美國小姐自白：大會贊助勸佳麗整容

撰文：CM Team｜圖片：網上圖片、Instagram

多明尼加共和國裔美國小姐前大會總監Edgar Payano好坦白咁講：「當我覺得啲佳麗需要微整一下去增加自信，梗係會勸佢啦。因為選美最重要就係自信。」另一位做過美國內華達州、猶他州小姐行政總監嘅Shanna Moakler強調，點都會尊重佳麗嘅意願，因為選美只係一晚，但整容就係一世。
咁啲佳麗又點諗？以下係佢哋嘅自白：
個案一、Barbara Santana

Barbara喺2014年首次出戰多明尼加共和國裔美國小姐，大熱勝出之後，晉級參加全國賽，但首次見大會總監，三句唔埋兩句已經被勸說整吓個鼻同縮胸。Barbara話：「個個佳麗都有一名整容醫生贊助，所以整容唔使錢。當時我得19歲，對自己胸形冇信心，馬上就答應去整。」整完仲去咗參加環球小姐㖭！

依家望返轉頭，Barbara就話：「我唔反對整形手術，佢可以幫人加添自信。但當時我揀做手術嘅原因純粹係想令指指點點我嘅人接受我，而唔係完全為自己。」

個案二、Keysi Sayago

2017年，Keysi打入環球小姐前五強，當年22歲嘅佢就已經去咗重整鼻形同抽脂，原因有好多：「我哋當時被說服，如果唔整容，就無法達成目標，我哋唯有say yes囉。」雖然有掙扎過，但佢好滿意個結果，覺得整得好自然。但佢坦言，當初大會指導仲叫佢隆胸、縮臀同吊眉————嘩，整咁多？得21歲嘅佢聽到，都有嚇親。最後佢揀咗隆胸，好彩到依家都無悔。「由AA杯去到C杯，着衫真係比例好睇啲，令我得到整容前未有過嘅自信。」

其實講到尾，都係自信問題。自信同咩有關？除咗佳麗嘅內在同外在，仲有別人、評審嘅目光，同埋大會以至社會嘅標準。大會嘅審美標準係咪可以拉闊啲？多元啲？舊年美國小姐就放寛咗泳裝環節嘅計分準則。Nuestra Belleza Latina選美大賽亦改變形式，歡迎不同年紀、身形、膚色的女性參賽。如果個社會包容啲，啲女人都活得自在啲啦。