專訪回顧：陳家樂拍拖三年 「想同余香凝有將來」
撰文：東方新地｜圖片：新傳媒圖片庫
獨家直擊：余香凝背陳家樂偷食 連日陪保險才俊過夜
含淚回應：余香凝偷食致分手？ 陳家樂含淚認情已逝…
陳家樂專訪中示愛：「希望一路行到組織家庭」
在早前的專訪中，講到同女友余香凝認識嘅經過，陳家樂就甜爆話：「我哋喺拍港台電視劇時認識，係佢第一套劇，嗰時我哋未一齊，係拍完之後聚會再見，發覺無論傾偈定對將來嘅睇法都幾一致，大家互生情愫。雙方公司都冇意見，我諗公司見到我哋有一種互相幫助嘅嘢喺度，我好開心可以同身邊一個咁親密嘅人成日討論電影、劇本，對大家幕前嘅工作都有幫助。」
當時陳家樂又透露，女友已經融入佢家中：「我幾鍾意佢對我屋企人啲態度，佢係我拍拖歷史入面，唯一會令到我屋企人好開心，佢去咗外地拍嘢，我啲屋企人係會掛住佢，問佢幾時返，甚至有時我激嬲佢，我啲屋企人係會鬧我，我覺得依家嘅相處幾好、幾開心。」
提到去年余香凝撞車，陳家樂話要照顧佢下半世，問佢係咪睇得呢段感情好長遠、有下一步計劃？陳家樂直言：「我係嘅，如果可以係好希望一路行到組織家庭，至於得唔得就睇個天，希望我嘅付出可以做到。嗰次撞車睇到佢係好強，我好緊張，反而係佢安慰我話佢冇事，叫我唔使擔心，我覺得佢好好。」
相隔十年重返TVB
對於TVB新劇《逆緣》，陳家樂表示：「今次係我入行十年後再返TVB，因為十年前我啱啱入行嘅時候，喺TVB拍咗部青春劇《四葉草3盛裝舞步愛作戰》，嗰時好好玩，成班十幾歲嘅小朋友拍完劇再出去食宵夜，瞓兩、三個鐘又再拍。到十年後再返去拍，我開頭以為好容易會處理到，點知原來係爭好遠。」
陳家樂續說：「因為以前拍青春劇全部外景、冇廠景，同埋一日得一組戲，但原來真正拍劇係需要外景接廠景再接外景，係好密，冇乜時間休息。開頭我係幾難適應，我係幾慢熱，睇劇本要喺屋企拎住杯咖啡慢慢睇，拍嘅時候三部機拍，行錯咗鏡頭會影唔到，又係要慢慢適應企位，好好彩我嘅對手全部都好有耐性、好幫我，畀咗好多信心我。」
孖John哥度gag
問陳家樂面對姜大衞、黎耀祥呢啲前輩係咪好有壓力？佢答：「係，因為我唔識祥哥，同埋佢平時係cool cool哋、唔係好講嘢，個樣好似好惡咁，我見到佢好緊張，但係真係拍嘅時候，佢畀最多意見我，佢同我分析每一集嘅劇本，同我講一開始唔需要呈現太多情緒，因為劇集係一集集播，最緊要頭嗰個禮拜令到觀眾認識、喜歡你，佢畀咗好多呢啲意見我。我同John哥(姜大衞)合作過，佢好慈祥，所以我對住佢唔緊張，佢鍾意同我度一啲輕鬆啲嘅gag，每集都有一、兩個笑位係嚟自John哥同我。」
陳家樂又劇透佢會同林夏薇有愛情線：「頭段講我尋親，我係一九四幾年嘅一個軍人，畀日本仔捉咗去做實驗冰封咗，冇人發現，一路到七十年後行雷閃電打醒咗我，因為臨打仗我生咗個BB，一出返嚟我去搵佢，尋親途中發現我個仔就係姜大衞，個孫係黎耀祥，因為我係好正直、好愛國嘅人，見到子子孫孫呃綜援、偷呃拐騙，希望同佢哋相認，教番佢哋點做人。仲有條愛情線，林夏薇嘅角色係中日混血兒，我打仗打日本仔，我係極度憎日本仔，慢慢講我點融入番社會，冇咁民族主義，亦冇咁在意以前打仗嘅嘢。」
