Mariah Carey減11kg無反彈！必知縮胃手術後遺症

撰文：CM Team |圖片：網上圖片

Mariah Carey -11kg
喺2017年，歐美著名歌手Mariah Carey因為經常以美食抒發壓力，過去體重不斷忽上忽落，以120kg體重出席表演，被網友批評肥到跳唔郁，由當年「花蝴蝶」變成「折翼蝴蝶」，之後搵名醫做咗「縮胃」手術減重，令自已胃口變細、唔容易變肥，之後減走11kg，雖然睇落都算「有肉地」，但行動就靈活咗唔少。

英國網紅險送命
雖然「縮胃」手術嘅誕生係為咗幫一班過重人士，不過幾年前英國網紅Venus Palermo，亦因為自我評論似「大象」而做「縮胃」手術。身高5呎6吋，體重119磅嘅佢，非常鍾情日本動漫文化，經常Cosplay成為動漫角色，有「真人版洋娃娃」之稱。

因為對身形要求非常高，Venus Palermo決定透過「縮胃」手術去令自己更瘦，雖然先後有50位醫生拒絕幫佢做手術，但最後都搵到一位南韓醫生肯接呢單「生意」。手術後一年，Venus Palermo開始食唔落嘢，連飲水都有困難，不停嘔吐。經醫生檢查後發現胃部縫合位穿咗，有食物走入被封閉嘅位置，最後要做手術「補口」，先至執返條命，可想而知「縮胃」手術其實都有一定危險性，一定要聽醫生意見，唔係人人都適合做。

3款「縮胃」手術比較
1.胃內水球

胃內水球屬於低創傷性治療，手術過程中，醫生會利用內窺鏡將水球放入胃部，水球就會佔據胃部容量，患者即時就能感受到飽足感。手術後更要接受醫生同營養師建議，重新建立健康飲食習慣，先做到減重作用。
做前必知事項：
-初期會有胃部不適、噁心或嘔吐
-有機會引起胃酸倒流或消化道受傷
– 胃內水球放置限期只有6個月
2.腹腔鏡縮胃手術

又名垂直胃切除手術，亦係最為人熟悉嘅「縮胃」手術，醫生會利用腹腔鏡技術，用小釘將胃部垂直切割，令胃部縮成一個似香蕉嘅小胃囊，手術後胃部會減少分泌刺激胃口嘅荷爾蒙（Ghrelin），達至「無胃口」。不過從此胃部容量得返100至200ml，一包維他奶都飲唔晒，而且呢個手術係無得還原。
做前必知事項：
-0.5%個案有出現流血及滲漏情況
– 不可還原
-需依照醫生或營養師建議進食
3.腹腔鏡胃繞流手術

胃繞流手術係垂直胃切除手術嘅「複雜版」，首先將上半部分胃切斷，將小腸連接胃，令身體變得「直腸直肚」，由於食物唔會經過十二指腸，手術後患者需要長期食維他命補充品，防止出現貧血以及骨質疏鬆情況。對於糖尿病患者，呢種手術可增加腸促荷爾蒙和胰島素分泌，8成人手術後糖尿病得到根治。而過重人士喺手術後兩年，大概可減走7成多餘體重。
做前必知事項：
-手術影響吸收，鐵及鈣質，須長期補充維他命
– 1%-5%出現併發症
– 不可還原
不適宜人士

-有消化道疾病或發炎
-消化道容易出血
-曾接受胃手術
-不依從醫生及營養師建議及跟進
-正服用非類固醇消炎藥、抗凝血藥
-懷孕或哺乳

「縮胃」手術無可否認可為「戒唔到口」人士帶嚟希望，不過令到個胃從此失去常人容量同功能，落決定前真係要三思三思，如果可以做運動、食得健康就能瘦嘅人，嘗試俾啲意志去實行，依賴手術減肥後果係一世㗎！