國際腎科權威李錦滔：工作非苦差 處事目標要高 複雜事情簡單化

和李教授一年沒見，甫聚頭即告訴他：「你講過嘅『一念起，一緣生』喺過去一年，啟發我勇敢把握工作新緣份，渡過低潮。」我問教授如何克服艱辛時刻，堅毅自律的他，表示不敢說自己經歷過很多艱難：「我屋企並唔富裕，可以話係中下家庭出身，但我父母好鼓勵我向學， 而我讀書都算有少少聰敏，我肯努力，過關都唔係問題，所以讀書對我嚟講唔係一個好大嘅壓力。入九龍華仁書院讀中學前，我讀慈雲山聖文德小學，我1970年讀完小學，舊年…50年後我返番去小學，現任李校長同我重溫當年嘅成績表。我當時小學六年班全級140人考第一，但幾十年後先睇到原來當時班主任老師寫住：『領悟力強，宜更勤奮』，我完全唔記得佢寫過呢啲嘢，好發人深省。」

他的小學老師「全中」，教授領悟力強，但從未偏離過航道，人生每個階段都很努力，沒有自滿與鬆懈：「我覺得自己係一個有傲氣但謙虛嘅人，我唔會喺人哋面前炫耀，我係一個普通人家，家境根本冇得炫耀，但喺工作上我係一個Achiever，我認為某樣嘢值得做呢，我就會盡力做好佢。大部分時間我都係向住目標方向，下定決心向前。至於生活上有冇艱難時候，因為我對於生活嘅要求好低，我唔會需要著名牌，我覺得整潔得體就得㗎啦，對於錢，我係唔要求高嘅，所以並冇要令生活更舒適、更富裕嘅壓力。呢個可能係上天對我嘅恩賜、憐愛。我經常都會感謝我父母，佢哋畀到兩樣嘢我，一個係好奇心，一個就係滿足嘅心。得到一樣嘢我就會感恩，同時唔會去苛求物質上嘅東西，而且我好好彩，周邊嘅朋友對我都好好，朋友係互動嘅，變成喺好多方面嚟講，都可以話得到上天嘅眷顧。」

廿九年北上沒間斷

親切、踏實的李教授，還有很多值得我們學習之處，包括對工作的堅持和熱度。

「我早前上北京，帶同我香港醫學專科學院團隊會見國家衛生健康委員會、中華醫學會，同埋中國醫師協會，同一時間，我見番一啲認識咗幾十年嘅腎科朋友，因為我早於1996年已經返國內交流， 廿九年前上去交流嘅人唔多，我都算係比較早期。我差唔多年年都上去講學幾次，上足廿九年。呢廿九年，香港腎科界仲有繼續上去嘅人，只剩番我一個

我好幸運，我1983年港大醫科畢業後， 94年已經做咗顧問醫生，跟住我2001年就做咗香港腎科學會主席，可以話係早出道 ，亦都開始更多同國內及國際嘅腎科學術會議上做定期交流、聯絡，識朋友、做學術研究等等。最近我同啲老友傾偈，講開國內嘅腎科，原來已經出咗我認識嘅五代人。有年紀大我二十年以上、大我二十年、十年、同期，到細我十年，然後開始有細過我接近二十年嘅。今次講開，無論喺北京定上海、南京、廣州等地嘅腎科，佢哋好早就認識我。最近有好幾位國內大學及三甲醫院嘅現任腎科主任都話：『李教授，我哋好細個開始見你喺台上做大會報告，一直都係聽你講課嚟學習。』（笑）」

無論你身處甚麼崗位，已經上到怎樣高的位置，不自滿就是成功的關鍵。

「我唔會覺得自滿，感覺滿足雖然都重要，但我到今時今日都冇停頓過，我仲係不停諗緊有乜嘢搞，譬如我當年做過威爾斯親王醫院十八年副院長，任內同院長分擔工作，接受一啲任務，有啲都唔係我自己嘅專業。我係腎科醫生、內科醫生，但其實有一段好長時間，我係睇住新界東聯網嘅基層醫療、家庭醫學，到今時今日，整個新界東聯網家庭醫學嗰啲醫生，都對我好尊重。佢哋最近喺北區開咗一個北區社區健康中心，呢個計劃其實係我開展嘅，2007年開始籌劃，中間因為好多因素而停頓過，到今年2025年佢哋開幕時，我已經唔再做新界東聯網家庭醫學，或者基層醫療嘅總監，但佢哋都仍然請我返去出席開幕。我話：『你哋真係好，仲記得我！』我都不諱言，我覺得佢哋係真心愛戴我嘅。」

我喺媒體工作多年，真心感受到各行各業的領導、主管、高層，沒多少個能夠得到下屬、夥伴的真心愛戴，誰不想有個好老闆呢！好老闆的最基本 — 關懷同事、有責任感、不要講一套做一套。

「我做副院長時，亦睇住整個新界東聯網嘅職安健，職業安全健康本來都同我冇關㗎啦，而我當時要減低同事嘅工傷意外（IOD，Injury on Duty），其實喺醫院有好多工傷，例如被針刺到、推牀抬牀撞到、抬病人扭傷腰、整傷手咁。工傷之後，我哋有一個團隊，去幫受咗傷員工處理佢哋嘅個案，叫做OMCS， Occupational Medicine Care Service，即係職業治療關懷服務，我都負責咗十幾年，都做出一點成績。除非唔畀任務我，又或者我唔肯Take，如果我Take得嘅，一定唔會淨係掛個名，我會做好佢，呢個係我人生嘅理念。」

管理團隊有技巧

我：「你帶領嘅團隊，有冇遇過一啲比較難搞、比較反叛嘅同事？」

他：「如果團隊成員全部係你新請嘅話，你當然可以通過面試去選才，但好多時你接手一個團隊，其實個Team早已經成咗型，咁你就要去發揮每個人嘅強項。第一件事就係要認同及接受（同事），唔可以一唔鍾意就炒人，要喺團隊入面識別比較棘手、難搞嘅同事，視乎佢嘅職級，如果佢階梯較低，我通常都會向佢嘅直屬主管了解，但到某個階段如果覺得我出手會幫到手，我都會見見個同事。如果直接Under我嘅同事出問題，我會去瞭解多啲佢嘅長處、短處，盡量令佢覺得有發揮機會，取長補短。遇到同事出錯，其實有一個管理技巧。大家咁大個人出嚟做嘢，都要顧面子，我可以話你聽，我好少喺開會時指責同事，都係私下同佢哋溝通。而喺公開場合遇到有外人指責我嘅下屬，如果錯不在我方，我都會維護。」

李教授有一句金句，十分啟發我們打工仔的 — 你不要為了三年內要升職，於是就去做那些、那些和那些，你應該要因為做好了這些、這些和這些，因而在三年後獲得升職機會。應用在實際生活中，隨著香港的經濟大環境的轉變，打工仔未必可以用表現賺取前途，因為現在的公司紛紛削減預算。李教授怎樣看經濟不景所帶來的影響？

「我哋醫學界都辛苦嘅，無論係睇門診嘅數目，病人數目、巡房睇病嘅數目，或者要同病人家屬溝通嘅要求，都比起我當初做醫生時大咗好多。我見到好多巡完房嘅同事，好多時間都要拎住個電話同病人家屬溝通。我哋初初出嚟做嘢，唔會有呢個情況，一定會叫個家人嚟醫院，同我哋當口當面講。我經常都講，可能做醫療界已經算好，對醫療人手其實一直都需要，尤其是而家老年化，多咗好多慢性病，所以醫護人員嘅需求暫時都好大。如果你想搵一份穩穩陣陣嘅工，都算有一個穩定嘅收入，努力讀書做醫生、護士或專職醫療都係好嘅行業，但唔代表工作量唔大嘅，講下醫專，我哋都十分關注醫生嘅身心健康（Well-being），唔只係關注年輕嘅醫生喎，上咗年紀嘅醫生我哋都好關心。香港大概有一萬七千個醫生，專科醫生就有九千五百位。九千幾人，我哋個群組都好大，關注佢哋嘅Well-being，其實都冇一個Quick fix 㗎喇，希望大家盡量去減低一啲不必要嘅工作、減低一啲唔需要做嘅嘢，我最討厭嘅就係，簡單事情複雜化，我最喜歡複雜事情簡單化。」

不忘初心不覺辛苦

李教授一直把病人放在第一位，他的重中之重還有他的同事、他的工作團隊。一切為了甚麼？因為對人和事的尊重與熱愛。

「成日都講，你嘅初心係乜呢？現在唔可以唔講『工時』，但我哋剛剛畢業做初級醫生時，一個禮拜七、八十個鐘（工時）等閒啦， 連續三十六個鐘工作點會唔辛苦，你可以話後生當打嘛，但我覺得如果你做醫生下下計時，咪好似返工廠打卡咁囉！你覺得嗰樣嘢值得做，你自然就會延長工時都去做。譬如咁多年嚟，我仍然會夜晚返去醫院，或者星期六、日返去巡房見病人，我從來都唔覺個係負擔、苦差，唔會覺得星期日巡房好慘。如果想賺好多好多錢，醫生唔應該係你選擇嘅行業。」

我：「教授，你嘅開心嚟自乜嘢呢？」

他：「我嘅開心嚟自滿足感，滿足到我工作上嘅要求，滿足到我更進一步、更上一層樓。更上一層樓唔係指職位，而係譬如我搞嘅香港腎科學會、全球華人腎臟病學會、內科醫學院、我現在新做醫專嘅主席咁，我希望我會帶多啲新嘅想法、新嘅項目，令到由我領導嘅學會又好、學院又好、劇團都好，都可以再做多一啲，更加有聲有色啲。譬如我做音樂劇團嘅主席，我會想令到社會有更多人認識香港廣東話原創音樂劇；我當年做香港腎科學會，我希望可以令學會喺國際上更受認同、更加有佢嘅國際視野；醫專，我想提升更高學術水平，有更多醫生參與活動，同國際及國內學者有更多交流等等。『發揚光大』真係一個方向，做到幾多唔知，盡力囉！」