入廚學整餅 李澤楷女友郭嘉文嫌肥戒宵夜

撰文：東方新地

貼地女友郭嘉文

唔使做但又衣食無憂，相信係唔少人夢寐以求嘅心願，2015年港姐季軍郭嘉文（Karmen）就係幸運兒喇！同超級富豪李澤楷拍拖四年，呢位「楷女郎」雖獲贈過億豪宅，但佢依然過住貼地生活，打扮仲同一般後生女無異。

甜品愛好者

近月Karmen化身廚娘，喺IG見佢入廚學整甜品，佢話自己最近愛上整甜品，唔止呀！佢仲周圍食好嘢，有pancake啦！All day breakfast啦！喺屋企又食日式燒肉，咁有食力，真係有潛質做美食KOL。不過咁，Karmen同所有女仔都一樣，為食又驚肥，三日唔埋就嗌肥咗好多要自我克制，明明著住小背心牛仔熱褲，條小蠻腰仲好搶眼，佢都話要戒宵夜。其實女仔有啲肉地男人先鍾意㗎！一個唔覺意減到冇晒身材，太瘦骨杉杉咪仲衰。

選港姐攞唔到冠軍唔緊要，最緊要好似15年季軍郭嘉文咁條命生得好，入行後在無綫《東張西望》做個主持仔，一個唔覺意畀李澤楷睇中，時來運到唔使捱，生活無憂乖乖做小小超女友。郭嘉文升呢後依舊貼地，與她相識於港姐時的林凱恩仲友誼長存，兩姊妹keep住密密見，郭嘉文更為林凱恩終身幸福著緊，經常帶住閨密在身邊，躋身上流社會，搵機會介紹筍盤畀林凱恩識。李澤楷身邊友人非富則貴，有郭嘉文出力拉紅線，林凱恩要釣金龜就要把握機會喇！

撰文、圖片：東方新地

林凱恩為李澤楷女友郭嘉文好閨密

由平凡的《東張西望》主持變身李澤楷女友，郭嘉文當然有其過人之處，聽教聽話為人純樸低調就是她的優點，身為其閨密的林凱恩，當年選港姐奪得《友誼小姐》，從此與郭嘉文有影皆雙，二人同年加入無綫互相扶持，即使郭嘉文華麗轉身成為李澤楷身邊人，亦無損她們的感情，日見夜見情如姊妹，去年李澤楷拖郭嘉文現身馬場首次確認關係，林凱恩亦陪伴左右。

擴大社交圈子郭嘉文幫手拉紅線

林凱恩在無綫機會不斷，17年加入處境劇《愛‧回家之開心速遞》飾演「譚育英（Bonnie）」一角漸為人所認識，同年於台慶劇集《降魔的》內飾演「張佩玲」也獲網民讚賞，去年更於《她她她的少女時代》中飾演要角「張晴」，表現再次受到注目，更憑此角色提名《萬千星輝頒獎典禮2019 》「最佳女配角」及「飛躍進步女藝員」。默默耕耘向上爬的同時，其實林凱恩亦等緊她的Mr.Right出現，據知情者透露，「 Iris(林凱恩 )事業心較重，佢好鍾意演戲，不過眼見 Karmen(郭嘉文 )做咗小小超女友好幸福，佢都想搵個膊頭挨吓。Karmen見好姊妹同阮政峰甩拖後一直冇拖拍，dry成咁，成日搵機會介紹啲朋友佢識，每逢小小超有咩社交聚會，如果可以帶埋 Iris都會預埋佢，主要都係想擴大佢個社交圈，等佢識多啲筍盤睇吓有冇機會發展。」

早前本刊記者於銅鑼灣時代廣場見到郭嘉文與林凱恩行完街，由司機接送直抵李澤楷位於石澳的大宅，當日林凱恩身穿黑色上衣碎花裙，與好姊妹郭嘉文一樣薄施脂粉，看來想有樣學樣，走清純乖巧路線，希望能遇上一段童話般的姻緣。正所謂近朱者赤，林凱恩有郭嘉文射住，隨時釣到金龜。