繼「食好西」後又一力作！吳業坤直認食咗某演藝前輩隻鮑魚
撰文：東方新地 ｜圖片：Instagram
吳業坤直認食咗某演藝前輩隻鮑魚
吳業坤經常打錯字
坤哥曾經將「吃好東西」，寫漏個「東」字變成「吃好西」，遭網民發揚光大後，更成為網絡潮語，人人識講人人曉用！其後，坤哥又再次喺自己個post度將Wifi打成Wife，兩樣大不同嘅樣，睇嚟坤哥打錯字問題非常嚴重……
唔止「好西」同「Wife」呢兩次爆笑事件，舊年4月坤哥再出招，本來佢想搵個平租停車場，點知出Post時就打咗「有無d停車場係免費或者女平架？」出Post後都有唔少網民笑坤哥，而坤哥留言回覆時再次打錯字：「我係正人坤弓木。」小編諗佢應該係想講「正人坤子」吧！
坤哥想認識「田妹妹」？
坤哥同田蕊妮之前拍電視劇《迷》之後做咗老友，只要有阿田出現的地方，坤哥就老是常出現。上年阿田拍咗條女性潔膚液廣告後，入面有隻公仔叫「田妹妹」，坤哥睇完之後留言話：「下次開工介紹田妹妹比(俾) 我識呀」喂坤哥，雖然你依家同阿田好老友啫，但呢個廣告係講緊女性潔膚液，而大家都知道「妹妹」又可以代表女性的某重要部位，你竟然想阿田介紹妹妹俾你識…… 定佢其實講緊隻公仔呢？不過點都好，阿田見到都即時留言鬧爆佢！
鬼馬嘅坤哥出過咁多次錯都好似未有改正，皆因佢今日又出咗個驚人嘅Post，直認食咗演藝界前輩馬海倫（Helen）隻鮑魚！坤哥同Helen姐因為合作拍攝《愛回家》而認識，近日Helen姐生日，坤哥就特登買個牛油蛋糕同Helen姐慶祝。而Helen姐都有好前輩風範，用鮑魚同花膠回禮。坤哥亦喺IG post咗同Helen姐嘅合照：「昨天Helen姐生日，今日買咗蛋糕同佢補祝，仲食咗佢隻鮑魚。#佢話無化妝幫佢一鍵美顏#年年有今日#大女人主義 #很多酒等到老特別香」。
有網民就話坤哥嘅Caption真係好令人誤會。
回顧11個娛圈用錯字藝人事件簿
｜唐詩詠：「Ho Leung」
日前，李佳芯（Ali）喺個人社交網上載自己出席台慶嘅晚裝裙，正當唔少網友都大讚Ali著得好有仙氣時，唐詩詠反而留言：「Ho Leung」，令人聯想到詩詠將Ho Leng（好靚）打咗做Ho Leung（好娘），呢個相信係個無心之失嚟嘅！
有巴打講笑話可能唐詩詠講開圍頭話，不過都有網民勸佢打返中文啦，如果唔係有咩誤會就唔好啦…
｜鄧紫棋：「香港杜麗莎夫人蠟像館」
鄧紫棋（G.E.M.）曾獲杜莎夫人蠟像館邀請，製作蠟像，在蠟像揭幕之日，G.E.M.將同蠟像的合照放上facebook，但地點就打錯成「香港杜麗莎夫人蠟像館」，結果一出post，就被網友Cap圖恥笑。
｜田蕊妮：「Nice to meeting you」
田蕊妮在主持節目《女人四十》第一集中，參加speed dating時，面對電競公司創辦人Derek嘅「Nice meeting you」，阿田竟然答：「Nice to meeting you」，相信明顯是一個因太緊張而非常大意地說錯的情況！
｜簡幗儀：「very pround of myself」
網絡女神簡幗儀(Lilian Kan) ，理大碩士畢業，並同為模特兒及時裝設計師，早前喺IG出post，圖片入面就話，未做到令自己非常驕傲佢都唔會停低，不過就將「驕傲」的英文 “Proud” 就串錯咗做 “Pround”，被網民恥笑佢咁都算係「才女」？
事後Lilian都有在網上回應，承認自己瞓得少狀態差，所以犯埋啲低級錯誤，豁達咁叫大家盡情恥笑佢！
｜連詩雅：「Rest In Piece」
畢業於英皇佐治五世學校的Shiga，在Ig貼文悼念Paul Walker時，有簡寫的R.I.P.不用，硬要獻醜將「Rest In Peace」篡改為「Rest In Piece」！
再加上Shiga將誓不兩立的although與but同時用上，犯下不少低級錯誤，很難相信她曾就讀以英語為主的國際學校……
連詩雅的英文講好過寫…
｜鄧麗欣：「I am very thanks them」
2009年，Stephy與側田出席電影節活動時即場接受英文傳媒訪問，為答謝英國Vivienne Westwood贊助格仔裙，她語出驚人，如此文法錯亂，未知西太后聽後會否O嘴。
｜ 薛凱琪：「Who’s afraid the dark」
與Shiga同樣是就讀國際學校出身的Fiona，2014年時在IG上問大家：「Who’s afraid the dark」，「afraid」後欠了個「of」，文法出錯，但整體情況比Shiga好一點。
｜陳展鵬：「我微博有人head左.我要先關閉」
作為動詞，head有帶頭的意思，但煎pang要說的應是hack，被入侵。
｜吳卓羲：「賣飛佛」
2005年，吳卓羲為泰林電器賣廣告，當中對白「My favourite」經他演繹後，卻變成港式英語發音「賣飛佛」，成為大眾最愛的潮語，傳誦至今。此外，他將Johnny Depp的姓氏誤讀成「deep」，也成為笑柄。只好說句：別怪他~
｜章子怡：「腥橋」
2001年，國際章到美國出席「第10屆MTV電影大獎」頒奬禮時，將「Thank you」讀成「腥橋」，難道台上有魚所以有腥味？
｜劉德華：「May I pass away？」
坊間流傳，搭飛機期間，天王劉德華因為想空姐讓路給他通過而說出：「May I pass away？」(另一版本是他為擠出人群而說了：「Excuse me，can I pass away？」)。「Pass away」是片語動詞，由動詞pass加上副詞away組成，意思是去世，為何劉天王如此看不開？
｜陳克勤：「搓 our breast」
除了藝人，政界當中，混用英文的經典除有唐英年的Ngong Ping「三碌拎」(昂坪360英語讀法應為Ngong Ping Three-Sixty)、Tree Gun鍾樹根的「same on you」(應為shame on you)之外，還有2008年，立法會議員陳克勤接受英文傳媒訪問時，將「try our best」讀成「搓 our breast」，算不算性騷擾？
凡事總有例外，黎天王英文OK！
曾在英國讀書的黎明為和記電訊所拍的一系列廣告當中，有句極具爭議性的對白「Just to say hi」，大眾當初對just後用to存在質疑，但後來有英語權威人士解釋這是「just want to say hi」的縮寫，文法上不存在問題，爭論得以平息，從此成為潮語。真的想知道，作為金句王，Leon講英文的時候會有甚麼金句呢？
