寶寶大過天｜岑麗香取代視后李佳芯 唔追女同馬國明拍《BB來了2》
廣告
岑麗香與老公強強（Joshua Ngo）16年結婚，「老婆奴」強強為配合香香發展，乾脆 回流香港發展。憑著多年經驗和生意頭腦，回港開始瞓身金融投資事業，又同香香聯名開埋網店，買得起豪宅養得起囝囝Jacob之餘，絕對大把本錢支持老婆繼續追夢！
撰文、圖片：東方新地
《寶寶大過天》岑麗香取代視后李佳芯 與馬國明合作
生B後，香香專心湊B，唔似其他圈中媽媽密密接Job搵奶粉錢，八個月來加加埋埋都係出席過三、四次公開活動，香香都話因為放不下囝囝：「復工出門口都唔捨得佢（兒子），但返到公司坐喺度化妝整頭，感覺又好開心，因為好似做番自己鍾意做嘅事。開頭都擔心自己唔想工作，但原來返完工覺得係想繼續返，所以就好期待返嚟做唔同嘅工作。」
又掛住拍劇、又放唔低個寶貝仔，本來香香如意算盤係打算等到Jacob識行識走入學至開始接劇，不過遇上《寶寶大過天》（原名《BB 大晒》）臨時易角，上集有口皆碑、有得同老拍檔馬國明再合作、再加上題材完全度身訂造貼合香香人母身份，思前想後，最終按捺不住戲癮決定接拍。
老公開綠燈支持追夢為拍劇推遲追女大計
形象討好又態度乖巧，香香一直是多位電視台金牌監製御用愛將，其實除了《BB來了2》，劉家豪年尾籌拍的重頭新劇亦預了香香。今時唔同往日，香香一早轉投王祖藍旗下經理人公司，唔使密集式還劇債、揀劇純為個人興趣，最重要過到強強一關。
據悉強強亦因為尊重老婆、鼓勵香香追夢一早開咗綠燈，只要與電視台傾妥 條件、盡量不用離家太久，新劇接拍成數極高。不過唯一犧牲的，可能就是一早說好的追女大計又要推遲。
