當年喪夫陷困境吳浣儀獲羅蘭鮑姐出手相助

後生喜愛夜蒲

吳浣儀日前應好友苑瓊丹邀請，亮相香港開電視節目《開工大吉77》訪問，暢談多年演藝生涯嘅點滴，浣儀姐話自己當年係夜之女「喜愛夜蒲」，更即席示範舞姿：「苑仔話我嗰樣老老實實，但佢唔了解後生嘅我，當年我都係會周圍玩，收工要去『蒲』㗎，去飲嘢、跳舞之類，跳得好勁添，我係鍾意去玩！年青時有人讚我幾靚，加上讀書時有做過舞台劇，覺得自己鍾意做戲，見到電視賣廣告，又冇咩做咪試吓考訓練班，諗住唔得㗎，點知又過晒關，所以話真係整定嘅！」

吳浣儀當年為家庭毅然放棄事業，點知好景不常，痛失愛人後非常悲傷，但諗到四個年幼仔女，仍撐住身體照顧屋企。

浣儀姐喺73年參加無綫藝員訓練班入行，入行初期都係做二打六閒角扮茶客，翌年就被選中飾演《朱門怨》嘅三少奶迅速走紅，大受力捧，星途一帆風順：「因為我以前又曳又惡死，所以角色都叫做番我自己，好自然就發揮到囉！去到75年我因為『嬲』而離開電視台，當年都算年輕，做咗兩年公司突然搵你做啲閒角，加上唔小心NG就會有說話聽『唉，冇船過海啦！』，而我又剛開始拍拖，咁咪唔鬼做囉！」她表示愛情成為離巢動力，否則唔會太衝動拒續約：「當年另一半都冇話養起我，但拍極都係閒角，由朝等到晚都未埋位，阻住我拍拖嘛！總之都係任性啦！做嘢冇諗過後果，跟住就轉咗去佳視，點知最後執埋，咁我咪走去結婚囉！」

74年拍嘅《朱門怨》飾演三少奶，惡形惡相嘅吳浣儀話角色只係做番自己，此劇令佢一炮而紅。 — 74年拍《朱門怨》飾演三少奶，坐喺度惡形惡相嘅就係浣儀姐，而企喺度嗰個就係二少奶盧苑茵，浣儀姐話角色只係做番自己，此劇令佢一炮而紅。

吳浣儀與同期出道嘅Madam盧苑茵一齊受力捧，不過吳浣儀拍拖大過天，竟然覺得拍劇阻住佢拍拖，後來更因一時之氣劈炮唔續約。

吳浣儀為老公醫病花盡積蓄，曾經窮到連樓都抵押埋，細仔嗰陣得12歲，三個女又未出身，嗰段時間真係好辛苦，最後更要問朋友借錢度日，幸好有有鮑起靜幫助，仲有羅蘭借出20萬。

老公病逝孭起頭家

當年浣儀姐24歲就下嫁經營旅行社嘅老公，其後生咗三女一子，一家六口幸福滿滿，佢亦樂於做少奶奶照顧仔女，直至87年佢重返無綫拍《季節》，之後又因亞視高薪挖角再離巢，不過好景不常，浣儀姐老公患上肺癌，為咗醫病耗盡所有積蓄，可惜到05年都係撐唔住病逝。嗰段期間浣儀姐一邊照顧家人，另一邊廂拍劇養家，成為人生最艱辛的日子：「當時真係唔做唔得，仲要問鮑姐、羅蘭姐借錢過難關，要拍劇還債！不過我好得意，自身嘅事唔會點喊，要面對囉！後來丈夫過身，好在一直都有戲拍可以養家，當時好忙都冇時間理啲子女，但好在佢地依家都好OK！」

近期浣儀姐因為疫情而閉關，但佢仍期待好劇本降臨：「依家有戲拍咪拍囉，不過我係冇攞獎命㗎，當年都恨過吓想攞，依家都想嘅！但呢啲都係整定，最緊要開開心心、身體健康，睇開啲唔好轉牛角尖囉。」拍攝期間臨近苑仔生日，浣儀姐專程買蛋糕慶祝，但反被苑仔「嫌棄」：「我叫浣儀唔好客氣啦，唔好買蛋糕啦，直接封利是畀我算啦，點知佢話我俗氣！又大一歲啦，唔好問我幾大年紀啦，我地都係第一次慶祝生日，非常難得！」已經65歲嘅浣儀姐，依家仔大女大其實可以享清福，不過佢仍然好鍾意演戲，所以未有退休大計。