【全民造星3】Anson Bean未攞獎先出位姜濤一哥地位危危乎

Dec 10 2020

隨著《全民造星III 》戰況一觸即發，當中焦點參賽者，現年19歲的Anson Bean（陳毅燊）成功突圍，完全複製姜濤青澀及唱跳攝人爆炸力，冧到霸氣花姐經常露出讚嘆笑容，火速成為花姐新寵上位，更可以同花姐同框拍廣告，未攞獎先出位！

撰文、圖片：東方新地

姜濤疫市下工作不斷

18年在ViuTV選秀真人騷《全民造星》由頭帶到尾的姜濤，轉眼出道兩年，近日亦不負眾望跑贏大市，在疫市下工作不斷，除了被公司安排到台灣拍劇，廣告一個接一個，收入未受疫情影響，近日推出新歌的他，更成功揮抵陳奕迅，打入《叱咤樂壇頒獎禮》「我最喜愛男歌手」最後五強，事業隨時再下一城，人氣keep住旺，都要多得《造星》之母花姐背後發功。青澀又愛賣萌，被視為經理人花姐頭寵的姜濤，去到邊都有花姐傍到實，火速確立Viu一哥地位，雖然有不少姜糖（姜濤粉絲）不滿指花姐偏心契仔Ian （《造星》亞軍陳卓賢），不過永遠排頭位的姜濤，同Ian早就主客有別，是花姐首席愛將毋庸置疑！據知情者透露：「花姐踩入經理人部門，講明要捧小鮮肉，佢睇中姜B外形討好似足韓仔，幫佢由頭到腳包裝過， keep住嗰份氣質，公司一路放好多資源喺姜B身上，除咗唱歌，Viu開幾套話題劇集都用佢，作為新人零演技，呢啲機會唔係人人有！」

七月飛台灣拍劇的姜濤，在當地隔離十四日後入劇組，與劉奕兒、蔡凡熙拍攝《超感應學員》。

姜B在台灣拍劇之餘，亦有出外閒逛，他在街頭大電視銀幕下自拍，乘機宣傳新歌〈孤獨病〉。

身為Mirror風頭躉的姜濤，甫出道廣告已經多得驚人，在疫情下人在台灣一樣有廣告拍，留台期間先後拍了護髮和護膚廣告。

備受ViuTV力捧的姜濤，唱歌拍劇工作做到冇停手，除了早前到台灣拍中台合拍劇，另一套ViuTV重頭原創劇《太平紋身店》，姜濤亦有份參與，同娜姐（周秀娜）合作。

留台三個月拍劇的姜濤，完成劇集返港隔離十四日，出關即歸隊同Mirror合體出騷，當日完騷後他更在車上自拍大晒粉絲熱情。

除咗吸納到大批姜糖支持，圈中女神亦睇中姜濤夠Fresh，去年《叱咤樂壇頒獎禮》，姜濤便與謝安琪合作，由Kay伴奏演唱《我們的基因》。

抄足韓仔成功以唱跳小鮮肉偶像突圍的姜濤，今年更成功揮低陳奕迅躋身「叱咤我最喜愛男歌手」五強之列，五強名單分別為鄭中基、許廷鏗、林家謙、姜濤、陳卓賢。同《造星》亞軍Ian又埋身鬥！

複製姜 B 參賽未贏獎先跑出

不過世事無絕對，近日熱爆被全城談論的《全民造星III 》，相比兩年前的《全民造星》氣勢有過之無不及，除了參賽者有看頭，霸氣花姐快狠準的評語更超級出位，當然一班小鮮肉亦是焦點，當中現年19歲，活力青澀加上跳唱功力都非常搶鏡的Anson Bean（陳毅燊）便成為網民熱捧對象。完全抄足當年參賽時的姜濤，唱跳皆能之外，Anson Bean還有攝人討好笑容，成功冧到霸氣花姐不時嘴角含春而笑，火速出位，就連花姐被邀拍銀行廣告，Anson Bean亦被揀中，伴住花姐一齊拍攝，未贏獎先跑出，得花姐如此厚待，Anson Bean更被網民捧為今屆《造星III 》的十強大熱。據知情者透露：「花姐肯大膽創新，佢睇準香港冇韓國嗰種偶像小鮮肉男團，所以搞《全民造星》，一手打造Mirror出嚟，姜B外形好鄰家，而且唱得跳得，加上佢夠聽話又勤力，所以花姐先咁錫佢，而且上年《造星II 》冇起眼新人，唔似今屆《造星III 》一班參賽小鮮肉咁惹人談論，Anson Bean面試嗰時表現已經好突出，花姐一早點名讚佢，Anson Bean外形同路線同姜B咁相似，你話對姜B冇威脅就假！」