講起王菀之、肥媽你一定諗起佢哋！盤點網民心中娛圈永恒的CP

撰文、圖片：東方新地

張敬軒 王菀之

同期出道識於微時，份外啱傾又一樣有音樂抱負，張敬軒同王苑之在私係好朋友，在公都係好拍檔，歷年多次音樂合作、永遠在個人演唱會上預留一個專屬環節畀對方，呢種友誼同默契， 即使 Ivana 嫁為人婦亦不會改變。

陸浩明 肥媽

電視台飲食節目多不勝數，而每個「 煮 」持身邊梗有個負責下把扮無知嘅副手，而芸芸配搭之中，要數肥媽同陸浩明特別登對，無論外形、體形同聲線都成強烈對比，一凹一凸啱晒 key，淨係睇「食平D」系列無限添食，就知呢對拍檔幾令觀眾受落。

森美 小儀

森美結咗婚廿年、仔都已經十七歲就嚟入大學，而小儀就不停呻情路坎坷，而次次被飛都會責怪自己，如今49歲仲係單身。不過90年代開始兩人從電台到舞台到電視台一直係好拍檔，一高一矮一肥一瘦合作無間深入民心，所以森美小儀永遠無法分割。

安德尊 李錦聯

唔理係真心不和定係為咗節目效果，婦女節目主持安德尊同婦女節目廚神李錦聯，因為唇槍舌戰單單打打令到《 今晚食乜餸 》環節突然人氣急升更成為熱門話題。照計主持人不和應該影響節目效果同收視，但呢一pair偏偏有種獨有喜感同火花，愈碰撞愈精彩觀眾睇得愈過癮。

洪永城 黃翠如

有一種登對，係全世界都認為佢兩個命中注定，總有一日會喺埋一齊。可惜洪永城、 黃 翠 如 呢 一 pair， 由 有 線 合 作 到 無綫，由香港走到去世界每一個角落，行到嚟今日竟然愈行愈遠，家陣翠如 BB 都結埋婚成為蕭太，而洪永城亦蜜運中，雖然各自心有所屬，但友誼長存。

郭可盈 陶大宇

無綫經典警匪劇《 刑事偵緝檔案 》拍咗五個系列，合作過當中三個系列嘅陶大宇最近喺訪問中，承認當年真係約過拍檔郭可盈去睇戲，可惜二人有緣無份，最後因為性格同樣火爆亦因為郭可盈身邊仲有個林文龍，所以最終只能成為好友。即使如此，大勇同「 姐匙 」永遠係一對！

吳卓羲 欣宜

見到吳卓羲就會醒起佢隻首本名曲〈 別怪她 〉，只要提起吳卓羲身邊嘅「 她 」，絕無意外會想起 N 年前兒歌頒獎典禮上，欣宜公主輕吻卓羲王子，而換來王子一臉難堪錯愕表情嘅一幕。其實往後多年王子同公主已甚少同場亦絕冇交流，不過呢一幕已經足夠喺廣大市民心中留下烙印。

彭健新 OK仔

溫拿成員彭健新其實一早結咗婚，老婆亦都經常陪在身邊出席重要場合，不過唔知係太太多年來太低調，定係 OK 仔太過搶眼喧賓奪主，全香港冇乜幾個叫得出彭太個名，但就好似睇住 OK 仔長大一樣，年前 OK 仔過身，唔止老竇彭健新，不知幾多人為佢傷心流淚。

KB 火火

一個係鼓佬同板仔，一個係導演編劇同填詞人，風馬牛不相及卻因為ViuTV走在一起主持節目。不得不佩服ViuTV嘅好眼光，KB同火火嘅合拍程度恍如遇上世上嘅另一個自己，家陣唔止節目添食完再添食，仲一齊拍住上做騷接job，二人亦係網民心目中襯到絕嘅另類CP。