仔女睇得又讀得！盤點13位學霸星二代
編輯：東方新地 │原文：Sunday Kiss│ 圖片：新傳媒圖片、梁芷珊Fb專頁、湯君慈、湯君耀IG、TVB、龔慈恩微博、林愷鈴IG、何猷君、何超盈IG、陳伶俐Fb 、網上圖片
星二代梁芷珊囡囡 生日送厚禮畀媽咪
8月30 號係梁芷珊囡囡羅樂桐Eily16歲嘅生日，但係媽咪未同個女慶祝，囡囡就先送上厚禮！皆因Eily今年考IGCSE（即係類似香港當年嘅會考），考獲11A嘅佳績！梁芷珊為囡囡感到高興之餘，亦都覺得好安慰！
即刻同羅生報喜
知道成績後，梁芷珊都有即刻同羅生報喜，恭喜佢「我哋再一次不勞而穫！」有呢個講法，係因為佢哋從來冇Push過個女去做任何嘢。梁芷珊話，「值得開心既係，我終於可以用事實來證明，小朋友讀書學習係唔駛迫既，開心快樂成長最緊要，絕對唔駛報十間幼稚園，唔駛補習，唔駛學芭蕾舞，唔需要學七國語言。」
青梅竹馬好友係IB狀元
同日，Eily同一個由細玩到大嘅男仔朋友一齊慶祝，因為呢個朋友仔，今年考IB考到45分滿分，係今年嘅IB狀元！
湯鎮業三個仔女都係UCLA高材生
阿Bruce同阿Chris，仲有家姐湯愛嘉，都係湯鎮業第一任妻子姜坤所生，三個都遺傳咗父母嘅靚人基因，而且讀書都好叻，三個都係讀美國著名大學加州大學洛杉磯分校（University of California, Los Angeles, UCLA），阿Bruce同阿Chris仲一齊主修社會經濟學，副修電影。
湯鎮業對三人能考上名校感到驕傲，「我好注重佢哋學業，你知啦，花咁多錢捱到佢哋咁大，都係希望佢哋讀到好學校，我成日問大女，兩個細佬考成點？但個女覺得我好煩，做老竇就係咁喇，好緊張學業。」
孖仔大學係讀世界著名學府，中學時代，喺香港一樣係讀名校㗎！兩個都喺位於赤柱嘅百年傳統名校-聖士提反書院畢業！
林愷鈴差4分做IB狀元
龔慈恩囡囡林愷鈴(Ashley)就讀中西區直資名校聖保羅男女中學，校內既有本地DSE課程，亦有通行全球嘅IBDP（國際預科文憑），而Ashley就係選讀IB課程嘅。
今年香港學生嘅IB成績好好！全球IB考生有163,511人，平均分為29.78分，合格率為有7成7，而全球考獲滿分45分嘅狀元就有186人，而香港佔其中兩成，共有38名IB狀元！
Ashley雖然唔喺狀元之列，但係亦都考到41分，相當高分數呀！
嚟緊9月，Ashley就會入讀香港大學建築系，呢個係佢嘅首選學科嚟㗎！
之前Ashley都有諗過去外國讀書，不過又想入行發展，而且又入到港大，所以就打消咗呢個念頭！
Ashley仲話，媽咪一向對佢學業冇咩要求，完全放手， 甚至喺佢考試嗰陣，仲成日拉佢出去玩添！
入大學，大個女喇！仙氣滲出嚟～
葉玉卿大女 考到6個獎學金
一代性感女神葉玉卿息影嫁人後，過住超豪少奶奶生活，老公胡兆明係美國超市大王，婚後先後生咗大女胡芷欣、次子胡可聰及幼子胡以聰，一直專心相夫教子嘅葉玉卿，年過50都Keep得好好，而且三個仔女讀書都超叻，大女胡芷欣除咗盡得媽咪好身材而受注目外，其實讀書都好叻！
舊年高中畢業之後，就攞到6個獎學金，升讀名牌大學Union College（美國聯合學院）。
媽咪當年係性感女神，芷欣一樣都從不吝嗇喺ig 上晒身材。
三點式泳衣極常見。
芷欣高中嗰陣喺紐約讀私立貴族學校，連校園活動都好華麗。
二仔胡可聰今年16歲，講到讀書成績就比家姐更叻，更勤力！而家已經有晒全盤計劃，要考入長春藤大學，即係好似哈佛、耶魯、普林斯頓呢個級數嘅頂級名校！
至於細仔14歲嘅胡以聰，葉玉卿就話過佢係三個仔女中，最聰明嘅一個，讀咗咁耐書，只係試過兩次考試低於80分，相信佢將來絕對可以叻過家姐同哥哥！
賭王千金何超欣係數學天才
賭王何鴻燊不止一次公開讚佢同四太梁安琪所生孻女何超欣，賭王話呢個女「靚到不得了」！時光飛逝，超欣而家都19歲，亭亭玉立，生性文靜低調，不過講到讀書就係不得了，超欣同哥哥何猷君一樣都係學霸一名，難怪深得父母寵愛！
四太梁安琪講過過，希望超欣喺冇傳媒壓力下成長，所以超欣自細就好低調，就算同屋企人出席活動，都有媽媽、家姐阿哥睇到實。自細一向品學兼優嘅超欣，小學就讀灣仔區傳統名校瑪利曼小學，除咗讀書叻，亦都好有運動細胞，小學已經喺學界田徑場上盡顯鋒芒，小三被選為「最有潛質運動員」。
四房全家福，（左一）為二哥猷亨，（中）三哥猷君，（右）為大家姐超盈。
超欣12歲就去咗英國讀寄宿學校, 所以自細就好獨立，識得自己照顧自己。
喺英國讀咗6年書，早前考GCSE考到9個A*，數學更加攞滿分。
本來劍橋已經收咗佢喇，不過超欣就想轉換吓環境，於是就跟阿哥去美國繼續升學。
而家超欣已經入讀美國麻省理工大學（MIT），仲做埋中國留學生會會長，認真叻叻豬！
最近超欣仲代表MIT去參加同哈佛(Harvard)、耶魯(Yale)、普林斯頓(Princeton)同史丹福(Stanford)共5間名牌大學搞嘅五校同舟會學生組織，仲成為呢個組織嘅主席。
媽咪以前係跳舞老師，跳舞對超欣嚟講，又點會有難度！
譚曉風21歲碩士畢業
譚詠麟囝囝譚曉風啱啱係牛津大學Engineering Science（工程科學）碩士畢業，譚詠麟罕有地喺微博post出囝囝嘅背影，而且笑得非常開心！現年只有21歲嘅譚曉風年紀輕輕已經碩士畢業，果然係優質星二代 ！
最年輕入MIT讀金融碩士
賭王何鴻燊與四太梁安琪兒子何猷君喺麻省理工大學（MIT）畢業，自細係數學天才嘅何猷君只係用咗三年時間就讀完四年嘅課程。上年只有21歲嘅何猷君仲成為咗史上最年輕進入MIT攻讀金融碩士嘅學生添！
黃愷傑北京電影學院碩士
趙雅芝細仔黃愷傑擁有美國南加州大學經濟系同北京電影學院碩士畢業嘅學歷！從小已經對演藝事業很有興趣嘅黃愷傑而家已經進入咗娛樂圈，專心拍戲。
陳伶俐晒大仔DSE成績 感謝兒子支持再婚
港姐出身、現年41歲的陳伶俐與前夫林敏驄育有兩個囝囝林肯(Lincoln)和林善(Yohji)，2008年兩人宣布離婚後各自各精彩，陳伶俐於2012年再婚下嫁新加坡富豪老公劉頌銘，並於2014為對方誕下一子。
長子Lincoln現於香港大學修讀工商管理學學士(lBGM)，就在兒子19歲生日當日，陳伶俐在FB大晒兒子DSE成績單，見佢全部科目都考獲5*或以上，成績好好，見囝囝咁懂事又係高材生，陳伶俐當然好放心！佢仲寫下給兒子的信，提到當年只得22歲嘅佢未婚懷孕，伶俐話要為自己嘅「任性」負責任，排除萬難把Lincoln帶來這個世上，而離婚後，懂事的Lincoln又鼓勵陳伶俐去拍拖，希望媽媽得到幸福。伶俐在信中講明以後都會全力支持仔仔，又叫佢好好享受大學生活。
眼見囝囝咁生性，陳伶俐好安慰，喺社交網寫下一封感人嘅信俾兒子，仲話好感謝上天送給她「這對寶貝仔」，內容相當感人⋯⋯
給Lincoln的信：
多謝乖仔你，很有心思和努力地…在2017年～我40歲～送了一份很大很大的禮物給我！還對我説：「媽咪，我好想為你做點事…..」我真的感到欣慰…更感動得…流下淚來…（放心，這是開心的淚）
19年前的今天…剛到22歲的我，不理世俗眼光…義無反顧…排除患難，堅決地把你帶來這裡…跟自己説：「要為自己的任性，負上一世責任！一定要好好把你養育成人！」就是這份任性，所以更努力工作…更拼命去生存～靠自己的一雙手，要做好母親的職責！
2010年，你鼓勵我去拍拖，跟我說：「找個男人好好錫你，倍下你去旅行玩下，都成33歳啦！成日做嘢都沒有認真去玩下…..」原來，11歳的你…知道我那廿幾歲的生活瑣碎事……
2012年，我問你：「阿仔，點算好？有人竟然向我求婚…. 」你興奮地説：「梗係結啦！」但我答：「我怕…更怕失去你們…我會內疚的…」你搶著説：「到時我們成家立室，得你自己一個人，我們仲內疚啦！」
説到這裡……涙…今次是感觸感恩的涙…真的要多謝上天送給我「這對寶貝仔」～我的幸福快樂是你們送給我的❤️
今天，你就19歲了！媽咪真的好高興～高興的是你的懂事和生性，令我想起…那些過去…苦與樂…一切一切都是值得的！
多謝你陪我過渡那些年…那些事…！❤️
祝你生日快樂！身體健康！繼續享受你的大學生活～他日你想做什麼，我都一定會全力支持你的！
你也要好好享受和珍惜你的時光！
再一次多謝你…是你…成就了今天的我！
～乖仔Lincoln ～
永遠愛你的媽咪😘
陳伶俐 再婚嫁得好
陳伶俐於12年下嫁新加坡富豪劉頌銘，做咗幸福少奶奶依然唔願停，繼兩年前開畫廊，近日再掟千萬開餐廳。14年為老公誕下金叵羅，加埋同林敏驄之前所生的兩名兒子，已是三子之母的她，可心急追多個女？劉太陳伶俐接受本刊記者訪問時，坦言已經放棄這個諗法：「我40歲之前就好心急，但依家41歲，驚自己兼顧唔到，順其自然啦！」老公是新加坡隱形富豪胡嘉烈後人，家族顯赫，最重要奶奶思想開通，從來冇催促，得到夫家上下厚愛，伶俐可以事業家庭兩兼顧！
陳伶俐 愈忙愈有魄力
陳伶俐的富豪老公劉頌銘是新加坡人，近日她就孖老公在銅鑼灣開設新加坡餐廳，將當地美食砂煲田雞粥引入香港。繼兩年前開設畫廊，近日進軍飲食界，三子之母陳伶俐卻不嫌辛苦：「我鍾意做嘢，愈忙愈有魄力！加上自己過咗40歲，諗法唔同咗，唔想再嘥時間，想做自己鍾意又有滿足感嘅嘢！」
萬千寵愛
陳伶俐坦言現階段可以專注自己興趣創業，除了多謝老公大力支持，亦多得大仔二仔成就她的夢想。「我託賴幾開心，囝囝好獨立好生性，成就咗媽咪去做自己鍾意嘅嘢，的確係幾感動，佢哋好似好朋友咁，有時又似男朋友咁去關心我，無論有乜開心唔開心，佢哋都會同我傾，加上佢哋好懂性，可能知道我好早做媽咪，以前有好多夢想未實現，所以佢哋好Backup我呢個年紀做番自己鍾意嘅嘢。」
大仔街頭表演
19歲大兒子林肯現於香港大學修讀工商管理學學士(lBGM)，讀書叻外還有表演天份。陳伶俐一提兒子就滔滔不絕：「佢唱歌真係幾好，我都畀好多朋友聽過，不過佢好低調，唔想我講，佢怕見咗報，會影響佢嘅社交圈子，但我好開心，原來佢聖誕嘅時候，去咗尖沙咀街頭表演，最緊要佢做自己開心嘅嘢，我又唔會迫佢，只要唔好做壞事，唔好傷害人，佢做咩我都會支持佢！」陳伶俐表示三個兒子相處融洽：「雖然大嗰兩個仔，同細仔年紀都有段距離，但佢哋好鍾意同細佬玩，細仔就最幸福，係人都鍾意，萬千寵愛！」
