《救妻同學會》簡淑兒海報劇照被消失 全因唔係大台親生女？
撰文：東方新地｜圖片：東方新地、Instagram、劇照
周日時段新劇《救妻同學會》
TVB新劇《救妻同學會》昨晚首播，重啟周日煲劇時段，每集連播2小時。劇集感覺上以青春氣息作賣點，大膽以胡鴻鈞及劉佩玥作男、女主角，另加一班大部分30歲以下的演員(其實有幾位已經3字頭)，主攻年輕人市場。
簡淑兒小背心、熱褲搶鏡
其中近年深受宅男歡迎的新一代女神簡淑兒，今年繼《平安谷》及《波士早晨》再有劇出街，簡淑兒外表本來就成個學生妹咁，今次演大學生角色無難度，昨晚第一集經常都係小背心、熱褲出場，都幾搶眼㗎！
原來係做「Hall雞」？
《救妻同學會》主打年輕市場，所以都有唔少貼近年青人的話題或者用詞，好似朱智賢竟然直稱簡淑兒係「Hall雞」！咁到底「Hall雞」係咩？大概係傳聞中大學宿舍入面，會有啲女學生喺房間為其他男學生提供「特別服務」…… 之類啦。
賣丸仔至真！
簡淑兒一向都係清純乖乖女，唔通今次真係大突破演「Hall雞」？劇中黃庭鋒就得悉真相，佢意外發現簡淑兒其實唔係做「Hall雞」，而係喺房中出售軟性毒品！
簡淑兒海報劇照被消失 全因唔係大台親生女？
《救妻同學會》第一集簡淑兒都算幾突出，不過近日劇集海報、劇照甚至首次宣傳活動都不見其蹤影，海報連名都冇！到底點解？有指係因為簡淑兒經理人合約屬GME，與TVB只有部頭合約關係，即非大台「親生女」，所以就影都冇……
官方回應指……
據知有唔少簡淑兒粉絲對此大感不滿，於劇集官方IG問道點解偶像會被冷待，官方回應就話原來簡淑兒只係一個客串的特別角色，唔算係最主要嗰十位角色。咁大家明白啦？
延伸閱讀：
簡淑兒愈大愈靚 六年進化史重溫
無綫劇《平安谷之詭谷傳說》， 觀眾口碑出乎意料地好，一班女演員的演出備受讚賞，其中簡淑兒飾演一個天真可愛的小女孩淼淼，不過就有個獸父鄭子誠，仲差啲被侵犯！紥一對孖辮、楚楚可憐的樣子，簡淑兒真係無得輸！
《波士早晨》又見到佢
接住《平安谷》出街的《波士早晨》，男主角方面有黃智賢、洪永城等，吸引力一般；反而女演員陣容更吸引！除了人見人愛的Ali李佳芯、好耐無拍無綫劇的陳慧珊外，觀眾在同一時間又見到簡淑兒！今次簡淑兒飾演一個初級秘書仔，怕怕醜又驚青咁，由佢演繹就適合不過！
簡淑兒：我以前只係黑同肥
講開29歲的簡淑兒，雖然佢出名樣子甜美，但其實整容傳聞由佢16年加入《愛回家之八時入席》出演秘書仔時就傳到㷫烚烚。當時簡淑兒經已反客為主，自post 11年回流前美國留學舊照，自嘲曾經又肥又黑、再自嘲EQ差、話傳媒專揀妝頭出事的相片對比，水蛇春咁長hashtags，曲線自辯係女大十八變唔係整容囉！
真面目判若兩人
對於簡淑兒的變臉疑雲，本刊曾獲得一批2012年香港小姐競選官方照，當年簡淑兒20強不入，一早做咗炮灰。係同屆黃心穎、朱千雪、湯洛雯等太高質，還是簡淑兒方面、細眼、扁鼻實力差太遠？雖然話女大十八變啫，點解事隔多年冇人話心穎BB同千雪BB唔同晒樣嘅？又點解可以變變吓變咗撞埋Baby樣呢？
