科技結合醫療 盼癌症患者早診斷早治療 創新內鏡及機械人外科權威：科技推演比我預期快 中大醫學院院長 趙偉仁教授
從趙教授的模型、攝影、繪畫嶺南派國畫等專長及興趣可知，這位獲獎無數、蜚聲國際的上消化道手術和創新內鏡及機械人外科權威、香港「內鏡黏膜下剝離術」（ESD）治療的第一人，極著重細節和追求穩定感，「我唔係一個隨便發表意見嘅人，細個上堂，老師問問題我唔會搶答，我會觀察同思考，然後畀一個我認為較正確、宏觀、中肯嘅意見，呢個就係我。譬如我做手術時，我會喺手術前有一個大方向同計劃，有板有眼。當然如果處理急症時就要隨機應變啦，但我會比較喜歡盡快控制環境，睇清楚先去做決定。」他說。
國畫訓練人生規劃
我們短短傾談數分鐘，其「國畫論」已為我帶來了重大啟發，「國畫同西洋畫嘅最大分別，就係西洋畫你喺上顏色之後，仲可以慢慢去執，國畫就唔可以用顏色去冚墨色，因墨色係冇嘢可以冚得到嘅，所以劃上一筆後，定咗型就幾難改動，你一定要喺腦海裡面有個構圖同計劃，跟住個Plan慢慢去畫，同時亦有前後之分，有某啲位置你畫完要等水墨風乾，先至可以畫第二度，你唔可以調轉個次序，呢個就係國畫，當中可能帶有中國文化傳統元素，我哋中國人習慣有個計劃先會去做事，好少做事前先決定計劃。」
跟隨醫生父親步伐行醫的他，性格與行事作風是否受到父親影響？「冇呀，我嗰個年代嘅家長，邊會咁得閒逐個仔女睇住，管教細路會多講原則，少去Micro-manage。」他笑著說：「其實我好鍾意嗰個年代，嗰陣時我哋好Free，同學間競爭又唔多。我由小學到中學讀喇沙，喇沙係資助學校，教學理念係『有教無類』，無論你嚟自乜嘢家庭背景，有錢冇錢、住邊度都好，大家都喺同一間學校成長，我能夠認識到好多來自唔同家庭背景嘅朋友，對我嘅成長有好大啟發。我而家做醫生要照顧唔同階層同背景嘅病人，喺我成長時母校拉闊咗我嘅視野同接觸面。」
我問：「作為家中長子，你有冇大哥嘅壓力？」
他說：「我爸爸唔係嚴父，係慈父嚟嘅。我冇乜大哥壓力，唯一一個壓力就係做醫生。因為我爸爸有好多朋友，個個朋友都同我講：『你大個做醫生、你大個做醫生！』不停咁Repeat。第一，有少少潛移默化啦；第二，如果嗰個屋企本身係做嗰一行，你都會接觸多啲、會知多啲，自自然然都會優先考慮做同一行業。」
趙教授決定讀醫之前有否掙扎過？有沒有放棄過某些東西，例如國畫呢？
「我鍾意幫助別人，又喜歡讀書，能夠用知識去幫助別人嘅行業，似乎都係專業為主，而我嘅父母都係醫護，年輕時經常去爸爸嘅診所，所以我好容易就做到決定。你問我有冇諗過做畫家，有嘅，但媽媽話畫家生活太艱辛，勸我唔好選擇做畫家。而我成長喺70年代，科技上有好大突破，嗰時最令我著迷嘅就係太空計劃，中間有段時間我真係好想做太空人，亦幻想過駕駛機械人。」
我：「其實你嘅願望已經達成，你同團隊成立醫療機械人創新技術中心，開展醫療機械人研發，已經係一個好大嘅突破。」
他：「都可以咁講！」
高達為正邪定分界
童年走進科幻世界，「認識」了《鐵甲萬能俠》杜劍龍，《機動戰士高達》阿寶，和《星空奇遇記》冼樸等角色之後，趙教授往後的人生受到了甚麼影響？
「潛移默化下可能係鋤強扶弱嘅精神，所以點解我會鍾意喺公營醫療機構做事，因為可以幫到好多弱勢嘅病人。我覺得《鐵甲萬能俠》同《高達》係兩個轉折，1973年嘅『鐵甲萬能俠』每次出場都係同一個模式，都係打嗰啲壞人，睇多咗，你會問點解佢唔一開始就出絕招去搞掂壞人？點解要搞合體？點解唔一開始就合晒體呢？你會去質疑，但去到1979年嘅《高達》完全係另一個啟發。睇《高達》時我剛剛由小朋友長大成青少年，領悟到原來呢個世界冇分正邪，你企喺唔同位置，做唔同嘅嘢，其實代表你背後嘅理念，嗰個理念冇絕對啱或錯。到咗而家呢個年紀，發覺除咗個主角嘅光環，如果你從『自護軍』角度去睇，原來『高達』係一個白色惡魔，你就知道大家守護嘅原則唔同，就會企喺人哋嗰邊諗一諗，起碼能學會有一點包容，唔使一定要去到戰爭，大家諗一個概念，可以『和而不同』，我覺得咁先係現代社會應該行嘅方向，唔好不斷火上加油，做極端的事情。」
趙教授結合科技與醫療，專注研究機械人微創手術，與世界頂尖的跨學科研究團隊協力推動醫療創科。他曾表示在現時的機械人手術過程中，腹腔鏡如同我們的眼睛，機械臂就是我們雙手，外科醫生則是大腦。科學、藝術皆強的他，除了繪畫，我有理由相信他童年時，已經接受過不少「操練」— 打機。
「我哋成長年代，就係遊戲機出現嘅年代。早過紅白機，我打『雅達利』（Atari），經典遊戲有『太空侵略者』。我哋係第一代人睇住個畫面去操控，既訓練到手眼協調，當習慣咗之後，到我做咗外科醫生、微創手術來臨呢個時代，我哋已經好接受睇住個畫面去操作，而唔需要開大刀去做手術。」
「對你嚟講科技係預期中嘅進階，定係比想像中快咗、慢咗？」我問。
「科技嘅推演比我預期快，我哋做微創做十零廿年已經有機器人，而下一個潮流就會係內鏡手術，唔使開刀都醫治到疾病。我哋外科醫生係推演手術領頭人，外科醫生一般都希望有更好嘅技術，去減低病人併發症發生率，達到完全清除腫瘤嘅高質手術。微創手術減少傷口痛楚，加快病人手術後復完，而機械人手術令到手術過程更精準，達到手術清除癌症嘅高標準。未來內鏡無創手術能達至無痛手術嘅較果，開好細嘅刀口都會痛，但內鏡手術做完之後就只有輕微或者完全無痛。點樣能夠令到大部份要手術治療嘅病人，都能夠接受內鏡手術、即係經過胃鏡、腸鏡去做手術而唔使開刀呢？一定要搵到早期嘅癌症，但點樣令病人早診斷早治療呢？第一其實有好多國家巳經推出癌症篩查計劃；第二，內鏡亦已經開始利用AI提升診斷能力，有好多AI技術將會喺未來幾年推展，我哋內鏡中心已經開始應用AI，希望可以增加我哋早癌嘅診斷率。第三，中大盧煜明校長嘅『無創產前檢查』技術，已經用喺癌症，你抽滴血，第時都已經可以診斷到癌症。呢幾樣嘢嘅推展，最後結果就係早診斷！」
趙教授在中大身兼多職，除了是醫學院院長，還是信興教育及慈善基金機械人外科教授、醫療機械人創新技術中心主任，以及周毓浩創新醫學技術中心主任。每天科研、教學、治療、其他多項專業職務，工作如此忙碌，私人生活又怎樣安排？
「我好幸運，因為我喺學生時代已經追到我嘅終身伴侶，就係我太太，佢係我大學同班同學，佢都係醫生。我哋拍拖開始已經知道大家都好忙，你諗吓，做實習醫生基本上都見唔到大家。」他說。
「個信任嚟自邊度呢？」我問。
「第一，我哋學生時代已經認識，第二，我哋喺做人處事嘅Principle好夾。第三，我哋三個小朋友都大晒嘞。每個人生、每個階段都唔同，你問我十幾年前，我專注學術但唔會好忙，都有時間畀屋企。再之前、生小朋友嘅時候，我喺公立醫院做醫生，都有陪佢哋成長（笑）。到咗而家，佢哋個個都讀大學喇，各有各忙，我可以習中精神處理院長嘅工作。」趙教授上任中大醫學院院長一年，太太在他接任前已絕對支持，「呢一年佢都有幫我手，有好多應酬活動佢都有出席支持。譬如早前我哋中大醫學院有個Alumni Homecoming活動，我哋兩個都係中大醫學院畢業生，好自然地太太都有參與，替我招呼醫學院嘅舊生。」
四十而不惑 五十而知天命
讀醫的大兒子今年25歲，趙教授和太太相對早婚。他怎樣規劃人生、怎樣平衡家庭和工作？「我哋27歲結婚，我覺得人生冇辦法完全計劃，但你可以每3至5年定一個計劃，因為每個人生階段有唔同focus，如果一個人嘅性格永遠希望自己停留喺20歲，咁你50歲都可以追求自己喺20歲時嘅目標，但我就覺得每隔3至5年，我嘅人生目標都會有所改變，所謂Achievement同目標，同你真正達到嘅未必相符，有可能時機不與我，天時地利唔啱，但我又覺得唔需要認命，不過要接受現實！講真我係一個熱血追夢嘅人，你熱血過、追求過，唔成功不緊要，但起碼有試過，你唔做，成功嘅機會永遠就係零，你盡力做，就有機會成功。」
我有感而發，「教授你呢番說話撐起好多人，特別係人到中年自覺『飲恨』嘅一群。」
他完全明白，「人生係會帶住一啲遺憾嘅，你覺得自己可以達到所有目標？冇可能！有啲嘢明明唔啱自已，試嚟都無謂，更加唔需要同人比較，要對自己嘅性格同能力有所理解，知道自己有乜嘢限制。我喺性格、背景上同前任嘅中大醫學院院長們都唔一樣，可能最接近嗰位係鍾尚智教授，因為佢同樣係微創外科及內鏡手術醫生，而我同佢喺醫學院發展嘅唔同時期，面對嘅機遇同問題都唔同，所以我喺計劃同做決定時從來唔會同別人比較。我3、40歲時從來冇諗過自己會做醫學院院長，甚至乎冇諗過進入醫學院做教授、做研究教學工作，我只係想幫助病人，我喺25至30歲時只係想做一個好嘅外科醫生，救到人，好簡單。我好相信中國人講嘅三十而立，四十而不惑，五十而知天命，幫助我計劃唔同階段嘅人生。」
撰文：陳小芝
編輯：侯聖樺
攝影：馮凱宜
