,再針對爸爸弱點度身訂造所有任務,暗地為爸爸們進行大改造!
![「暖男爸爸」陳展鵬](https://imgs.orientalsunday.hk/wp-content/uploads/2023/08/image_prefix_3_195689956264eecb4c2b1c0.jpg)
媽媽歎世界食花生‧阿爸體力腦力齊告急
明晚(31 日)登場的首集嘉賓為林盛斌(阿 Bob)、太太黃乙頤(Pearl)及細仔Jaye Jaye;阿 Pearl 認為阿 Bob 最需要改善的地方是脾氣,她說:「佢覺得仔要有承擔啲,所以對個仔特別惡,連個仔本書擺得唔啱位,佢都可能會好䒐䒏(「忟憎」正字)。」這邊廂太太食住花生歎世界,那邊廂阿 Bob 忙到甩轆,除了要獨自應付 Jaye Jaye Organic 衍生的各種難題,又要應付連串節目組安排的「不可能任務」,當中最讓阿 Bob 頭痕的,是要教曉 Jaye Jaye「3 的乘數表」,阿 Bob 一接戰書即忍不住拋出:「今次死火,有排搞!」結果一如所料,阿仔一聽到乘數表即瘋狂逃亡,阿 Bob 尚未從絕望中回魂便要用盡各種方法制服兼勸服仔仔,除了要箍到實防止進一步逃亡,又不斷在仔仔耳邊發功令仔仔記熟算式,必要時還會化身「正能量大使」為仔仔加油及打氣,完全是體力及腦力大考驗,慘情程度令路過的黎諾懿亦忍不住笑住食花生,畫面過癮。
林盛斌連環失威慘變豬隊友 阿仔奇招安慰
阿 Bob 還要應製作組要求與太太上演「爭女大戰」,即時實測大女及二女會先回覆阿爸定阿媽 message,結果阿 Bob 即使在第二 round 出茅招,亦未能扭轉劣勢、
![「喊包爸爸」林子善](https://imgs.orientalsunday.hk/wp-content/uploads/2023/08/image_prefix_2_194066154864eecb4d3b802.jpg)
連續兩 round 被老婆 KO,不甘心的阿 Bob 一度搶電話與二女講數,卻遭阿女爆出一句:「你講句真話吖!」與仔仔玩「估泥膠」遊戲時阿 Bob 再度老貓燒鬚,竟然搞錯阿仔意思以致痛失分數,並遭黎諾懿狠批泥膠「還原度」遠不及仔仔,由醒目司儀淪為豬隊友。連環失威的阿 Bob,馬上向阿仔道歉,豈料換來阿仔「人細鬼大」安慰:「唔緊要啦,你都係我爸爸!」隨即笑爆全場。
![第二 Round 佢使咗少少橫手。](https://imgs.orientalsunday.hk/wp-content/uploads/2023/08/image_prefix_44_191805885464eecb4dad315.jpg)
「六字真言」化解千古難題
其實 Jaye Jaye 確是盡得阿 Bob 真傳,一出場即大顯非凡身手的他,全程表情多多兼相當討喜,轉數及求生意欲更是超乎想像!話說兩位校長突然拋出千古難題:「你鍾意爸爸多啲定媽媽多啲」,Jaye Jaye 聽完先秒速投向媽媽懷抱,但當發見到爸爸勁失落後,即扮迷茫企圖蒙混過去:「你(爸爸)會畀我多啲時間睇電視,媽咪又成日都攬我,我揀唔到呀!」此時爸爸媽媽分別以不同方式「拉票」,聽到托晒腮兼「左右為難」的 Jaye Jaye,最終拋出「六字真言」化解危機,想知係乜?聽晚留意全新綜藝真人騷《爸知弊!你嚟湊吖!》。