ETV一哥一姐你認唔認得？ 有位女歌手好難估

撰文：東方新地｜圖片：香港電台Facebook、Instagram、新傳媒

我們都是看ETV長大的

教育電視(ETV)真係唔少人的集體回憶，小編就最記得「一理通『馬國明』 明白了計算可變簡單」！另外大家可能都唔知道，原來以下呢六位仍活躍於娛樂圈的歌手同藝人，以前都做過ETV主角㗎！當中有幾位以前同依家幾乎一樣樣，有人細細個勁可愛，不過有位女歌手好難估！

運動男神 王祖藍

第一位，相信唔會有人認唔到，佢咪王祖藍囉！不過估唔到以前祖藍喺ETV係飾演排球隊隊長、校內萬人迷，睇吓個女主角幾冧豬！

運動勁都仲未夠，之後片段見到祖藍一手截住想打尖的男同學，讓女主角可以順利上小巴，仲幫對方入埋錢！呢啲咪男神囉！

據知祖藍係喺2000年左右拍過幾集數學科同常識科的教育電視節目，睇番當年祖藍個樣同依家幾乎冇分別，著起校服仲非常乖仔feel，相信老婆李亞男都估唔到老公以前演萬人迷！

綠褲小子 林一峰

第二位係歌手林一峰！原來佢細細個就有份參演ETV，睇番佢以前個樣同依家分別唔大，都係眼仔細細，好鬼趣緻。

估唔到林一峰除了歌藝一流，細細個就已經咁識演戲！唔知佢喺ETV入面有冇唱過歌呢？

造型百變 楊思琦

第三位同祖藍一樣，又係一眼就認得出，楊思琦多年前已經係咁靚女！2001年港姐冠軍思琦妹，原來選港姐前都拍過ETV，講得一口流利普通話。除了一般學生妹校服look外，思琦仲有好多唔同造型，學生哥們肯定會睇得好專心！

楊思琦向來以童顏見稱，雖然依家已經39歲，又已是一女之母，不過樣貌身材真係多年不變！唔知思琦會唔會播番自己啲ETV俾囡囡睇呢？

古裝小美人 黃美棋

童星出身的黃美棋，拍過ETV當然唔出奇！片中見到美棋BB古裝小美女look，眼大面圓圓非常可愛，喺其他小演員當中十分突出！

黃美棋細細個已經參演唔少電影、劇集，觀眾可謂由細睇到佢大，現在的美棋BB仍然咁甜美可愛，但同時多了一份女人味！美棋BB睇番自己ETV演出，就留言話自己細個靚啲，面尖尖的，擘大口都特別靚喎！

未衝出太空時 鄧紫棋

呢位眼大大、塊面脹卜卜的小妹妹，似乎係做錯事被發現，所以要同老師講「對不起」！雖然個樣同依家係有少少分別，不過見到佢燦爛笑容、仲有招牌金魚嘴時，大家就認得佢係G.E.M. (鄧紫棋)啦！上海人阿G.E.M.細細個普通話已經標準又流利，令同學們獲益良多～

時光飛逝，當年ETV中的可愛小妹妹，今時今日已經係紅到上太空的樂壇天后啦！話時話，唔知佢喺ETV入面個女同學仔依家點呢？

女大18變 連詩雅

最後呢位真係難估啲，片中呢位小妹妹英文流利，發音頗算標準，自信十足！旁白就話呢位女歌手「長頭髮、面尖尖、高高瘦瘦」，但都真係聯想唔到佢係連詩雅(Shiga)！

連詩雅出名身材高佻，有對修長美腿，依家睇番佢細個時似乎已經係高人一等呢！

Shiga小時候參與過好幾集英文科ETV演出，節目中同唔少外藉同學仔有對手戲，講英文真係幾好聽！亦相信佢英文係由細叻到大。咁Shiga之前喺網上串錯「Rest in Peace」做「Rest in Piece」… 相信係唔小心啫！