張繼聰哄老婆有橋又有戲 森美認口衰 自嘆不如
撰文:Sunday Kiss 圖片:新傳媒資料室、謝安琪IG、張繼聰IG
森美愛妻宣言回顧
成日喺電台節目同專欄教人追女仔嘅森美,舊年拍《森美旅行團》時,喺日落之下發表嘅愛妻宣言:「如果那一刻是跟太太來的話,我會很開心,我心裡想假如下次再同太太來的話,我未必會再這到這個日落,見得到日落,又未必可以見到彩虹,所以我覺得,愛情總是對方不在你身邊的時候,你才會發現自己其實很需要她。」
在旁的心穎也忍不住說:「好Sweet啊!」
森美認口衰激嬲太太
不過早兩日喺電台節目《公子會》,森美在訪問阿Kay謝安琪時,就自爆自己平時「口衰」,成日激嬲太太!森美話:「女人成日都會問,『我有冇肥咗呀?』咁我以前就會話『你運動又運得少,跑兩步又嗌停,你點會瘦啫!』」Mean到連阿Kay都問「咩事呀你?」
點知落井下石都仲未夠,自稱對運動好認真嘅森美,仲要攞個計數機出嚟,同森美嫂計卡路里,森美嫂唔嬲到黑面行開至奇啦!
阿Kay都睇唔過眼話:「你估佢而家需要個PT(私人教練)咩?」
跟張繼聰學哄老婆
講到呢方面,阿Kay都忍唔住要放一放閃,事關老公哄佢嘅方式,真係一種藝術!「我而家問張繼聰『我呢排有冇瘦咗呀?』佢就『咦!你企喺邊度呀?瘦到見唔到你呀!』森美聽完,都不禁叫絕!度哂對白,仲要交埋戲,邊度有得輸!
阿Kay講得興起,仲愈講愈多,話老公平時好多呢啲小心思!「好似平時行過我身邊,佢就會『哎呀~』咁扮跣一跣,跣咗出去!然後話:『嘩~好滑呀!』」
雖然阿Kay聽完係回咗句:「嘩~唔好咁啦!大家咁熟!」但係講完自己又忍唔住甜笑!
阿聰拉高晒standard
森美聽完阿Kay放嘅閃光彈,本來都話想請張繼聰嚟做節目嘉賓,但係講講吓就後悔喇!「唔可以俾佢拉高個standard,咁搞法我哋啲男人要做多好多嘢!」
同場加映:
張繼聰賣口乖高調放閃 三重高招冧謝安琪
張繼聰同謝安琪早前出發去旅行,張繼聰就喺IG貼出兩張單人相。第一張係張繼聰係餐廳望住外面嘅相,但焦點唔知點解對咗喺杯咖啡度,張繼聰就留言話「好嘅攝影師可以捕捉倒一個人嘅俊朗。」完全唔介意老婆冇將焦點擺喺佢度,仲要讚謝安琪係好攝影師,此為冧老婆招式一。
自己老婆自己撐
連好友阿Sa都取笑話「佢好似係影緊杯咖啡。」張繼聰抵死回覆「有啲人係就算喺後面都突出。」一方面讚自己,一方面為謝安琪攝影技術護航,自己老婆自己撐,此為冧老婆招式二。
讚老婆又讚自己
隨後,阿聰又po咗第二張相,只見老婆謝安琪好享受咁伏喺泳池邊。張繼聰留言話「好嘅模特兒係會顯得個攝影師勁咗,不過留意番,我係有影功嘅。」大讚老婆點影都靚,係好模特兒之餘,都不忘暗讚自己有攝影技術,此為冧老婆招式三。