梁潔華抗血癌七年 器官衰竭離世終年59歲 黃日華傷心痛哭

撰文：東方新地｜圖片：東方新地、新傳媒資料庫、Instagram

黃日華太太梁潔華在13年患上血癌，夫婦同心力抗癌魔，梁潔華接受化療後逐漸康復，黃日華不時拖住太太恩愛現身。不過近半年梁潔華未有再公開露面，有傳她舊病復發，黃日華為陪太太出入醫院，停工之餘亦絕跡球場。18年本刊記者拍得梁潔華行動緩慢，因為治療後甩頭髮，用絲巾包頭再戴帽，還戴上雙重口罩包到冚不想見人。華哥亦顯得非常憔悴，向來報喜不報憂的他，默默苦撐照顧愛妻，是絕世好男人的典範。

1988年 黃日華與太太婚前同拍劇集

黃日華太太梁潔華曾合作拍劇，除了80年《上海灘龍虎鬥》外，88年梁潔華同黃日華婚前，終於喺清裝劇《太平天國》再次一齊拍劇，但兩人並非演夫婦或情侶。

拉埋天窗
1988年黃日華同梁潔華拉埋天窗手牽手走入人生另一階段，惜劉德華同苗僑偉因趕戲嚟唔到飲。

溫柔體貼好老公 24小時貼身照顧太太

黃日華外表看似硬漢，但對住太太梁潔華卻是個溫柔體貼的好老公，2013年底梁潔華發現患上急性血癌，華哥給予太太信心和正能量，面對繁重工作又要廿四小時貼身照顧太太，治療過程艱辛，但夫婦同心安然度過。2015年梁潔華宣布戰勝血癌，不過打後五年就是康復觀察期，近年華哥不時拖住梁潔華公開露面，分享力抗血癌的經過。

前年傳梁潔華舊病復發

五年的觀察期未過，前年再有傳梁潔華舊病復發不時進出醫院，黃芷晴其後出席公開活動時否認，她說：「媽咪每星期會進行一至兩次定期檢查，因為佢嘅抵抗力較常人低，容易發燒感冒，所以依家冇嘢做喺屋企休息。」華哥回應太太情况時表示梁潔華的指數升了需要觀察，但沒有大礙。

報喜不報憂 搬家抗病避見熟人

雖然黃氏父女都否認傳聞，但事實上近年已不見梁潔華公開露面，熱愛粵劇藝術的她早前離奇缺席兩場有份搞的粵劇表演。就算是師傅文千歲為自傳舉行發布會，都是只由華哥代表出席。據知華哥向來報喜不報憂，佢寧願自己辛苦完，等太太真係好番晒先至出嚟講。聽聞最近佢哋都冇再住大埔比華利山別墅，因為嗰度依家好多藝人住，所以搬咗去另一個低密度屋苑，環境清靜啲等太太可以好好休養。

梁潔華再治療甩頭髮 黃日華苦撐照顧愛妻

18年本刊見到華哥車載梁潔華離開大埔寓所外出，到達市中心的新達廣場停車場泊好車後，本刊記者上前採訪，梁潔華即時擰轉身背向鏡頭，而華哥說到太太的健康問題就顯得有點緊張。

當時梁潔華除了行路緩慢要華哥全程拖住扶實，其手指及腳踝都有水腫情況出現，更清楚可見到她的後尾枕已沒有頭髮，用絲巾包住整個頭，再戴上黑色漁伕帽，為了外出保密功夫做到足。

入商場時，可看到梁潔華明顯比打勝仗時瘦，而且行得很吃力，要把所有力集中在華哥的身上，而華哥亦即時為太太拎住手袋。

化療甩頭髮爆喊

還記得18年初，華哥與女兒黃芷晴接受訪問，在短片中大談梁潔華接受五次化療後出現的副作用，他說：「化療後最大嘅反應就係甩頭髮，我太太好貪靚，第 一次做化療後兩星期佢開始甩頭髮，係撥一撥就甩晒嗰種，佢傷心到大喊，後來佢就用絲巾包住自己個頭，到做晒所有化療，我哋一家人都冇見過佢光頭個樣。」

2018年嫁女沖喜

據知患病後的梁潔華，最大心願是能夠健健康康見證女兒幸福嫁人。18年9月芷晴為父親慶生時，只在IG上載兩父女合照，未見母親梁潔華影蹤，而最近放上穿婚紗的照片，即被指恨嫁，據知梁潔華一早買定晒嫁妝，不過之前華哥唔係太接受個女咁早嫁人，但佢知老婆心意，所以最近都軟化咗想屋企辦喜事沖喜一下。

老竇開綠燈 惜分手收場

黃芷晴當時與前圈外男友Jimmy Fung拍拖兩年，有傳華哥早年對女兒戀情甚為反對，不過自梁潔華患病後，華哥知道太太想睇到女兒早日出嫁，他亦開始軟化。早前黃芷晴自爆母親曾send金器嫁妝照片給她，似有所暗示，不過其後二人分手，始終未能在梁潔華在生時出看著女兒出嫁。

當時還在拍拖的黃芷晴穿上婚紗行騷，對於婚期，她笑說：「睇番男仔喇，都未求婚，希望自己都可以睇定婚紗。」當記者笑稱黃日華已為嫁女開綠燈，芷晴笑說：「咁順攤？咁就好，唔會擔心，佢哋畀嘅自由度都好大。」

梁潔華仍在治療中，芷晴趁中秋節與家人做節，帶埋當時已談婚論嫁的前男友Byran，不過最後分手收場。