大起底！李彩華老公家族顯赫 傳擁11億四合院
撰文：東方新地｜圖片來源：李彩華微博、新傳媒圖片
李彩華 拍拖半年閃婚
現年35歲李彩華（Rain）早前曾與前無綫藝人何遠恒分手結束3年情，之後一直寄情工作，亦沒有再傳出緋聞消息。誰料日前情人節，她就在微博上留言「Rain+Eric=Mr & Mrs Huang！」，趁機對外宣布她已成人妻，並上載多張婚照。
Rain透露同老公識咗好多年，對方一直暗戀佢，直至去年初知道佢同何遠恒分手，於是展開追求，估唔到男友喺佢生日時求婚，Rain只懂傻笑say yes！
相片中可看到Rain身穿「小背心」款兼拖尾的白色婚紗，簡單之餘又盡顯氣質，兩張Rain的單人照優雅大方，同時還有她與丈夫在露台上深情對望的相片。
李彩華婚事曝光後，其丈夫立即被起底，有指38歲的Eric Huang是於內地經營大型鋼鐵生意，身家豐厚，家族成員還為中央政府工作，背景顯赫。
據知，他在北京買入多幢物業，其家族更擁有價值逾11億港元(約9億元人民幣)的四合院。由於四合院均為一代傳一代，加上物以罕為貴，有錢都未必買得到。
據知Rain與在內地從事鋼鐵生意的老公Eric Huang拍拖半年就閃電結婚，早前他們到希臘聖托里尼小島度蜜月，近日將會返港過年。
舊情多不歡而散
李彩華嫁到個好人家，唔少網友都送上祝福，事關阿Rain情路都算坎坷。早年她在黎燕珊主持的有線節目《往事．並不如煙之情書》做嘉賓大談感情事，她直言人生只有五段情史：「傳來傳去好似好多，但五隻手指數得晒！」
很可惜舊情也多數是不歡而散，她又大爆過去有男友劈腿及一腳踏三船：「往事通常唔開心咁結束，但唔係想指摘。對方有劈腿都令我當時好嬲，但受洗後覺得係上天畀經驗我。（講最嬲邊個？）冇邊個係幾好，（開口爆邊個劈腿？）唔會開名，人哋可能已有家庭或新戀情呢。」
否認小三
Rain坦言於分手後獲司機告知男友曾帶其他女人返歸：「當時男友趁我返大陸拍劇就帶另一女仔返嚟，司機見到屋企有對唔屬於我嘅鞋。又試過有男友追我前本身有女友，追到我後又有另一個女友。（做小三？）我係正印，係男仔同其他女仔分得唔清。」
Rain入行後首段戀情，係佢18歲同林峯拍電影《別戀》時發展地下情，峯峯係阿Rain嘅初戀，當年Rain透露見過林峯父母：「當年拍戲佢對我呵護備至，我好快就知道佢對我有好感。記得有一場戲我跌傷咗，佢好擔心，放工仲打電話嚟關心我。佢知道我鍾意食嘢，就買好多零食畀我，冇幾耐我哋就開始拍拖。當時係 puppy love，單純地喜歡大家，冇諗太多將來。」
不過因男方要去大陸發展，戀情維持半年就無疾而終。
與林峯甩拖後，Rain於03年被指介入丁子高與譚凱琪戀情，譚凱琪更向傳媒哭訴男友被搶。
Rain在04年拍攝蕭若元監製劇集《功夫足球》時，有指Rain被兒子蕭定一力追。
09年，她與保險業才俊王森楠(前名王傲山)拍拖兩年，二人發展到談婚論嫁，由於Rain常在大陸拍劇，有傳男方搭上新歡導致二人分手。
同何遠恆拍拖三年 分手收場
分手不久的Rain，即搭上做汽車零件生意的金融闊少潘啟翀，不過有傳對方兼職做「疊碼仔」，遭人走數千五萬，向她借千萬不遂，即狠撇阿Rain。二人於2012年6月分手，戀情只有7個月。
2015年，李彩華同當年的「新五虎」何遠恆經朋友介紹認識撻著，二人拍拖三年，戀情由低調到近年大方認愛，更多次傳出好事近，還以為阿Rain好快做何太，不過因婚姻理念沒有共識，她接受本刊訪問時強調沒有涉及第三者，去年1月「閃分」，結束三年情。
哽咽認分手
據阿Rain好友透露，阿Rain思想傳統，每次拍拖都認真投入，都想同對方有將來一齊組織家庭，可惜兩個前度王傲山及潘啟翀都唔係咁諗，當年同阿Rain拍拖，一個瞞住女友外邊偷食，另一個又做疊馬仔欠下巨債，向阿Rain借千萬還債，令她對愛情缺乏安全感。
想趁早生B
因何遠恆熱烈追求攻陷芳心，加上男方比阿Rain年長十年，理應相當成熟，但拍拖三年，對方卻未有為二人將來計劃，感情一直原地踏步:「阿Rain思想傳統，同BoBo(何遠恆暱稱)都拍咗拖三年啦，加上自己過咗三十歲，都想快啲結婚，趁後生早啲生小朋友，佢本身好鍾意小朋友，其實男友媽咪都有催佢哋結婚，想快啲抱孫，但BoBo四十幾歲人 仲好似大細路咁，完全冇planning，阿Rain試過幾次喺傳媒面前，講話想一兩年內結婚，但BoBo都仲係毫無表示，阿Rain點會唔心淡，佢覺得好冇安全感！既然睇唔到大家有將來，唔想再拖落去，咪提出分手！其實分手件事，對阿Rain都好傷，佢啲好姊妹同Rain媽都輪住陪佢，怕佢唔開心！」
過億富婆
自從2011年主演內地劇《回家的誘惑》爆紅，Rain已經是手持過億物業的富婆，現在不用靠男人，但阿Rain唔會因此女權至上，反而好遷就男友。據知情者透露：「阿Rain喺內地劇接劇好忙，BoBo喺上海搞裝修生意亦冇時停，兩個經常分隔兩地，見面時間少好難維繫，但阿Rain對男友好體貼，為咗爭取時間見面，有時喺內地拍劇，BoBo專登飛去探佢，阿Rain拍完劇就算幾攰，都一定會陪男友食飯行吓街，好珍惜呢段感情。」相反何遠恆反而唔識體諒女友。據知情者透露：「阿Rain好孝順，唔會只掛住拍拖，乜都要預埋阿爸阿媽，好似去旅行咁，佢好多時都帶埋爸爸媽媽一齊去，仲會諗邊啲地方啱佢哋玩，但BoBo就成日想二人世界，兩個因為咁嗌交，出到去旅行，又只顧陪阿Rain，唔識細心照顧埋老人家！」思想愈來愈多分歧，難怪李彩華要忍痛分手！
走出情傷 李彩華騷火辣身材
不過李彩華好快走出情傷，她去年上載咗兩張黑色性感泳衣相，雖然件泳衣係一件頭，但唔好以為係啲密實款式，泳衣低胸的設計令Rain嘅事業線一覽無遺，勁吸睛！心情靚靚嘅李彩華帶上大黑超，大擺性感甫士，索到爆嘅佢，睇到人噴哂鼻血，之後更喺相中嘟嘴賣萌，認真佻皮。
之前，李彩華上載咗一張飾物相，件飾物掛咗喺個電子屏幕隔離，並表示飾物是出於自己最近欣賞嘅設計師之手，但眼球就完全對焦唔到落件飾物到，皆因咁啱個螢幕顯示住一張Rain 著住一件同款的黑色泳衣，相中可見佢個頭微微向上望向天空，但重點就落咗喺佢深深嘅事業線上，真係睇到人心跳加速！
李彩華唔怕無人追
李彩華16歲入行，試過為父還過百萬欠債，被當時的經理人公司寰宇雪藏，捱過唔少辛酸日子，不過，11年憑內地劇《回家的誘惑》爆紅，身家不斷上漲之外，近年Rain個樣都再進化，愈變愈靚，顏值隨年齡增長反而有增無減，真係唔怕無人追～
走紅不久，阿Rain曝光漸少，難得蒲頭身型暴瘦精神亢奮，面目全非。
