性博士又上身？ 馮盈盈上《美女廚房》自爆：「我條脷好叻㗎！」
撰文：東方新地 ｜圖片：美女廚房截圖
馮盈盈上《美女廚房》性博士上身
前港姐冠軍馮盈盈（Crystal）喺J2節目《#後生仔傾下偈》入面經常有出位言論，故有「性博士」同「粗口港姐」之稱。《美女廚房》就請嚟幾位曾經上過去被封為「地獄廚神」嘅藝人上去一雪前恥。今次玩法有啲唔同，評判廚師Jacques蒙眼同時指引三人做三道不同菜式。
一開始馮盈盈觀察食材時就聞一聞紅酒，話：「真係紅酒嚟㗎！」
評判之一嘅詹瑞文聽完之後不禁問FYY咩叫Bordeaux？仲糾正佢嘅讀音。
FYY知道自己講錯英文，就笑言指自己啱啱打完Botox(肉毒桿菌），塊面比較緊，所以讀唔到個音，氹得一班評判好開心。
其後去到第二個環節，每個「地獄廚神」旁邊都有屏幕用非中文語言顯示1-10項烹煮步驟，「地獄廚神」要做到司儀或評判所要求嘅指令先可以將其中一項變成中文。
叻哥叫FYY求其唸一首唐詩嚟聽下，就將韓文轉到中文。
FYY唸出李白《靜夜詩》，不過4句共20個字入面有3個字都有懶音，搞到戲劇大師詹Sir都忍唔住話佢兩句。
唸完唐詩後詹Sir畀多次機會FYY：「我哋唔睇你口音係咪準確，睇你夠唔夠口齒伶俐就算喇！」原來詹Sir係想考FYY講急口令「黐線蜘蛛啲蜘蛛絲黐住支樹枝」。
FYY成功講急口令後獲評判大讚，呢個時候FYY就話：「我條脷好叻㗎！」雖然佢係講緊自己口齒伶俐，不過讚自己條脷好叻令觀眾覺得佢突然性博士上身。
馮盈盈爆熱戀期夜晚好攰
《後生仔傾吓偈》曾有一集以「熱戀期」為主題，討論吓熱戀期有幾長、有咩特徵等，馮盈盈依舊意見多多，仲話「熱戀期夜晚好攰」，雖然佢好快就解釋係因為夜晚要傾電話所以好攰，不過大家明盈盈想講咩啦！
盛裝出席、瑜伽招數……
之後大家又講吓情侶過咗熱戀期後會有咩特徵，馮盈盈又嚟料，不假思索寫下「夜晚好空閒」，因為自己同男朋友夜晚都唔係太有心去做運動！之後盈盈回想熱戀期時，「運動」時會準備好多「道具」或者「盛裝」出席，仲誇張到「會睇小說參考入面的情節，瑜伽招數都會使出」喂唔怪得夜晚咁攰啦！
怕男朋友搵其他人做運動
馮盈盈表示，與男朋友熱戀時自己仲係學生，夜晚大把精力做運動，就算對方第二朝要返工都唔放過佢！盈盈就解釋點解咁Chur，係因為擔心男朋友會出去搵其他人做運動，所以要用盡對方啲Quota……
獲點名拍安全套廣告
講開做運動，馮盈盈曾性感現身《2019無綫節目巡禮》，當時佢率直敢言的個性獲得好多觀眾甚至廣告商的青睞，現場有廣告客戶點名想搵佢拍安全套和女性健康飲品廣告！
馮盈盈大爆自己似日本女優！
之前《後生仔傾下計》曾探討「成人影片」話題，馮盈盈當然「性博士」上身，當一眾後生仔講到伴侶性慾較強該如何解決，馮盈盈即以食飯作比喻，即話如果對方食完唔夠飽，就畀佢自行解決！
隨即就有後生仔提出，此舉咪相等於畀機會對方出外偷食，但「性博士」就立馬否認，並解釋指若然對方明明食得唔夠飽，但仍然會選擇自行填肚，都唔搵其他廚師，咁就係對方愛自己嘅表現。
馮盈盈自爆似AV女優
曾發表「港姐公廁論」
另一集中，陸浩明提到做女人的好處，其中一個就係嫁入豪門會俾人話係「做少奶奶」、等，相反男仔就會俾人話入贅、「食軟飯」。點知港姐出身的馮盈盈同麥明詩就搶住大叫，表示如果港姐嫁有錢人， 就會俾人話「睇死佢鈞金龜」、「係雞」等難聽說話…… 認真陰功！
咁都仲未夠，馮盈盈仲突然補多一句：「公廁！」自己身為港姐冠軍，竟然將呢啲網絡用語拉埋同港姐嚟講，佢都算係「神奇 頂級 超卓」～
「大胸」波波有話兒
講完港姐嫁入豪門，之後眾人講到女仔「大胸」係其中一個優勢，不過就容易因為負膽重而令肩膊疲累，呢個時候當然要問到全場身材最好的「波波」黃凱儀，波波承認係會被內衣勒到有痕，肩膊累之餘仲好容易寒背。呢個時候麥明詩大爆之前同波波去日本時，原來兩人詳談過縮胸手術…… 睇嚟冇方面煩惱的麥明詩，都好為波波著想喎！
正常係C Cup？
最後眾人又討論到「作為有優勢嘅女仔，覺得大胸定長腿好？」當在場大部分女仔都話揀長腿時，馮盈盈竟然好大聲爆出一句：「大胸！」則麥明詩諗一諗後都係揀「大胸」，但就補充胸唔需要好大，正正常常有C (Cup) 就OK。
馮盈盈：個標準有啲高！
點知馮盈盈聽完驚訝地「吓！」咗一聲，「所以話正常係C，個標準有啲高！」如果C Cup先叫正常，可能盈盈同好多比較瘦削的香港女仔都唔正常，叫人情何以堪…… 講到呢度，麥明詩又再拖波波落水：「我意思係正常大，而唔係嗰啲又F又H，唔使好似波波嗰啲咁！ 」
唔著底褲行紅地氈第一人
每年台慶，大家最關注都係一眾女星喺紅地氈上鬥靚鬥性感，而今年全場最性感就一定非馮盈盈莫屬，條裙側邊睇落完全真空，噴血程度冠絕眾女藝人！馮盈盈仲透露為咗美感同線條，連條底褲都除咗，堅係全真空！
同淘寶「小姐」服裝撞樣？
其實馮盈盈之前都預告過台慶會隆重其事，條裙係由以色列運到港，仲係一個大品牌，「好多人爭呢條裙！」不過有網民就喺淘寶網發現咗類似款式的裙，介紹仲話係「酒店夜總會小姐工作服」……
經典台慶環節
馮盈盈台慶搶盡風頭，其中一集《＃後生仔傾吓偈》中，眾人以「經典台慶環節」為主題，陸浩明表示好記得馬國明於台慶表演跳舞踩琴鍵，仲特登企起身扮馬明跳舞；而麥明詩就話肥姐沈殿霞於《歡樂滿東華》的踩雞蛋環節最令人深刻！
經典節目Cap圖 馮盈盈最記得姜大衛……
之後眾人又討論一啲近年網絡最常出現的經典截圖，6號第一時間話最正一定係「講呢啲」！
而馮盈盈就話自己最記得John哥姜大衛曾經喺一部古裝劇中，有一場戲係教訓自己徒弟，吊起對方並講咗句：「你唔明白，就吊到你明白為止！」盈盈啲口味，大家都了解啦！
