兩度中風 生活欷歔 李兆基：我依家係個廢物
廣告
「電影圈四大惡人」之一的李兆基 (基哥)，近年因為兩度中風，右邊身乏力，走路要長期撐柺杖，現時零工作零收入，連積蓄都幾乎耗盡，要靠人接濟。昔日一班曾經稱兄道弟的娛樂圈朋友亦冇再同佢聯絡，每日要慳住駛食茶餐醫肚。幸好依然有幾位義氣仔女如陳慎芝、麥家琪等向基哥提供協助，亦有善心街坊不時請佢食飯，希望基哥好好保重身體，將來有機會再次演出！
李兆基 曾兩度中風
李兆基在電影靠惡起家，當年同何家駒、成奎安、黃光亮被封為「電影圈四大惡人」，拍過一系列《古惑仔》電影廣為人識，早年更到內地登台搵銀。不過，近年基哥鮮有露面，原來自從兩年前先後兩次中風後，基哥行動不便要靠拐杖借力，以致不能工作。據知早前有人搵佢客串電影，但身體狀況實在唔容許佢拍戲，所以無奈推辭。
李兆基：我依家係個廢物
為咗慳錢，李兆基下午茶平價時段才出動醫肚，日前本刊拍得基哥撐住拐杖，步履蹣跚行去寓所附近茶記醫肚。基哥再接受本刊獨家專訪，提到唔少圈中人講過會幫佢，基哥稱好多人吹到天花龍鳳，但都係得個講字：「講啫！好多人都講，係唔係至得㗎！尤其依家係個廢物，搵你做咩？」另外又表示：「唔幫咪算囉！唔好搵我過橋，又話幫我！」
感激義氣仔女相助
雖然唔少圈中朋友都冇再聯絡，但義氣仔女總是有的！基哥表示曾獲「香港十大傑出青年」的陳慎芝、合作過電影的女星麥家琪，以及現時在北京工作的導演劉寶賢相助，在各方面都幫過佢好多好多，一切一切都係無言感激，盡在不言中！
善心街坊幫埋單
基哥現時租住的九龍城唐樓，月租要一萬蚊，但佢申請咗兩年仲未輪到公屋，全靠家人及一班社團兄弟幫補交租，更透露社署因此拒絕佢申請綜援！零收入支出大，生活要節衣縮食，可幸香港地善心人不少，基哥透露每次食飯都會有街坊幫忙埋單，佢一貫江湖氣概表示感激：「次次都有人幫我埋單！真係好多謝！」
曾是真正古惑仔
年過60的李兆基，年輕時曾是江湖中人，做過真正古惑仔。後被林嶺東導演帶入行拍《監獄風雲》，改邪歸正成功轉投現電影圈，活躍於80、90年代，拍過超過40部電影，大多飾演黑道兄弟，惡霸監躉角色，代表作是一系列古惑仔電影。另外基哥亦同周星馳合作多部電影《食神》丶《喜劇之王》及《算死草》等，令人印象深刻，基哥更曽做過編劇、導演。
