埃及旅行玩漢娜紋身出事！26歲澳洲女過敏爛手生巨泡險截肢

撰文：CM Team| 圖片來源：網上圖片

細菌感染 出水泡、麻痹無知覺
由英國《每日郵報》報導得知，呢位事主名叫Brooke Crannaford，早前去埃及期間，試玩當地流行嘅「漢娜紋身」，大概洗咗約＄27港紙喺左手手指、手背以及前臂位置上畫彩繪。點知幾個鐘後，有彩繪嘅位置開始覺得好痕。

Brooke Crannaford聲稱：「畫完之後幾個鐘已經覺得非常痕，持續一日之後情況更愈嚟愈差。」

之後更生出水泡，最後麻痹無晒知覺，經醫生檢查後發現，皮膚2-3級燒傷以及組織發炎，最後用咗1個月時間先至好返。

染料含腐蝕物
傳統嘅「漢娜紋身」利用「指甲花」（由一種植物據煉出嚟），本來係純天然嘅。不過天然嘅「漢娜紋身」多數係啡紅色，近年興起嘅黑色漢娜紋身，相比起嚟更時尚，所以好多人都會揀黑色漢娜紋身，不過當中會加入染髮劑成分苯二胺（PPD），對皮膚帶有刺激性，如果喺調配過程入面出錯，苯二胺含量多過2.5%以上嘅話，好大機會有接觸性過敏反應，情況嚴重更有可能要截肢或死亡。

患蜂窩性組織炎
經醫生檢查後，Brooke Crannaford確診患上第3期蜂窩性組織炎，懷疑係因為漢娜色劑太過刺激性，先燒傷皮膚，然後細菌再經傷口進入身體，炎症嚴重程度幾乎需要截肢先保住條命。好在Brooke Crannaford接受醫生「每天清洗傷口」建議，經過3個星期嘅治療終於傳傷口好返，真係執翻身彩。

不宜玩「漢娜紋身」的人
皮膚科醫生指出，加入人工成分色劑嘅「漢娜紋身」，容易令皮膚過敏，建議玩之前先確認成分同埋來源，敏感肌、小孩唔適合玩「漢娜紋身」，早前近有一位7歲少童同樣因為玩「漢娜紋身」變成水泡紋身。

有關「漢娜紋身」
「漢娜紋身」係一種印度彩繪，印度女人喺結婚當日會由親人畫上紋身，代表受到親人嘅祝福。「漢娜紋身」嘅原料名叫指甲花（又名散沫花），將指甲花樹葉磨成粉，製成好似朱古力醬一樣嘅色劑，紋身師會將色劑裝入軟管，然後擠出唔同線條嚟設計圖案，等到色劑變乾後就會洗走色劑，一般嘅「漢娜紋身」可以維持1-3星期。