陸詩韻8萬月租匡湖居 180度海景屋大公開

撰文：東方新地｜圖片：新傳媒圖片庫、陸詩韻IG

陸詩韻打風驚餐死

近年做美容生意的陸詩韻(Sharon)，接受本刊訪問時，透露自己原居於尖沙嘴嘉文花園，但人多車多，令她精神常處緊張狀態，陸父特別走到人車稀少，環山抱海的西貢，以8萬元月租匡湖居全幢180度海景屋，讓Sharon和細佬，以及其玩具貴婦犬Kina有個舒適安樂窩，Sharon說入到間屋第一個感覺係：「乜咁大嘅⋯」

2,000呎屋以落地玻璃窗將海景、陽光引入屋內，空間感大增，室內仿如與大自然相接，Sharon說就連個人思維也清晰很多。「人就係咁犯賤，之前做藝人他他條條出活動就有錢賺，但做咗生意後，先發現有好多嘢要處理和解決，所以女人真係唔需要太叻，因為遲早要嫁人，未搬之前我每晚都掛住公司嘢，根本瞓唔好，個人變得煩躁，好小事就令我發好大脾氣，但搬咗嚟呢間屋之後，可能日日對住個海，頭腦清晰咗轉快咗，易咗做決定，脾氣都少發。」

說到不怕被停泊在外的遊艇偷窺嗎？Sharon說一點也不擔心，「朝早太陽猛，外面睇唔到屋入面，至於夜晚我通常會落簾。」不過落地玻璃窗對Sharon來說既愛且懼，「我好鍾意間屋用落地玻璃窗夠光猛，不過，搬入嚟之後試過打十號風球，有艘遊艇被風吹到停咗喺露台外出石壆，支船桿搖吓搖吓，幾乎打到我睡房隻窗，我成晚唔敢瞓望到實，仲叫細佬報警，結果第二朝艘船先拖返船廠。」

閒時種瓜菜

屋內裝潢和家具摒棄高貴奢華，以簡約樸實為主，「因為公主feel唔啱我，我鍾意有屋企feel多啲。」入住這間屋後，她變了宅女，少了外出食飯和嘗試親手種植瓜菜，為屋內外綠化，「花園同茶室我都種滿番茄和觀賞辣椒，有時會種油麥菜，始終自己親手種，食落味道都會fresh啲。」

此外，屋內外還放置了許多盆植物和掛滿一幅幅畫，「入咗嚟住之後，好鍾意綠色嘅嘢，所以閒時都會去旺角花墟逛吓，睇有咩植物啱放屋企，至於掛畫可以令間屋充滿多啲生氣。」Sharon更說住落風水好，令她風生水起，事業更上一層樓的話會計劃將屋買下。

天台鋪上戶外木地板，但Sharon卻說甚少上來BBQ，反而在露台居多，「無謂將啲嘢食搬上搬落，客人又下下要經過主人房好麻煩。」

若露台大風，Sharon就會走到飯廳窗台上，睇書兼欣賞山景。

客廳旁是Sharon的工作間，旁邊擺放的按摩椅，是《獎門人》遊戲獎品，至於高身電腦枱，Sharon解釋：「有時食完飯就要落嚟睇文件check mail，咁樣可以唔畀自己坐咁多，幫助消化冇咁易肥。」

雲石設計的套房浴室，是Sharon最愛，「夠大夠光猛，整體感覺好舒服。」

廚房用不銹鋼油壓廚櫃和德國Miele爐具，「得閒會約三五知己嚟屋企整吓曲奇煮吓嘢食。」

飯廳位置放了一面大鏡，空間感大增，牆上玫瑰花畫，Sharon說：「師傅話要掛幅畫喺度，好似自己照緊鏡一樣，但又要無刺，結果畀我喺銅鑼灣啲Art Gallery買到。」

《深宮計》陸詩韻同羅霖撞下巴

無綫重頭劇《宮心計2深宮計》除咗勾心鬥角宮廷戲例牌橋段，識睇梗係睇一班外援劉心悠、周秀娜同一班回巢美魔女羅霖、張慧儀、張文慈齊齊化行個唐朝妝爭奇鬥妍。爭啲講漏十年未拍過劇的05年港姐亞軍、當年有富豪狙擊手之稱嘅陸詩韻，雖然戲份奇少、第三集已經被殺，不過已經足夠令其V煞啄木下巴在觀眾心目中留下深刻印象！

陸詩韻在 《宮心計2深宮計》 飾演宋王妃，第一集出場已經撩是鬥非更惹來殺身之禍，演技絕對唔夠V煞膠面搶鏡。無獨有偶，形同利器的下巴同承認曾微調的羅霖撞晒樣！

05年參選港姐、僅僅輸葉翠翠一個馬鼻攞咗亞軍、拍過劇接過電影、彈出彈入娛樂圈幫過父親經營家族生意、又自資出過內衣品牌代理過化妝品，不過問到十三年來陸詩韻娛樂代表作，肯定係不斷被傳搭上富商、油王、空心佬倌，目標明確一條心釣金龜，同埋執靚執上癮，眼耳口鼻同下巴相比起參選時代舊樣，一早已經面目全非！

翻睇十三年前陸詩韻參選港姐時泳衣照，面圓加丹鳳眼，仲有激凸身材，入圍已是大熱。化妝手法可以賴大會化妝，不過近年離奇消失的pizza面、圓下巴同肉頭鼻就難以解釋。

入行初期，化妝手法同影相擺po自然不如現在老練，所以不少相片都看到陸詩韻額高眼細又有個好肉地圓下巴。

拍劇初期角色一直都係純情知性少女甚為討好，陸詩韻當年打扮亦娘味十足。

近年轉戰商場，不過更多時候濃妝艷抹出席活動保持上報，刻意打扮後的陸詩韻每次出現都被指微調變樣，肉丸下巴不再，皮膚亦光滑得成膠狀。

尤其遇上自拍自家ps靚相，一心諗住擺上網圍爐取暖，不過ps過度，一秒變神州撞樣網紅。

當事人自稱化妝手法改進、護膚用品功效所以變靚啲，不過就無法解釋點解面形成半月彎刀狀、下巴尖到似強國蛇精男。

認微調否認動刀

09年淡出娛圈插手家族生意，上次拍劇已經係08年的《東山飄雨西關情》，十年來雖然不時出席活動保持做紙上明星，不過高清雙機拍攝、加上大電視大頭畫面始終唔同，出鏡三集就慘被殺死的陸詩韻明顯今非昔比，鼻樑高聳入雲、雙眼大過龍、緊緻膠面，特別要提係個下巴，尖削似利器得嚟，竟然與同劇羅霖撞埋款！

52歲羅霖就一早話過「整容好平常」坦承曾打美容針微調，不過37歲陸詩韻反而愈靚愈口硬：「好悶呀，已經講過好多次，我個樣唔同咗要多謝大家先，即係我個樣靚咗，同埋我做緊護膚品生意，當宣傳囉！我好耐之前打過botox，不過效果唔明顯，要做手術嗰啲我就覺得冇需要，每個女仔都想靚，但唔可以冇咗自己嘅框架囉！」果然達到執上癮最高境界！

年紀相差15載，羅霖與陸詩韻同是愛狗之人，也同愛V煞下巴！