方東昇再現GAG王本色《長命百二歲》爆笑金句回顧
廣告
無綫節目《長命百二歲》日前已經播放完畢，主播方東昇近年以搞笑又有資訊性嘅風格嚟主持節目，成為唔少觀眾心目中嘅金句王。今次都唔例外，《長命百二歲》以新思維探討人口老化，零距離接觸各地耆英。依家就趁機會嚟回顧吓GAG王今季嘅金句啦！
原文：對白CAP圖王 ｜ 圖片：節目截圖
方東昇有新拍檔
今次節目主持人有啲唔同，由方東昇、李德成同黃曉瑩嚟主持，而身為老前輩嘅李德成，唔知buy唔buy呢種主持方式呢？會唔會擦出新火花呢？
唔好以為淨係得方東昇識講金句，就連八叔李德成都識搞Gag！
1.「按照世衞標準，45歲或以上先係中年，所以我仲係大好青年。」
2.「慢慢嚟唔好急，我哋唔會催人，歲月先有資格催人。」
3. 黃曉瑩對李德成講：「你人生經驗咁豐富，食鹽多過我哋食米。」
李德成就答：「食得鹽多就要食藥㗎喇！」
4.「未必人人可以做明星，但只要努力，就有機會做精英。」
5.「見到你（李德成）就好似以前馬王『步步友』咁，『步步有力』呀。」
6.「室雅何需大，不過如果室又雅又大，可能仲好。」
7.「香港人講求唔好急，最緊要快，而台灣人就係「慢慢來，比較快（國語）。」
8.「人生七十古來稀，八叔一百都OK。」
9.「想食乜可以自己揀，所以食嘅都係開心樂園餐。」
10.「有髮不能不「執」，有請執「髮」部門。」
作為主持人就咁搞下Gag都未夠，反應力都好重要，轉數快人都醒目啲，就好似方東昇咁，有一集佢去探訪老人院時，負責人表示要老人家唔駛再用約束帶，俾佢地培養自主權，所以過去已燒毀幾千條約束帶。
方東昇第一個反應就係：「好像林則徐燒鴉片一樣。」
節目由三月開始播，一集只係得三分鐘左右，真係唔夠喉！好彩依家線上就有30分鐘版嘅合輯可以睇番～如果想重溫《長命百二歲》咁多集嘅內容，可以去無線新聞專頁度睇返。
