明星實試：黑眼圈即時消失！「微整形眼霜」原理與成分大公開

撰文：CM Team| 圖片來源：網上圖片

車婉婉推介眼霜 1分鐘黑眼圈即時消失
早前女歌手車婉婉喺FB上載咗一條眼霜實試片，片段入面可以見到佢喺車上素住顏搽眼霜，搽上透明啫喱狀嘅眼霜後，明顯睇到有搽嘅一邊黑眼圈即時減淡咗好多，眼紋即刻減淡晒，見到即時鴛鴦眼嘅效果，大家都覺得「好神奇啊！」

吳日言實試32秒消眼袋減眼圈

另外，藝人吳日言曾經推介過比利時去黑眼圈神器，呢款眼霜成分有氨基酸、礦泥粉以及多重肽複合物，成分較安全。只需一粒米嘅份量，就能兩分鐘內減淡黑眼圈同眼袋。而吳日言喺影片入面更加用手機計時，32秒就已經睇到雙層眼袋消失咗，用完仲可以直接上妝，效果相當吸引。
「微整形眼霜」VS 傳統眼霜
傳統眼霜大多數以「預防性」為主，以高補濕度成分為眼周肌膚補濕防乾燥，不過對於一啲歲月問題例如黑眼圈、眼紋、眼皮鬆弛等等，就唔會有太大幫助。「微整形眼霜」係近幾年醫學微整形嘅新玩法，好多牌子開始將「微整形」概念加入喺護膚品入面，利用「微整形」手術入面嘅成分，令用家可以用「搽」嘅方式都睇到效果。

3款常見「微整形」成分
1.胜肽

胜肽屬於分子較細嘅蛋白質，體積比起膠原蛋白細，可以被皮膚直接快速吸收。當中嘅五胜肽同六胜肽，因為擁有強效嘅抗皺能力，經常被加喺護膚品入面。五胜肽可以抑制金屬蛋白質分解酵素，刺激膠原蛋白再生；而六胜肽又名肉毒桿菌，有淡化表面細紋嘅作用。不過胜肽嘅效果並唔係一朝一日就有，需要長期使用先見到效果。
2.液態拉皮素

由納米微生物製成，分子結構極細，可以直接滲透入皮膚細胞組織，促進細胞活性。接觸空氣後嘅液態拉皮素，有即時收緊肌膚功效，配合適當手法，1-2分鐘內，即有撫平眼袋細紋功效，呢個就係「立即見效」嘅秘密。
3.端粒酶

由DNA以及蛋白質組成嘅端粒酶，來自人體細胞，呢種自生細胞代表人體嘅自生力，當人受到精神壓力個陣，端粒基因就會縮短，愈短嘅端粒代表抵抗力愈低，容易出現敏感或生病。源於端粒嘅自生力，加入端粒酶技術嘅護膚品，就有「還原」效果。
「微整形眼霜」風險

除咗好似做咗「紋繡」（即半永久粉底）效果之外，市面上仲有聲稱可以「豐盈卧蠶」、「開眼角」嘅「微整形眼霜」，呢啲產品聲稱可以加深雙眼皮、豐盈卧蠶、開闊眼角，不過只係用暫時遮瑕原理去解決皮膚問題，而且成分來歷不明，有可能激素超標，所以喺用之前最好搞清楚入面成份係咪安全，或者問吓醫生意見先好用！