馮盈盈不滿被陸浩明指貪慕虛榮節目開火霸氣自辯

馮盈盈當場黑面反擊陸浩明

馮盈盈、陸浩明等主持的《後生仔傾吓偈》向來以輕鬆方法、貼地話題，一班後生仔圍爐齊齊吹吓水，日前一連兩集《後生仔傾吓偈》以貪慕虛榮為主題，好chill嘅氣氛突然變得火花四濺。節目中馮盈盈被陸浩明及多位後生仔主持指最能跟「貪慕虛榮」四字扯上關係，其中一位後生主持補鑊：「因為盈盈身上都係名牌，佢最有條件同呢四個字扯上關係，我哋後生仔主持都唔會有名牌喺身，但係我知盈盈係靠努力去得到，所以我係好欣賞佢嘅﹗」陸浩明指住該後生仔主持：「乜你變咗幫盈盈講說話咁㗎﹗」本來還帶住微笑的馮盈盈，輪到陸浩明發表意見：「我唔識馮盈盈嘅，我係一名觀眾，我睇新聞話佢去船P，十單有兩三單新聞都同富二代扯上關係，哎呀，總之呢啲就係貪慕虛榮㗎喇﹗」鏡頭一轉向馮盈盈面口已變成黑色，明顯對陸浩明對的指控感到相當不滿。

馮盈盈不滿被陸浩明指貪慕虛榮節目開火爆seed自辯 — 大家投票「最易令人誤會係貪慕虛榮嘅人」多位後生仔主持及陸浩明都揀馮盈盈。

陸浩明咬住唔放：「呢排仲有冇去船P？」

馮盈盈霸氣回應貪慕虛榮的指控：「當你喺呢個社會好努力打拼然後上到某個level，自然就識到呢個level嘅人啦，係好順其自然，係好合理，只要你唔係唔念舊就冇問題啦。坦白講，我成日同中學同學食飯見面，我都有post過相，咁有冇人理過吖（高八度）？」馮盈盈繼續爆seed：「但係啲人只會好著重睇有冇邊個知名人士呢，但點解唔去諗我work for到嗰個level，或者努力啲出去識唔同嘅人，擴闊自己嘅圈子，就會識到其他界別嘅人呢，又冇人咁諗㗎喎﹗馮盈愈講愈激動，陸浩明突然補刀問：「呢排仲有冇去船P呢？」馮盈盈當場窒了一下然後黑住面答：「呢排天氣凍冇喇﹗」馮盈盈不滿被指貪慕虛榮，與陸浩明在節目中開火，充滿火藥味﹗

馮盈盈不滿被指貪慕虛榮，愈講愈激動，陸浩明突如其來問：「咁最近你仲有冇去船P？」馮盈盈當場窒了窒，然後答：「最近天氣凍冇喇﹗」陸浩明繼續唔收口：「係咩？」令全場後生仔都笑，唯獨馮盈盈一個黑晒面。

戴祖儀開口撐天經地義

馮盈盈為自辯而對「貪慕虛榮」重新解讀，佢指放工仍忙於管理社交網是為推銷自己，為自己事業著緊，又話自己出去識朋友，都是為事業拼搏的一種：「可能你出去同人食吓飯，咁啱人哋搵緊個代言人，而你自己又去sell吓自己話適合去做，咁咪一拍即合囉﹗」後生仔主持Fred話藝人這個職業沒有收工時間，戴祖儀和應：「係呀，出街要保持笑容，唔係又畀人話黑面態度差﹗拍完嘢放工，每一日都會諗聽日po啲咩嘢，諗得咁辛苦，咁之後出咗糧去買自己鍾意嘅嘢有冇問題先﹗點解要畀人話貪慕。」

戴祖儀撐盈盈，靠自己努力搵錢買自己心頭好，係正確的，沒有必要理會別人指貪慕虛榮便不去買自己想要的名牌包包。

馮盈盈反指唔貪慕虛榮是懶惰

有人撐的馮盈盈仍然氣難下，繼續激動地為自己解釋：「無論做呢行定做生意，都係要去擴闊自己圈子，去為自己事業打拼，呢啲叫上進嘅表現，寧願放工返屋企煲劇，都唔出去識吓人搵吓機會，淨係喺度等運到，等啲錢喺天跌落嚟，呢啲人先叫不務正業，如果呢啲叫貪慕虛榮，咁唔貪慕虛榮嗰啲係懶惰，唔去為自己事業做任何嘢，我去為事業打拼，呢啲叫上進心﹗」