【經過那些年】網民盤點10大過氣潮物 隔住個芒都聞都陣娘味！
廣告
你同我大大力索吓，聞唔聞到呀？係娘味呀！日前有網民一人一票嚴選10大過氣潮物，真係隔住個芒都聞到大大陣娘味呀！
撰文：占士、aMen│圖片來源：樂天市場、飛比價格、EVISU、Gregory、新傳媒資料室│編輯：占士
網民盤點10大過氣潮物
隔住個芒都聞都陣娘味！
雖然話就話係「過氣潮物」，不過當中又唔係件件都咁娘嘅，甚至有啲到今時今日都仲有人著緊或者帶出街，過唔過氣或者娘唔娘就真係見仁見智啦。
1.Visvim 拖鞋
潮物代表不得不提嘅一定有呢對拖鞋份，依家十幾歲嘅後生仔可能未聽過，不過有網民話當年呢對拖鞋被啲潮人著到爛哂，潮之外仲有陣MK味，唔知有冇巴打仲keep住呢？
2. Evisu牛仔褲
啲巴打唔係話Evisu每個牛仔褲款都過氣，而係呢個大大個print由PatPat去到小腿嘅款，當年又係非常流行，啲潮人死慳死抵唔食飯都要買返條㗎！如果呢條牛仔褲再加埋上面對Visvim 拖鞋就真係襯到絕啦，依家咁樣著出街的話，真係好有「年代感」呀。
3. Gregory 袋
呢個袋唔止受潮人追捧，亦係中學生至愛，對學生哥嚟講簡直係地位嘅象徵。不過時至今日仍然有唔少人揹呢個袋出街，所以過唔過氣又係見仁見智。
4. Outdoor袋
同Gregory袋一樣大受學生歡迎嘅仲有Outdoor袋。以背囊嚟講，當年啲潮人唔係揹Gregory袋，就係揹Outdoor袋㗎啦。
5.I’m NOT A Plastic Bag
英國品牌ANYA HINDMARCH當年憑住I’m NOT A Plastic Bag呢個購物袋造成熱潮。大大個「膠」字印喺個袋度，一副誓要同全宇宙大叫我好環保咁樣，令一班熱愛地球嘅環保潮人紛紛搶購！買到呢個袋嘅人開心，睇住佢哋揹呢個袋嘅人都好開心，咁咪win win囉！
