鍾嘉欣高價回巢拍新劇《兒科醫生》 馬國明新劇感情戲份力壓大哥鄭嘉穎
廣告
離巢三年的鄭嘉穎，落實返無綫拍新劇《兒科醫生》原來該劇女一更令人充滿期待，無綫已斟掂婚後移居溫哥華生活的鍾嘉欣回歸演出。女神回歸，大家理所當然以為鄭嘉穎、鍾嘉欣劇裡演一對，咁就錯嘞！其實劇中同嘉欣發展感情線，是該劇另一男一馬國明，啱啱認戀湯洛雯人氣火熱的馬明，人逢喜事精神爽，去年升呢做無綫視帝後，事業愈戰愈勇，走勢凌厲吸金能力拍住無綫一哥陳豪，新劇被安排擔大旗，力壓「鐵馬大哥」鄭嘉穎，認真今時唔同往日！
撰文、圖片：東方新地
《兒科醫生》演員陣容超強勁
醫療劇集近年大受歡迎，除了11月開拍的《白色強人2 》，還有將於7月開拍的中港合拍劇《兒科醫生》，演員陣容更是超強勁，除了有近年進軍影壇的鄭嘉穎回巢，男主角還有馬國明及羅仲謙，而劇中兩位女主角亦好有份量，分別是婚後已經移居溫哥華，近年幾乎絕跡無綫的鍾嘉欣，另一位則是近年在ViuTV大放異彩，在劇集《瑪嘉烈與大衛系列 綠豆》及《歎息橋》備受好評的周家怡。
鍾嘉欣300萬回歸 獲度身訂造角色
今次鍾嘉欣回歸，據知酬勞相當優厚，對於有傳更高達300萬，嘉欣亦未有否認，雖然18年鍾嘉欣曾客串劇集《再創世紀》，不過當時無綫專登移船就磡，將鍾嘉欣戲份全安排在溫哥華拍攝，但今次鍾嘉欣佔戲極重，需要留港開工四個月。據知情者透露：「因為嘉欣老公喺溫哥華係脊醫，嘉欣結婚之後，都將生活基地搬返去溫哥華，佢好緊張家庭，即使仲好享受工作嘅滿足感，但為咗照顧一對仔女，放下事業，只揀啲唔太困身嘅工作先做，好似拍廣告或者出活動、登台咁。不過，今次無綫邀請嘉欣復出好有誠意，套劇嘅監製方俊華，以前編導過嘉欣的《溏心風暴之家好月圓》、《公主嫁到》，大家合作慣晒，而無綫今次畀嘉欣嘅酬勞仲超高，角色又為嘉欣度身訂造，好有發揮，劇中嘉欣飾演兒科醫生，會同一班小朋友合作，對於做咗媽咪嘅佢，會係幾大挑戰！」
馬國明十三度演醫生 感情戲份力壓大哥鄭嘉穎
不過，女神鍾嘉欣回巢，劇中並不是與鄭嘉穎演一對，今次嘉欣與馬明演情侶，羅仲謙在劇中則是暗戀嘉欣，至於鄭嘉穎就與周家怡演夫婦。據幕後人員透露：「馬明形象健康討好，上年攞埋視帝之後，人氣同走勢大好，已經拍住無綫一哥陳豪，公司好睇重佢，今次套劇更安排佢孭重飛，雖然套劇係雙男一，但感情主線都落喺佢同嘉欣度，個勢明顯騎住鄭嘉穎！」正所謂「十年人事幾番新」，大家身邊另一半都唔同咗啦！地位人氣話變就變！
