【後生仔傾吓偈】粗口偕音都出街 新加入KOL子碩出口誤！
撰文：東方新地｜圖片：電視截圖、Instagram
《後生仔傾吓偈》加入新血
眾所周知，《後生仔傾吓偈》每集嘅節目話題都由馮盈盈、麥明詩和陸浩明三位主持人帶起，而一向以盈盈同麥明詩呢兩位港姐嘅言論最出位而成功引起觀眾們嘅注意！
不過，心水清嘅節目組深明觀眾都會有睇到悶嘅一日，因而最近就為節目加新嘅四位KOL後生仔，希望可以為節目帶嚟新鮮感同新火花！
《後生仔傾吓偈》粗口偕音都出街
近日播出新一集的《後》中，就有兩位後生仔嘅言論同樣出位，佢哋就係Kelvin同子碩，兩位都係大學生，後者仲係個台灣人。
呢兩位男生就去到香港其中一個小小美食天地，葵涌廣場，即葵廣。Kelvin就向嚟自台灣嘅子碩簡單介紹一下個商場，除咗有女生最愛嘅行街shopping外，同時亦有唔同嘅小食鋪頭俾大家盡情掃食！
新加入KOL子碩出口誤
二人去到一間小食舖頭時，子碩就好好奇餐牌上寫住嘅「冚家餐」！對於子碩呢位台灣人嚟講，要講純正嘅廣東話相信唔易，結果佢一讀出「冚家餐」三個字就即刻變成咗粗口偕音！
然而，TVB冇將子碩讀唔正嘅呢三個字剪走，相反照樣將呢段播出街，而字幕就將「冚家餐」改成「全家餐」，明顯字幕組認為原本嗰三個字係唔適合出街。不過正因為咁，就成功為節目製造出多一個話題！
新任後生仔KOL逐個睇
《後生仔傾吓偈》除咗睇兩位港姐冠軍麥明詩、馮盈盈狂爆出位言論，一班大學生KOL同樣各有粉絲，好似身材逼爆的波波、搞笑的阿楓、兩姊妹都咁靚女的大細孖寶君及寶珊等。
而喺最近集數中，節目就多咗四位後生仔新血，兩男兩女，依家一齊認識佢哋啦！
｜劉子碩 (小碩)
劉子碩外號小碩，今年只係20歲，係唯一來自台灣的大學生，畢業於新北市私立莊敬高級工業家事職業學校，修讀表演藝術科文憑。小碩年青俊朗就唔使講啦，一口半咸淡廣東話特別可愛，有望成為新男神！
小碩三年前17歲時，曾經上過台灣綜藝節目《SUPER STAR 我要當歌手 》，唱得都唔錯㗎！
｜李嘉豪(Alston)
第二位後生仔李嘉豪(Alston)，今年只係20歲不過外表夠晒成熟，最爆係Alston喺節目中應主持要求即場剃鬚，仲係用麥明詩私人珍藏的剃鬚刀！Alston就讀於理工大學紡織及製衣學系，睇佢IG啲相似乎都幾有藝術氣質！
｜鄧伊程(Tiffany)
呢位笑得咁豪邁的女孩子係鄧伊程(Tiffany)，有著高佻身材及一身健康膚色，一睇就知佢係運動健將！原來Tiffany中學時期已經係名校拔萃女書院的田徑健將，跳高、100米跨欄及接力等都有優異成積，喺學界有「楊文蔚師妹」之稱！
｜羅詠怡(Kosa)
最後到細細粒的羅詠怡(Kosa)，樣子甜美、笑容夠燦爛，畢業於浸會大學視覺藝術系的Kosa社交網站夠晒精彩，有唔少三點式泳衣照大晒身材，男網民們必follow！順帶一提，Kosa原來係應屆港姐冠軍陳曉華的好朋友～
Kosa IG仲有唔少網民至愛睇的泳衣照，大家慢慢欣賞～
Kosa係應屆港姐冠軍陳曉華的好朋友，決賽當晚佢都有到場見證好友奪冠～
