41歲陳展鵬宣布迎娶28歲單文柔：我要結婚啦！
撰文：東方新地
41歲陳展鵬宣布迎娶28歲單文柔
41歲視帝陳展鵬、與28歲落選港姐單文柔去年三月爆出戀情，其後一直都將戀情低調處理，不過今日煎Pang宣布拉埋天窗啦！
陳展鵬致各傳媒友好：「各位親愛的傳媒朋友、各位好友，多謝大家一直對我的支持和包容。今日，好高興同大家宣布，我要結婚啦！一路以來，我都全情投入工作，直至Phoebe的出現，讓我們感受到幸福和信任。對於感情方面比較傳統的我，是時候用我最大的努力去建立一個美滿的家。多謝大家的關心，希望得到你們的祝福。」
前文提要：
胡定欣 懵然不知被消費
胡定欣入行十九年，每次拍拖都不過三年，兩年前與音樂人陳明道分手後，她邊搏殺邊找尋Mr. Right，與陳展鵬拍《城寨英雄》時過從甚密，曾被影過在將軍澳電視城飯堂撐枱腳，人前人後打情罵俏，之後再拍《同盟》仍然keep住道熱情，正當全世界都以為二人有機發展時，陳展鵬卻被斷正媾掂16年港姐單文柔，並反轉豬肚與胡定欣劃清界線：「我從來冇同胡定欣拍拖。」胡定欣如夢初醒hurt到震。
據知情者透露：「定欣對人好真，拍劇時煎Pang對佢好好，佢亦覺得呢個男仔唔差可以觀望吓，之後一齊拎視后視帝，大家都認定佢哋係一對，煎Pang從來冇提過有其他目標，每次出活動同出騷，佢都交足戲畀晒男友feel，咁定欣亦好自然投入咗感情，點知轉頭煎Pang畀人影到同單文柔一齊，定欣先知道自己一直被消費，佢班好姊妹都睇唔過眼，叫佢以後同煎Pang劃清界線，無謂再益佢。好多監製都知定欣唔想同煎Pang再合作拍劇，但出去登台出event嗰啲，唔使日對夜對一次性嘅，定欣睇錢份上會照做。」故早前《城寨》及《同盟》的監製文偉鴻想再原班人馬開新劇《曼谷唐人街》，最後演員名單有陳展鵬、姚子羚、陳山聰及伍允龍等，獨缺胡定欣，眾演員將會打到去泰國曼谷，一齊出埠當然好玩，據知胡定欣因不欲與鵬同行而激罕推劇。
取消關注IG不相往來
處事冷靜EQ甚高的胡定欣，8月初被發現靜悄悄地取消關注陳展鵬的IG，在胡定欣IG三百多名「追蹤名單」中已找不到陳展鵬的賬戶，而陳展鵬IG亦都冇關注胡定欣，好明顯雙方再見不是朋友，以後亦不需在IG假扮友好。知情者透露：「單文柔未出現，煎Pang不停po同定欣拍劇時嘅親密劇照上IG，又話女方係佢嘅靈感女神，當時仲成日放合照tag埋對方嘅IG賬戶不停留言放閃，之後煎Pang公開同單文柔拍拖，唔知係被迫定自動洗底，煎Pang刪除咗好多同定欣嘅po。既然大家以後不相往來，定欣直頭取消關注煎Pang，乾淨利落。」
做得出唔怕認，胡定欣在本刊今期的專訪中，亦大方回應取消陳展鵬IG一事，她說：「唔需要解釋，我會覺得係好個人嘅一件事，取消或者關注唔代表啲乜嘢嘅，我可能有一日成個account都delete咗佢呢，哈哈哈哈哈！我覺得唔需要放大去睇囉！唔代表私底下我哋兩個唔會講嘢、唔係同事。」陳展鵬曾被影過做柴可夫車胡定欣開工，放工又車對方入西貢食糖水，仲孖住睇演唱會。由攬頭攬頸好拍檔淪為胡定欣口中所指的同事，陳展鵬被極速降呢。
離巢外闖好時機
無綫內有眼中釘，此地亦不宜久留，兩度奪視后的胡定欣現在有名有利，4月拍完《包青天再起風雲》便開始休假，雖然唔接劇，但她一樣冇停過，先與馬浚偉合演舞台劇《偶然‧徐志摩》，之後馬不停蹄出埠登台，最近又忙為處女電影《逆流大叔》宣傳，首次進軍影壇與舞台劇界的她，頓感外面世界之大，更加令她萌生約滿離巢外闖之意。據知胡定欣與無綫仍有約兩年約，近年電視台花旦不是結婚就生仔，留低拍劇的一線花旦已所剩無幾，胡定欣最近在電影與舞台劇方面都表現出色，37歲的她見自己在外有市有價，亦決定約滿後與無綫換個合作方式，很可能一年只拍一劇，不再受到合約束縛，做自己想做的事。
這幾年為無綫劇接劇，胡定欣辛勞過後都想放慢腳步，今年下半年度她決定一套劇都唔接，只拍旅遊特輯與好姊妹飲飲食食，至於被指與細六年的張振朗暗撻，雖然雙雙否認戀情，但胡定欣冇落閘，不止一次公開讚張振朗係好男仔。經過煎Pang一役，相信胡定欣以後會更加帶眼識人，劣質煎Pang不要也罷，慢慢揀隻優質股仲好啦！
去中環扮靚
最近休假的胡定欣素顏現身中環，到髮型屋扮靚，泊好車後她邊行邊接受本刊記者訪問，有問必答的她心情非常好。
胡定欣表示翌日要返國內登台，整完頭便駕車返家休息。
轉戰影壇
由胡定欣擔正做女一的電影《逆流大叔》票房衝破600萬，贏盡口碑，吳鎮宇揚言要再搵胡定欣開拍《逆流大嬸》，靠實力令事業攀上頂峰，胡定欣開到口話好想拍電影，分分鐘學佘詩曼、胡杏兒和楊怡等離巢搵真銀。
今日再一次岀席<逆流大叔>的謝票活動，能夠親身感受觀眾的現場反應，聽到佢地睇得開心，鍾意部電影，支持香港電影，真心開心! 亦都開心知道<逆流大叔>票房係一直上升，都係多得大家對呢部電影口碑，同媒體的關注! 希望票房繼續有好成績!💪🏽💪🏽💪🏽: @menonthedragon @sunnyhahaha_chan #逆流大叔 #menonthedragon
Nancy Wu 胡定欣（@nwuuu）分享的貼文 於張貼
芳心寂寞
事業得意愛情失意的胡定欣，早前為舞台劇綵排時對鏡自拍，夜闌人靜抒發孤寂等愛之情：「戲內戲外都是孤寂的⋯⋯」
盛傳姊弟戀
胡定欣與張振朗被傳因合作拍新劇《包青天再起風雲》擦出火花，發展相差6歲的姊弟戀。事緣張振朗7月20日生日，晒出「展昭」造型蛋糕，負責製作的蛋糕師正是胡定欣好友，有指是她專誠訂製蛋糕送男方驚喜。將於9月9日生日的胡定欣，日前亦收到同款蛋糕。
二人先去橫店再去新彊，連拍50日外景日對夜對，張振朗與胡定欣更是形影不離，飾演「展昭」的張振朗為氹胡定欣，不時主動撩玩自拍，而胡定欣亦玩得好開心，好受落。
前文提要：
芒實陳展鵬 單文柔向胡定欣示威
無綫筍盤所剩無幾，陳展鵬出名孝順、好戲兼錢途無限，最重要是未婚，自然多人吼，最後落在27歲落選港姐 單文柔 手上。處理感情事如活在上世紀年代的煎pang為保事業，打死唔認戀情，死撐山頂夜會是傾公事。 單文柔 表面配合將戀情低調，卻為鵬嫂名份頻頻發功，不但由本來跟煎pang夾口供以「了解中」形容二人關係，自行升呢「考慮中」，又自爆跟鵬媽有見面！
IG貼旅行照 疑似預支蜜月
日前單文柔貼出在蜜月勝地泰國閣骨島，穿上三點式享受陽光與海灘，同期陳展鵬未有更新社交網、亦未有貼出工作照，被指揸相機是煎pang，好有機會齊齊出埠預支蜜月。
後台不離身
早前無綫大晒冷宣傳Big Big Channel，煎pang同單文柔當晚冇任何表演要同台，大合照都隔成五行，煎pang被安排喺後台等做訪問，單文柔大部分時間都跟實煎pang，不但合體做娛樂新聞台訪問，又孖住玩直播，個樣好冧，煎pang就好唔自然，最後仲被邀一齊做訪問。據知煎pang有次在公開活動閃咗去冇同單文柔影相被指冇風度，為免再被人話，依家出席公司大型活動，記者要求佢哋合照、訪問，煎pang都只好照做，但把口依然唔肯認拍拖。
向定欣挑機高調分享閨房樂
男的為免被指冇風度，女的又黐到實，最後成就了世紀合體開live。陳展鵬和單文柔接受無綫娛樂獨家直播訪問時，同一時間原來定欣在後方做訪問。單文柔不但有問必答，更不時甜笑望實煎pang，期間煎pang一時忘形大講爛gag：「盧海鵬又係鵬，我又係叫鵬，要唔要盧海鵬試咪？everything all right。」氹得單文柔哈哈大笑，單文柔透露直播會整嘢食，主播隨即問煎pang試過對方手勢未，佢答非所問：「你啱啱考到牌，會唔會揸車出街？」然後笑指唔敢食，單文柔扁嘴話：「好唔畀面呀﹗」煎pang笑住話：「你(指女主播)揸車我可以出街，佢(指單文柔)煮嘢食我唔會開live。」忘形自爆閨房樂嘅煎pang，似乎自知忘我失言，突然一輪嘴話會用煎pan扑女主持個頭，企圖轉移話題，而單文柔笑得心花怒放，又一次挑機大成功。
昔日曖昧男女 今日生疏零交流
被踩到上心口的胡定欣，成晚悶悶不樂，當全體藝人上台時，更被安排跟煎pang排排企，昔日好朋友好拍檔如陌路，一個望左一個望右，全程零交流，定欣呆企在台中央，煎pang未有照顧昔日好朋友，反而捉住另一邊的唐詩詠吹水，令定欣更無癮。由好朋友變回生疏同事，據知早前煎pang成日營造同定欣係曖昧男女，又同記者講拍《同盟》時會把握機會進一步了解，又主動車定欣返工放工，又約去睇鄭秀文演唱會，連班姊妹都等煎pang進一步行動，突然爆出原來佢同單文柔拍緊拖，班姊妹都戥定欣唔抵被人借過橋冚住單戀情。
