搽防曬照樣中招！少女浮潛1小時 背部灼傷生大水泡

撰文：CM Team| 圖片來源：網上圖片

浮潛1小時 背部灼傷生巨形水泡
據外國媒體報導，名叫Maisie嘅英國少女，最近同屋企人去古巴玩浮潛，佢聲稱自己明明有搽防曬先落水，低返到酒店就發現成個背部開始發熱、皮膚紅腫，背上嘅水泡逐漸大到着住衫都睇到。

Maisie曾經喺自己Facebook上分享事發經過：
“睇吓我嘅背部有幾核突有幾腫。喺我搭9個鐘頭飛機返英格蘭嘅朝早，本來曬傷咗嘅位置變到好得人驚！其實我露出背部玩浮潛只係一個鐘，當時無意識到背部已經曬傷，我肯定自己有搽防曬，但古巴陽光實在太強，而且我嘅皮膚太白。”

疑似三級燒傷
Maisie之後去睇急症，醫護人員叫佢等水泡自行爆開。因為傷口喺背面，一瞓喺度或者掂到背部就會劇痛，十分可憐，事件引起大量網民關注，有網民更指睇佢背面嘅傷口好似三級燒傷咁嚴重。

判別曬傷程度
皮膚科專科醫生指出，曬傷有分輕、中兩個程度。
輕度曬傷：表皮偏紅、皮膚出現紅腫，一般可以用保濕潤膚膏、蘆薈產品降紅以及鎮靜皮膚
中度曬傷：紅腫之外，出現水泡，情況嚴重需要立即睇醫生

曬太陽時間短≠唔會曬傷
大眾通常會用「時間」嚟揀防曬。有皮膚科專科醫生指出，真正導致曬傷嘅原因係因為紫外光強度太高，就算只係曝曬一陣，防曬保護力唔足夠嘅話，有搽等於無搽！

白皮膚、兒童容易曬傷
擁有白皮膚嘅外國人，皮膚抵抗力低過黑或黃皮膚，如果平時無防曬習慣，皮膚對於陽光嘅反射能量更會隨時間愈嚟愈弱；另一邊方面，好多家長都無幫小朋友做防曬嘅習慣，對於呢啲咁幼嫩嘅膚質，其實市面上都有好多為兒童而設嘅防曬產品，配方多數都係好溫和。

曬後護理3寶
#1 保濕潤膚膏

成份比較簡單嘅保濕形潤膚膏，可以幫皮膚溫和補水。
#2 凍敷蘆薈

蘆薈對於皮膚有鎮靜嘅功效，曬傷後用凍蘆薈敷喺皮膚上，可以立即降溫。
#凡士林

如果皮膚缺水嚴重到脫皮，可以用凡士林防止水分再次揮發。
如果曬傷得好嚴重，千祈唔好自己亂信偏方例如西瓜皮、可樂去處理傷口，因為呢啲方法暫時都無科學根據，搵醫生幫手先係最精明嘅做法。曬太陽可以令你擁有一身健康小麥色肌膚，亦都可以拎走肌膚嘅健康，曬太陽真係要適可宜止啊！