40歲陸浩明指2003沙士「香港係病毒源頭」爆喊致歉 網民推測：「錯到咁都唔剪走、明陰佢！」
圖文：東方新地、電視截圖
更新！陸浩明鏡頭前爆喊道歉
事件爆發後的星期一，陸浩明入廠錄影新節目，終於公開露面，他在記者面前鄭重道歉，並朗誦出沙士的正確史實，提到事件令媽咪擔心時，他就爆喊了：
2003年廿幾歲的陸浩明，終於能正確讀出「病毒源頭並非香港」，他表示要向大家深深致歉及講對唔住，並承諾自己處理節目內容會更加審慎，提到網民的強烈反應令到自己受狙擊，他表示自己兩晚都瞓唔著，事情更波及母親的情緒，說到這裡就忍唔哽咽並落淚。
事件起源：「香港係病毒源頭」
在最新一集《後生仔傾吓偈》，作為「老鬼」主持的陸浩明向在場後生仔憶述2003年沙士疫情，卻一開口就夾著脷，當眾表示 「因為嗰時香港係病毒源頭」，嚇得馮盈盈即場作出澄清，由於言論嚴重失誤，節目播出後即被網民截圖並於網上廣傳作出指控，更有人揚言抵制其代言產品⋯⋯
麥明詩完美示範「愈幫愈忙」
本身已經脫離《後生仔傾吓偈》主持陣容的麥明詩對此事竟然又有意見，在其中一個狙擊陸浩明的帖下面留言，表示「以我對6號嘅認識，佢係曲掛」⋯⋯語焉不詳，結果又被人恥笑：「豬隊友，個掛字可圈可點，唔知佢係想補刀定跣多佢一鑊？！」
陸浩明漏夜覆網民解釋愈講愈錯
面對群情洶湧，陸浩明似乎知道事關重大，頻頻修改面書置頂訊息，又試圖回應網民留言，可惜留言錯字甚多——「修正」寫做「收正」，「補充」寫作「保充」，被網民嘰笑「40歲人講句嘢都錯、字又唔識寫」，事發後的凌晨三點，陸浩明終於張貼了比較完整的一段「唔好意思」長文作回應：
「唔好意思」聲明 諉過於「好快轉咗Topic」
陸浩明的長文回應如下 ：
「各位, 真係唔好意思要講句sorry！我知道沙士源頭係來自廣州，大家截圖嘅一句，係因為當時我口快快講錯咗，
其實之後我都有喺節目入面修正源頭來自一個廣州嘅教授，之後Fyy（馮盈盈）都有補充，節目入面我哋亦有提及，但之後大家再討論一陣好快就已經轉咗topic。
令大家誤會係因為當時我嘅口誤，加上無即時做出適當嘅修正，令大家誤會，我再一次向大家講聲唔好意思🙏🏻
其實我意思是指沙士當年在香港”大型爆發”!!
我會自己罰抄1,00次 “sorry我説錯了”，希望大家可以原諒本人當日嘅口誤 」
陸浩明話會自己罰抄1,000次⋯⋯
網民回應： 「錯到咁都唔剪走、明陰佢！」
雖然《後生仔傾吓偈》節目主持經常口沒遮攔，但作為主持中的「老鬼」，陸浩今次的資訊錯誤明顯難以接受，網民討伐之餘，亦懷疑「點解唔剪走佢？」
其他網民回應包括：
- 成40歲人都仲當自己做「後生仔」
- 以後叫7號啦，唔好叫6號喇！
- 隻四眼蜥蜴從來以為自己懶風趣幽默㗎啦
- 未有呢件事，我都一直睇呢條_樣唔順超，食鯇魚食矇佢
- 跟得肥媽多係咁架啦
- 佢個節目名改錯咗，應該叫《戇_仔傾吓計》
- 成枱都係贊助Product，講嘢都可以咁唔小心，佢今年應該無運行咯⋯⋯
相關文章： 台慶冇獎海報冇樣 肥媽怒轟無綫
近年教煮餸節目大受歡迎，連續四年幫無綫主持《食平D》系列嘅 肥媽 ，節目每次出街例必爆紅。榮升收視福將的肥媽，早前更俾足面高層，重出江湖拍劇集《味想天開》，諗住幫下唔夠人用的無綫當捱吓義氣。點知肥媽原來一直被無綫搵笨，新劇戲份被喪cut又冇份宣傳，台慶「最佳節目主持」又冇份！自覺付出冇回報，肥媽同朋友爆粗狂呻，更怒推無綫的賀年節目，一於你不仁、我不義！
自從13年為無綫拍的飲食節目《搵食》大受歡迎後，肥媽每年都會主持《食平D》系列，深受一眾師奶觀眾歡迎。不過節目幾爆都冇用，肥媽同陸浩明呢對最佳拍檔，5年來從未攞過「最佳節目主持」，今年輸俾Do姐不特止，更三甲不入！
豬肉獎冇咗，就連去年出幫無綫拍的劇集《味想天開》，都被安排做新年檔炮灰。但更令肥媽谷氣的，是戲份被大幅删減，飾演波斯公主「何大莉」的肥媽被安排到第十集先出場。肥媽飾演的波斯公主本來戲份甚重，不過後來被cut剩少少，論搶鏡程度肯定不及由頭帶到尾的蔣志光、李國麟等配角。
捱義氣落得如斯田地，據知肥媽近日向朋友爆粗狂呻，狂轟無綫「搵佢笨X」！當初無綫搵肥媽教煮餸，肥媽二話不說就應承，之後節目收得不斷添食，肥媽都冇坐地起價。其實大家都知肥媽好多年冇拍過劇，今次佢諗住捱義氣幫手唱主題曲同拍劇，點知被人當老襯！
肥媽回應本刊時表示，最初只係負責唱《味想天開》的主題曲，但無綫希望佢可以演出，所以就捱義氣重出江湖。不過肥媽大呻拍攝時戲份又熱又焗，而且地點偏遠，長時間冇得去廁所，真係急到底褲都濕埋！現時半退休狀態的肥媽閒時登台閒時弄孫為樂，佢強調：「拍劇咪再搞我！」
