余文樂曬兒子慶生照 一個舉動遭網友狂插自私精

撰文：東方新地 圖片 ：新傳媒圖片、Instagram

余文樂為兒子慶生

余文樂同台灣模特兒王棠云結婚2年，去年5月更迎來兒子余初見，日前係Cody嘅1歲生日，余文樂同老婆為囝囝搞生日派對慶祝，仲邀請咗好多好朋友及小朋友出席，仲上傳大合照到IG同大家分享喜悅，他寫道感謝眾人：「感謝所有愛他的親朋好友，他是一個幸福的小朋友，謝謝你們來。」

余文樂只幫兒子遮樣

本來分享生日相係開心事，但網友睇完都狂鬧余文樂「自私」！事關網民發現樂仔只係幫Cody遮樣，但同場嘅小朋友就未有遮樣，網友認為佢嘅行為相當「自私」，紛紛留言話「有冇問下其他人想唔想你post佢地嘅小朋友上網，你識遮自己個仔，但就唔考慮其他小朋友，己所不欲，勿施於人呀！」、「其他小朋友都係人囉」、「大方啲啦，又要影又要遮！」

網友點睇：

余文樂囝囝正面照曝光

唔少藝人都為保護仔女私隱而避免佢哋出鏡，而余文樂都係一樣，好多時即使係晒就子相都會選擇遮樣或只出手仔腳仔，令到唔少人都好好奇究竟Cody係咩樣！

余文樂首次喺個人社交網上載囝囝Cody嘅正面照，相中Cody身穿橫間上衣坐喺BB車上，背後就係爸爸樂仔嘅大型廣告牌，不過，Cody都係被後期加咗副黑超遮一遮！

網民大讚型仔

唔少網友見到Cody正面照後都紛紛指囝囝似爸爸樂仔，仲話：「一睇就知係你嘅DNA」，同時亦有網民大讚Cody好型仔！

睇返過去余文樂都有上載過囝囝嘅相，不過全部都只係影Cody嘅背影或手仔腳仔，從未畀囝囝正式曝光！

因此，相信唔少粉絲都好希望知道Cody似爸爸余文樂多啲定媽咪王棠云多啲，唔知余文樂會唔會俾呢個機會大家睇仔仔正面呢？

余文樂父子溫馨共浴

早前，余文樂上載咗一張佢同乖仔Cody的沐浴照，相片中可以隱約見到Cody 仔嘅側面。首次露面嘅Cody號召力十分強，佢個側面一曝光，即刻引嚟十幾萬網友瘋狂俾like，認真厲害！呢張共浴嘅照片構圖好唯美，型男爸爸赤裸上身用佢強而有力、充滿肌肉線條嘅臂彎抱住阿仔，而Cody就用側面對住鏡頭。樂仔抱住Cody都未夠，仲要低頭親吻囝囝嘅額頭，慈父樣出晒嚟！

囝囝僅露側面 網民大讚「好得意」

網友見到呢張型男與兒子共浴照之後紛紛留言表示羨慕，網友話Cody好幸福，。另有不少網友將焦點放咗喺Cody微胖嘅腳仔同細細嘅鼻仔，大讚Cody好得意，話係遺傳咗父母嘅強大基因。另外都有唔少網友將焦點放喺樂仔度，仲有人講笑咁問樂仔「還缺女兒嗎？」，睇嚟大家都好想做Cody仔，咁就可以同型男樂仔共浴。

圈中型男筍盤余文樂喺前年封盤，同台灣皮帶千金王棠云結婚，二人婚後一直恩愛，經常俾傳媒拍到出雙入對。而二人嘅囝囝余初見就喺去年5月出世，型男人夫樂仔晉升做型男爸爸。仔仔出咗世之後，佢就變得更加重視家庭，仲成日都話希望可以陪多啲囝囝同太太。

愛子心切 余文樂拒讓囝囝曝光

雖然Cody出世已經就嚟一歲，但潮男爸爸同樂嫂都好有默契，從未俾Cody正面曝光過。樂仔每次上載寶貝仔嘅相唔係剪影，就係背面、手仔、腳仔，認真神秘。樂仔曾表示「有手仔腳仔剪影睇已經算高調。」所以今次有「正面」相睇已經係一大突破！