日版蛇精男P圖過火似蠟像 愛P圖可能患上醜陋恐懼症

撰文：CM Team |圖片：網上圖片

「醜陋恐懼症」通常喺青春期發病，大部分患者都係女性。美國波士頓醫學中心分析，全球大概有1.7-2.4%人（即50個人就有1個患者）受影響，輕則長期依賴修圖App，害怕望到自己原來嘅樣貌；重則會沉迷整形手術，甚至有自殺念頭。想變靚，結果可能搞出人命真係好恐怖~
到底「醜陋恐懼症」有咩病徵！

病徵1：經常照鏡
唔止女士，好多男士都會鏡不離身，甚至用鏡面Mon貼，想隨時隨地可以望到自己個樣。如果照鏡時，會不停搵自己缺陷，繼而有負面感覺，對五觀或身體評價過份苛刻，都係「醜陋恐懼症」病徵之一。

病徵2：手機有巨量修圖App
好多人都會用相機內置鏡頭照鏡，但如果進化到用修圖App照鏡，就要注意一下。因為「醜陋恐懼症」患者會過分追求完美外面，害怕見到自己有瑕疵嘅真實面貌。當一個人手機擁有超過6個修圖App時，而每張相都用多個App去修圖，呢類人都屬於高危人士。

病徵3：沉迷醫美療程/手術
「醜陋恐懼症」患者由於認為自己外表不吸引，對於可以改變原本容貌嘅美容及整形手術，特別感興趣，每次一見到新療程都會有強烈意欲想嘗試。

日版蛇精男
日本前職業棒球手桑田真澄兒子桑田將司，就係「醜陋恐懼症」嘅疑似例子，以藝名Matt闖蕩娛樂圈嘅佢，擁有純正日本血純，不過經常上載「混血相」喺社交媒體，相入面嘅佢擁有一雙巨大娃娃眼、高尖鼻子、皮膚平滑到接近「零毛孔」。雖然經常被指整容，但他堅稱自己只係「美容中毒」，多年嚟每星期豪洗3000港元植眼睫毛、染眉等美容療程，至於整容樣，就係佢苦練PS同化妝嘅「成果」。樣靚唔靚可圈可點，不過可以睇得出多年嚟，「P圖樣」不斷進化，好似着咗魔一樣，相信要佢無濾鏡拍照片應該相當困難，最慘係同佢影相嘅人，全部都變成「朋友」。

醜陋恐懼症治療
要克服呢種病態心理，首先要搵臨床心理學家做評估以及分析病情，確診後一般患者好難單靠意志力克服，建議搵臨床心理學家選擇適當嘅治療方案。
每個人都有變靚嘅權利，太過份追求美麗，只會「物極必反」！試吓每朝起身，望住塊鏡睇吓自己，欣賞一下自己唔完美嘅地方，學習接納，因為有自信嘅人先係最靚！