鄭中基操肌密謀開Talk show 疫情下拍片散播歡樂

撰文、圖片：東方新地

鄭中基疫情下拍片散播歡樂 講屎尿屁受歡迎

自從娶了有線主播余思敏生了一對寶貝仔女，鄭中基不再不羈，全心做個好老公好爸爸，唯一沒變的是無厘頭搞笑性格，受到疫情影響，鄭中基工作量亦大減，他靈機一觸拍片娛樂大家，大半年前在youtube開了個人頻道「機動電視台RTV 」，至今已超過17萬訂閱人數，本來鄭中基表明是看心情拍片不定時出片，現在已變成慣常，全因他有一班支持者，疫情下透過拍片令廣大市民感到歡樂，鄭中基背負著一個使命感。

拍電影、拍劇開個唱都手到拿來的鄭中基，眼見好友林敏驄與杜汶澤近年先後成功開Talk騷，鍾意講笑娛樂觀眾的口水佬亦蠢蠢欲動。近日鄭中基再次暴龍哥上身，在網上拍片大講屎尿屁，試方向試反應，溫情又得、無厘頭又得，根本冇人夠佢玩，鄭中基開邊瓣都一定有支持者。

宣布明年工作大計 逆市圓多年心願

日前鄭中基與經理人及助手拍了一條片，除了公布訂閱人數過十萬要即場表演打邊爐找數外，更宣布明年的工作大計，據知情者透露：「Ronald今年先開始搞網，其實算係好遲，不過佢啲片極受歡迎，逆市中亦唔憂財路，出年佢有好多計劃，拍戲、出新歌、搞網上演唱會又出自己品牌時裝，呢啲全部都十拿九穩，其實Ronald最想就係開Talk騷，呢個係佢多年心願，之前林敏驄講過想同佢合作，不過好多因素最後搞唔成，啱啱阿澤（杜汶澤）開完，Ronald睇完更加心癢癢，佢好想感受一下自己企喺台上講嘢嗰種感染力，不過疫情之下要開騷真係唔易，場地問題、贊助都係問題，呢個階段仲係構思中，未可以公開住，不過Ronald想試吓觀眾反應，呢排拍片都開吓啲話題，估唔到最受歡迎就係講屎尿屁，要分兩集去講，Ronald講到七情上面，仲示範撩鼻屎請人食，集集都近三十萬人點擊。」鄭中基識得搞氣氛，開Talk騷完全難佢唔到，疫情下香港人愁眉不展，入場聽佢講屎尿屁輕鬆一下都好嘅，不過話題太粗鄙，鄭中基一對仔女咪唔可以撐場支持爸爸囉！