黎耀祥談離無綫北上發展：國內劇好進步
撰文：東方新地｜圖片：新傳媒圖片庫、黎耀祥IG
黎耀祥：《逆緣》組合吸引
離巢前最後一部劇集《逆緣》有29點收視，問黎耀祥覺得吸引力喺邊度？係題材新鮮？佢表示：「個吸引力反而係個組合。題材新鮮，但我哋唔係好著重研究咩冷凍人⋯⋯只不過佢帶出三代嘅關係。除咗冷凍阿爺係後生仔，John哥(姜大衞)同我嘅關係其實都係一個吸引力，John哥好少做呢啲騎騎呢呢縮骨老竇，呃我錢、搵我笨，呢啲趣味永遠都得㗎嘛，小市民一定鍾意，再加上我呢啲小人物，岳母又勢利，大家睇見會覺得我岳母都係咁，呢啲大家都會鍾意睇。」
加人工就必然
問佢離開無綫後，仲會繼續返無綫拍劇？黎耀祥答：「傾落公司又實在對我太好，幾好嘅條件去挽留，加人工就必然，加上自由度好高，一年拍一部，如果無時間，仲可以延後拍，我覺得大家合作嘅關係咁耐，同埋我成日覺得我有今日嘅成績要多謝TVB，亦都要多謝香港嘅觀眾，我成日收到好多feedback，香港觀眾好鍾意睇我做戲，有劇上，大家好似好開心、好投入去睇，我覺得呢個係我自己好大嘅成就。」
「我成日覺得一個人嘅成就唔係淨係計物質同錢，而係好似為你自己嘅地方嘅人做咗啲嘢。呢個職業嘅貢獻好大，呢樣嘢冇其他行業或者電視台可以做到嘅一個功能，諗嚟諗去，好冇走？自由啲、轉變吓，諗嚟諗去都係發覺唔好完全唔拍TVB，所以決定簽一年拍一部，其實依家嘅合作形式好多，你見林文龍又返嚟拍兩部，三哥(苗僑偉)間唔中返嚟拍一部，簽唔簽約我覺得唔係好重點嘅問題。」
國內劇寫人物更細緻
講到依家有合拍劇，亦都有4K，演技上係咪更加要再提升？黎耀祥表示：「其實係㗎，不進則退，尤其演出，因為演出好具備時代嘅感覺，唔係守死一個理論或者方法，近年我都開始睇國內嘅劇，我覺得國內嘅劇進步咗好多，同埋佢哋喺寫人物方面嘅細緻度高過香港，因為佢哋有足夠嘅時間去寫個劇本，有足夠嘅時間拍攝，有足夠嘅時間畀演員演繹。」
「大陸劇集數亦冇定，三十八集、四十二集、五十六集都有，唔同香港規限咗，二十集、每集四十分鐘，演多咗都係剪，呢個係好大嘅問題，點解韓劇、日劇咁好？因為冇集數限制，演員真係可以去啄磨，做得好啲。」係咪會投放多啲時間喺國內？黎耀祥笑言：「會㗎！因為無論年紀、家庭狀況、經濟都係可以畀自己去嘗試。經濟壓力唔係好大，個仔又去咗美國讀書，又啱啱約滿，可以重新傾過個條件，係重新鋪排以後路向好好嘅時機。」
