愛妻號啟航陳奕迅陪徐濠縈潮玩水

事隔三年出新碟《L.O.V.E》、仲話係以廣東歌為主，咁大件事絕對係歌迷喜訊亦都令 Eason忙不停。繼六月在台灣第三度獲得金曲歌王，Eason就周圍飛宣傳新碟，兩個星期內連走台北、廣州同北京開新歌試聽會，又宣布下月在中環摩天輪舉行慈善演唱會。計劃多、時間少，不過只要有心一樣抽到空陪愛妻，上周一（24日），本刊記者在大埔野生捕獲 Eason陪老婆阿徐落水玩wakesurf，同行仲有wakesurf高手Kevin Boy親身教學，同陪住阿徐一齊做初學者嘅閨密杜如風。

白皮豬與肯亞徐

是日中午時分，一行人已經從海中心回程上岸，分別沖身、換衫準備回家。原來呢個暑假娛樂圈個個潮玩wakesurf，阿徐又唔執輸跟風學埋一份，自稱BB班學得神心凌晨五點就起身仲勤力過返工，難怪下午已經玩飽。平時日日跑步有肯亞徐之稱，阿徐黑黑實實身型鋼條，同換衫時唔覺意露出肥肥白白又有個車胎嘅Eason形成強烈對比。睇得出，跑完一轉宣傳，Eason近月應該係第一次落水陪老婆，白皮豬抓住夏天尾巴才趕得切曬一曬日光。身形唔夠fit、滑水BB班又如何，最緊要有心陪老婆就得啦！

不嬲有鋪長跑癮，本來已經鋼條身形嘅阿徐今個暑假再曬咗一身健康膚色，上岸時突然少女心自己出手護住招牌ipad胸。

雖然近日Eason 終於聽老婆話決心減肥，算係瘦咗一個圈，不過全身仲係白雪雪肥騰騰，同志仍需努力呀！

兩公婆拍拖玩咗成朝，直到中午一點多終於玩飽，齊齊換衫沖身出城醫肚。

今個暑假徐濠縈同閨密杜如風齊齊搵Kevin仔學 wakesurf，兩個都自稱BB班學員又自爆勤力過返工。當日杜如風仲開機在IG直播，不過就有默契鏡頭避開Eason。

玩完一個暑假身形清減不少，杜如風仍然自嘲太肥，竟然玩 wakesurf 玩到爆埋褲。

今期流行

今期流行Wakesurf，圈中人個個玩亦都個個知碇隊超班高手Kevin Boy陪玩指點，其實作為潮流教母，阿徐今次跟風算跟得遲。
何超蓮、小花

許志安

容祖兒

蔡思貝

徐濠縈做全職阿媽

邊個話Eason嫂徐濠縈淨係識遊山玩水花錢買衫㗎？十四年來Eason走南闖北忙搵食，康堤順利入女拔又品學兼優，絕對係媽媽徐濠縈功勞。一年一度又開學，暑假最後一個周末，本刊就發現廿四孝媽媽親自帶住囡囡去眼鏡舖配眼鏡準備開學。買完眼鏡，兩母女隨意站在街邊雞啄唔斷，眨吓眼就快14歲的康堤已經高過媽媽，兩母女話題多多，好感情到兩姊妹一樣！

雖然陳家有女初長成，不過在Eason同阿徐心目中，康堤始終年紀細仲需要悉心照顧，日前Eason接受訪問，表示雖然自己在英國留學長大，不過就未捨得送康堤離家；至於阿徐，對女兒的學業生活到交友，一樣緊張管到實，知情者透露：「康堤愈大，阿徐愈係覺得個女有個簡單正常童年最緊要，所以社交網絡一定唔會晒女正面相，偷拍個女彈琴都係得背影。康堤喺學校真係好受歡迎，唔關佢爸爸係邊個事，因為佢讀書叻、性格好、識彈琴唱歌早已係學校風頭躉、唔少師姐師妹都係佢fans。阿徐好緊張康堤交朋友，尤其呢個年紀好易受同輩影響，想佢作風低調啲又怕佢影響學業，所以近年花多咗時間箝實個女，下個月佢間舖執埋，佢就全副精神放番喺個女度，做全職阿媽。」康堤正值少女期，睇實啲都啱嘅！