37歲依然仙氣十足！黃翠如 毋懼素顏
撰文：東方新地 圖片：新傳媒圖片、TVB節目截圖、蕭正楠、黃翠如Instagram
37歲黃翠如 毋懼素顏
當日翠如一個人自駕去大角咀宣明會，疑似要取文件。不施脂粉、長髮飄飄咁，落車過馬路時帶著甜笑、小心翼翼留意來往車輛，然後一陣風咁辦完正經事又再開車走人。
翠如泊好車後回頭確定鎖好車門才離開，非常謹慎。
即將奔四嘅翠如依然baby face ，攞住疊白紙喺手又輕輕撥吓吹散咗嘅頭髮，好有文青大學生氣質囉！
黃翠如同蕭正楠拍拖多年依然甜蜜，其實翠如BB同Edwin 自2014年五月公開戀情後，至今已經拍拖三年！兩人戀情一直十分高調，有如糖痴豆。不論鏡頭前後都可現二人甜蜜蹤影！
其實佢哋嘅戀情萌芽於拍攝《師奶MADAM》之時！翠如喺「定情劇」中飾演由千金小姐變做屋邨師奶的女卧底，而蕭正楠就飾演翠如嘅兒時夢中情人，與翠如扮演夫妻，一同查案。劇中二人有情人終成眷屬，由假夫妻變成真夫妻，而喺現實生活中，Edwin都一樣係翠如BB嘅Mr. Right！個個都Like爆佢哋，二人仲多次一齊奪得 熒幕情侶獎添！
黃翠如37歲生日會
黃翠如早前37歲生日，男朋友蕭正楠就大搞咗一個全男班嘅生日會同女友翠如BB慶祝，包括曹永廉、楊潮凱、區永權、袁偉豪等都有到場為壽星女祝賀，認真夠哂熱鬧！
各位猛男仲大合唱咗首生日歌送俾壽星女，有男朋友同成班型男齊齊為自己唱歌，成功氹得翠如BB勁開心！
個個男士都落力為壽星女唱生日歌，絕對唔係兒戲了事！
蕭正楠送蘋果蛋糕
有咁多人同翠如BB慶祝生日，生日蛋糕又點止得一個呀？踏正12點，壽星女就捧出第一個生日蛋糕。其後，男友蕭正楠再捧出一個巨型蘋果蛋糕！
蕭正楠送嘅呢個巨型大蛋糕造型非常特別，猶如無重量限制咁掛喺樹上，唔講都唔知原來係一個真正食得嘅蛋糕！
蘋果樹蛋糕暗藏浪漫含意
不過原來蕭正楠之所以揀蘋果樹蛋糕，原來係源自於二人嘅定情劇《師奶Madam》，當時黃翠如於劇中飾演花蘋，而蕭正楠就飾演羅大樹。
因此，今次蕭正楠送心型大樹裡有一個大蘋果嘅生日蛋糕，明顯係想表達羅大樹一直深愛住花蘋！果然好有心思之餘，仲好浪漫！
黃翠如更喺個人社交網開心留言：「謝謝蕭一，為我準備了一個全男班的生日飯，一班男人的約會，總覺得我也是男人的一分子。謝謝各位俊男，祝黃二我生日快樂。」，睇嚟壽星女今年生日應該好難忘啦！
《美女廚房》蕭正楠黃翠如 放閃光彈唔使錢！
蕭正楠同黃翠如打情罵俏打到上《美女廚房》，眾人梗係要食吓花生、抽吓水啦！點知不敵閃光彈，張振朗淨係企喺一邊都頂唔順，開口講笑話自己都係出返去先啦！
其中一幕，廚房門一打開，黃翠如攞住菜刀質問眾人：「你哋邊一個踩我！」，吳卓羲立即指向蕭正楠：「佢（蕭正楠）話身材好過你。」
黃翠如即刻回應：「除衫！睇你係咪好過我！」，點知，抵死嘅蕭正楠神回：「你知㗎！」真係閃到冇人有啊！！！
蕭正楠 公開盛讚
讚還讚，成集蕭正楠讚黃翠如冇停過口，連女友切幾片薑都讚！
梗係搞到全場嘩然！
想做100分男友嘅命運係咁㗎喇！
深情對望
黃翠如喺第一輪嘅菜式獲得除咗蕭正楠以外嘅人嘅一致負評，但阿蕭喺翠如深情嘅目光下，竟然講得出：「其實好甜！」然後再Chok爆回望翠如，真係唔使加Effect到感覺到佢哋有幾Sweet啦！
愛情來了的《美女廚房》
試食咗少少，蕭正楠Man咁爆咗一句：「無人欣賞你，我欣賞你。」再嗱嗱塞哂翠如煮嘅餸落口，哇，真係感動全場！
蕭正楠真情流露黃翠如眼泛淚光
能夠搵到個願意煮飯俾自己食嘅女人，係幾咁幸福！難怪全場都係咁起哄叫佢哋快啲注冊結婚！
「結婚！結婚！結婚！」
相信唔少粉絲都非常希望佢兩個快啲「有情人終成眷屬」，唔知幾時會聽到佢哋嘅好消息呢？
【美女廚房】「蕭黃」閃爆美女廚房蕭正楠同黃翠如打情罵俏打到上美女廚房！一句「無人欣賞你，我欣賞你」，哇真係感動全場啦！搞到翠如都眼濕濕！ 小編都好想快啲見到佢哋有情人終成眷屬啊！#美女廚房 #cookingbeauties #蕭正楠 #黃翠如 #美女廚房爆笑精選即刻上 big big channel 睇 「蕭黃」閃爆美女廚房立即下載 big big channel 追蹤啦！iOS 版本：https://goo.gl/mKdpgYAndroid版本: https://goo.gl/koAb9o
Posted by TVB on Saturday, 18 August 2018
蕭正楠成滿分男友4大原因｜生活離不開「魚」
其實，Edwin係點成為一個100分好男友，可能係因為以下原因！作為藝人當然會不時飛到外地工作，蕭正楠之前要同曹永廉、胡定欣及姚子羚到外地拍攝《兄弟姊妹去旅行》，離開香港一段時間。
Edwin臨出發前更向網民呼籲：「記得幫我餵魚」，而「魚」就是黃翠如嘅花名，未出發就已經掛住女友，可想而知Edwin對翠如嘅思念係滔滔不絕！
就算只係啱啱飛到外地，但個心就依然留咗喺香港，喺IG不時留言「反而有少少思鄉病！我現在是面向香港嗎？」、「我要飛返香港」等，表現出急不及待回港嘅心情，當然原因亦只有一個，就是掛住女友黃翠如！
｜常與女友大講情話
早前黃翠如37歲生日，翠如爆出兩人之間嘅親暱稱號，就是「蕭一」同「黃二」！就算男方名叫「蕭一」，聽落似係個老大，但就對黃翠如呢位「黃二」於生活上非常貼心。
二人不時就會喺個人社交網隔空留言，Edwin更唔介意喺廣大網民前大講情話，例如：「尋人啟事，好重酬！」、「whenever the fish are, that’s where we go.」等情深說話，氹得女友非常開心！
｜愛屋及烏
黃翠如屋企養咗一隻細細隻又好可愛嘅松鼠狗，叫黃小六。蕭正楠不但愛錫黃翠如，有時間亦會幫忙照顧小六，喺Edwin個IG度就不時會出現佢照顧小六及同小六玩嘅相。
Edwin曾經Post出與小六「一家三口」嘅合照，望落就儼如一對恩愛夫妻！
｜經常稱讚女友
Edwin耐唔耐都會喺個人社交網留言大讚女友，女仔就當然鍾意俾人讚，特別係俾自己男朋友，所以翠如聽到自己男朋友讚自己就梗係會開心啦！
