【延禧攻略】嫻皇后爆高峰 佘詩曼半年生金半億
撰文：東方新地｜圖片：新傳媒圖片、微博、Instagram
佘詩曼 六部宮廷劇吼實
相隔十三年再演清裝劇《延禧攻略》，雖然唔係主角，不過佘詩曼就憑超班演技贏盡民心，一夜間嫻妃紅遍中港兩地，工作不斷撲埋身，唔止內地劇集爭搶阿佘演出想延續嫻妃氣勢，就連人氣綜藝節目、真人騷都一樣要叨娘娘風頭。兩年前阿佘成立工作室，今年再簽約古天樂旗下，後台強勁，近半個月阿佘帶同自己御用工作團隊，由西安拍到去長沙，為亮相六大內地電視台的中秋晚會錄影，直至日前終於返到香港，聯同劇中令妃吳𧫴言為《延禧攻略》宣傳。據知情者透露：「嫻妃娘娘嘅氣勢真係好勁，呢一個月就有成幾十個Job撲埋嚟搵阿佘做，只要喺活動露吓面酬勞已經過百萬，就連真人騷都傾緊佢！」
繼無綫劇《金枝慾孽》後再演奸妃，阿佘將劇中由忠變奸的嫻妃娘娘演得淋漓盡致，近一個月已經有超過十部內地電視 劇及電影吼實阿佘神級演出，當中更有六部是宮廷劇，之前有傳阿佘拍《延禧攻略》只收二百萬酬勞，但大熱嫻妃身價十級跳，據悉現時阿佘劇價已接近二千萬一部，據知情者透露：「阿佘喺呢行成廿年，真係乜嘢大場面都見過晒，雖然依家啲價畀到好癲，但佢明白錢搵唔晒，依家佢唔會乜嘢都接，特別係拍劇，佢好謹慎揀劇本，就算依家有成六部宮廷劇搵佢，佢反而想演一啲未做過嘅戲路，因為一拍劇佢就瞓晒身，所以佢都唔心急，想放鬆吓先！其實以前拍《宮心計》同《公主嫁到》，佢就因為日日戴住好重嘅頭飾，搞到頸椎出問題，條頸唔舒服咗好耐，所以佢再接《延禧攻略》，佢考慮咗好耐，最後都係因為劇本太吸引先打動到佢！」今時今日話晒佘詩曼身家以億計，當然唔係單憑錢可以打動佢！
連環上內地綜藝
單係今個中秋節，阿佘就亮相了湖南衛視、北京衛視、東方衛視、陝西衛視、鳳凰衛視、央視的中秋晚會，成為人氣皇后。
內地收視破百億的《延禧攻略》，氣勢一時無兩，八月中，一眾演員就挾《延》劇聲勢率先上內地人氣綜藝節目《快樂大本營》。阿佘與富察皇后秦嵐並排而坐，更在節目內開金口演唱《下一站天后》。
皇后駕到
嫻妃娘娘紅遍中港兩地，內地綜藝節目爭搶嫻妃亮相，近半個月，阿佘就帶住自己御用工作團隊，由西安拍到去長沙，為三個內地中秋晚會錄影。
賺到笑
《延禧攻略》帶挈佘詩曼人氣急升，瞬間紅遍中港的她，工作排山倒海，保守估計半年已吸金超過半億。
