【嫁到這世界邊端2】獨力養活失業瑞典老公12年毛毛：我唔會計較佢係咪使我錢

【嫁到這世界邊端2】港女毛毛獨力養活瑞典失業老公12年

港女毛毛24歲時同前夫離婚，當時已經有一個小朋友嘅佢就成為單親媽媽。佢仲話嗰陣都有啲港男追佢，不過一聽到佢結過婚又有小朋友嘅時候，個個都耍手又檸頭，急急腳咁走啊!

喺一次偶然嘅機會，毛毛喺網上認識到瑞曲老公Johan，最難得嘅係同佢同齡嘅Johan完全唔介意毛毛嘅過去。

Johan喺大學讀設計，而毛毛得中三學歷做Sales，英文麻麻，所以毛毛就知道兩個人條路會好難行。不過好彩嘅係，Johan嘅媽媽知道毛毛嘅過去，不單無抗拒之餘，仲話呢啲女仔夠成熟，非常好！叫阿仔快啲去搵佢添。

Johan把心一橫將自己喺瑞典嘅物業賣咗，拎住廿萬旅費去香港搵毛毛，不過旅費好快就使晒，兩個人又唔想異地戀，所以毛毛為咗幫Johan拎簽證就決定裸婚。因為兩人經濟結据，無擺喜酒之餘就連婚戒都係毛毛自己買。

雖然老公讀設計，但係喺香港搵足四年工都無公司請。二人生活就緊係要有錢去維生，所以大大小小嘅支出都係由毛毛畀，而且毛毛又要養爸爸、小朋友仲要養埋Johan，不過毛毛亦都無埋怨同計較。

老公Johan都有試過自己開公司接單，不過收入非常唔穩定，結咗婚12年，都只係靠毛毛獨力支撐住屋企。而毛毛都唔想老公無面，所以唔同人講，身邊嘅朋友一直都以為毛毛係幸福少奶奶，而老公嘅朋友更加覺得係毛毛學歷低，外表又唔係特別好，襯唔起佢老公喎！

講到呢到，毛毛都忍唔住喊出嚟。咁又難怪嘅，自己一個人打工賺錢養老公足足12年，外界人唔知道之餘仲要話佢根本襯唔起佢老公，真係聽到都心痛又無奈。

陳貝兒問到Joahn：「毛毛出去做嘢咁辛苦，你有無感動啊？」而Johan就話：「唔淨係感動，我覺得好羞愧添！佢要去賺錢，做嘢做得咁辛苦，我又無太多貢獻。我當時真係唔太成熟，係佢令我變成更好嘅人。」

不過好彩嘅係，Johan最終都得到一間瑞典設計公司聘請，兩個人就由香港飛返瑞典定居，供養佢，畀佢做幸福少奶奶。回想起兩個人當年結婚時無影過結婚相，所以今次《嫁到》製作單位仲帶咗套婚紗過去送畀毛毛，幫佢哋補返輯婚紗相，場面非常感人。

喺節目嘅最後仲送上一段非常感動嘅情節。

有網民就關心毛毛個囡而家嘅情況，而陳貝兒都喺Instagram交代咗：囡囡其實已經20幾歲，係一位教師，有自己嘅職業同埋自己嘅生活，拍緊拖，好開心。毛毛一年幾前離開香港移居瑞典嘅時候都有問過囡囡嘅意向，囡囡唔捨得香港嘅朋友同份工，所以選擇留喺香港，為媽媽送上無限嘅祝福，鼓勵媽媽繼續勇敢去愛。

關鍵詞