陸永6歲大囡諗法成個老積鬼 媽咪都答唔到呀女問題！
陸永6歲大囡諗法成個老積鬼
日前，陸永太太Reina喺個人社交網上載同大女Hannah嘅合照，仲留言話：「我問Hannah點解日日喺學校做功課，小息唔去玩，佢話『你imagine下放學返到屋企唔駛（使）做功課，可以玩又得，睇電視又得，係幾Free……』」。
媽咪都答唔到呀女問題
聽到囡囡咁問看己，Reina亦不禁續指：「最近接放學，一上到車就會問我『媽咪，我諗唔到返到屋企可以玩咩？』做曬（晒）功課嘅煩惱」，即係簡單暗示要出街玩，睇嚟陸永大女都真係幾醒目喎！
細女勁玩瑜珈
除咗大女Hannah，Reina都有上載細女陸一心（SimSim）嘅搞怪短片，片中見到SimSim用手摸自己隻就快甩嘅牙仔，之後轉頭就見佢食嘢，但最估唔到嘅係佢突然做拱橋，認真夠難以捉摸！
延伸閱讀：
陸永老婆嬲到震刪Post爆鬧老公
話說，喺娛圈出名係「愛妻號」之一嘅陸永喺上個月老婆Reina生日時就獅子開大口，應承對方會去學車同報埋名學影相，當時氹到Reina鬼咁開心，以為老公真係會言出必行！
愛妻號變成「呃妻號」！
點知陸永之後竟然喺活動上就話「都係交吓功課先」，簡單嚟講就係氹住老婆先，結果陸永開嘅呢張「空頭支票」，搞到Reina日前喺個人社交網嬲到爆Seed鬧爆陸永指「以後大時大節咪再送禮物」，隔住個Mon都感覺到陣火藥味！
Reina上載咗張灰底黑字圖，字𥚃行間睇得出其心灰意冷，加上一大堆嘅hashtag「嘥錢學車做乜都唔係為咗pass係為咗畀張收據我睇」、「簡單啲直接啲好」、「我識得自己安排」，睇嚟陸永今次都有排煩！
最後Reina喺留言度話代老公送份禮物畀自己就係去西藏，仲叫佢留喺屋企湊女！冇幾耐，陸永都知衰，即刻喺個post度留言：「暫時不作回應，等我考到個車牌再拎住部相機自拍一張俾（畀）你」，試圖冧番老婆！
不過兩公婆床頭打交床尾和，Reina似乎好似已經下咗啖氣，皆因佢終於再上載兩公婆參加生日會嘅合照！話咁快，兩個人就耍完花槍！
陸永趁老婆生日送貼心禮物
10月10日係陸永太太Reina個生日，佢就喺Instagram晒出老公送的生日禮物，並冧爆咁話：「從來未收過咁sweet 嘅生日禮物！」隨即一眾網友大直呼：「好甜！」、「甜到漏！」，仲被一眾網友封為「最幸福人妻」。
究竟「愛妻號」陸永送咗咩貼心禮物令老婆咁感動？之前見陸永成日有老婆接送，原來陸永一直唔識揸車唯有依賴老婆。今次老婆生日陸永就鼓起勇氣送驚喜：「日日見你咁頻撲，好攰好眼瞓，想幫輕下你又無能為力，所以鼓起勇氣去學揸車！」
除咗去揸車，陸永買咗部相機幫屋企三位「少女」留下美好回憶，「老婆，你講得啱，我係應該幫你同兩個女影多啲見得人嘅相，所以我買咗部相機報埋個攝影班！」真係Sweet到爆呀！
陸永 5 歲細女做捧場王 網民：「老竇跟阿女學嘢啦！」
陸永日前在 IG 上載一條細女 Simsim 聞歌起舞的短片，片中 年僅5歲的Simsim 聽住爸爸的新歌，好有節奏咁興奮熱舞，不少網民大讚她非常有天份，紛紛留言：「SIM真係表演能力極強」、「點解個 groove 可以咁襯」、「老竇學嘢啦！」
其實Simsim平時已經非常有表演欲，鐘意跳舞之餘，仲好鍾意自己琢磨演技，甚至指導父母配合。看來SimSim真的遺傳晒爸爸的藝術細胞！
陸永夫婦結婚7周年紀念 老婆大覺瞓唔睬佢？
農夫成員陸永近年多得Do姐提攜，人氣急升，拍劇、拍戲、主持、廣告瓣瓣掂，陸永同時係娛樂圈出名的愛妻號，與老婆Reina婚前婚後都非常恩愛，仲生咗兩個好可愛的囡囡Hannah同Simsim，不時在網上晒家庭樂，羨煞旁人！
真係「七年之癢」？
成日聽人話「七年之癢」，捱唔捱得過其實都係視乎情侶或者兩公婆的造化，尤其係你生活喺多姿多采的娛樂圈中！不過陸永同Reina應該冇問題啦，日前佢哋兩公婆結婚七周年紀念，陸永就準備好大束紅玫瑰氹老婆，但相中見到Reina大覺瞓，完全冇理會陸永，用背脊「得」住佢，搞咩先？
陸永感言多謝老婆
之後陸永留言解釋番，仲多謝老婆：「今朝一早佢車個女返學，跟住接放學，再車第二個女返學，再接放學，再車返屋企煮晚飯畀佢哋食……我收工返嚟，佢已經攰到瞓死咗了，辛苦你了。結婚七周年快樂，我愛你。」
到Reina第二朝起身，佢都即時喺網上補番靚相，留言多謝陸永：「陪我一齊早起湊女，陪我一齊食早餐，陪我hea住打機等女放學，就算冇花我都覺得好浪漫… 」
延伸閱讀：
陸永外父欠債走數
陸永與老婆Reina及一對女兒一心、一穎非常幸福，不過其實背後都有唔少辛酸，尤其去年特別多事發生！因為陸永裝修工程的外父欠債纍纍兼走數，連累Reina被人上門追債滋擾！
陸太Reina被滋擾愁爆
日前陸永不在港，陸太Reina獨自揸車送囡囡返學，被問到老竇走數連累佢不停畀人追債滋擾一事，Reina顯得相當緊張：「係呀！」問到個數目多少？Reina皺眉話：「已經幫佢（指父親）唔到！」之後就急急腳上車離開。事實上，Reina父母早年離婚， Reina跟父親關係疏離，至近年父親向Reina表示開設裝修材料公司，因為生意周轉唔到要借錢應急，而據知陸永覺得嗰個始終係外父，所以最後都有借錢，但估唔到會沒完沒了！
美容院退股避滋擾
去年陸永打本給太太與友人合資開設美容院，將裝修工程交給外父負責，完成裝修後更已經找清所有款項，惟美容院正式營業時，不時有工人及其他人上門追數，令Reina情緒非常低落。據知陸永勸太太退股離開美容院，雖然突然退股損失咗一筆錢，又會影響到朋友，錢冇咗可以再賺過，又唔使再被騷擾。
陸永：太太瞓唔到覺
以為退股一了百了，直至最近再有另一班債主，去騷擾陸永太太已退股的美容院，陸永外父欠債纍纍才爆煲！身在外地的陸永電話回覆本刊記者：「佢哋不停打電話去太太已經退股的美容院要搵我太太出嚟，甚至搵埋我出嚟！」陸永直指外父債項是無底深潭，已經令陸永夫婦無法處理，陸永現最擔心係太太心情受影響，太太更因終日擔憂而失眠！
發聲明斷絕關係
心情大受影響的陸太，上月中就忍痛發聲明同父親斷絕關係。Reina在聲明中表明立場：「有關陳X X 及駿星材料工程有限公司對外之一切行為及金錢糾紛，一概與本人無關！若任何人就上述之事宜，或因本人丈夫之身份，而向本人作出任何要脅、騷擾或纏擾之行為，本人必將報警處理。」其實Reina就曾在lG亦試過嬲到留言發洩：「 希望爸爸似返個人！」據知陳爸爸在外邊早有第二頭住家，卻不理大堆債項影響女兒，幸好這段艱難時間，Reina有個顧家又負責嘅好老公陪她並肩作戰。
