郭晉安離巢無綫北上發展：無錢咩都做唔到！
撰文：東方新地｜圖片：新傳媒圖片庫、郭晉安微博
郭晉安 信任王祖藍
郭晉安依家拍緊嘅《白色強人》係佢喺無綫嘅最後一套劇，問佢點解離開無綫？佢話：「有少少誤會嘅，其實我仍然係TVB嘅，不過可能同過去有啲唔同，就係會好自由，轉咗去(王)祖藍嗰邊，傾出面嘅嘢個彈性可能會再大啲。」咁多經理人公司，點解選擇簽祖藍？郭晉安直言：「我信佢囉，其實簽過咁多個經理人，都係講信任嘅啫！唔知點解，我真係信佢，佢令我好放心，佢令到我好信任佢，即使自己行嘅每一步有啲咩問題都好，我信佢對我好坦白，會話我聽我面對嘅問題喺邊，跟住要點行，我要裝備啲乜嘢，未來會發生啲乜嘢事呢、要點去行，真係好靠個經理人好坦白。」
去年喺國內有個好大型嘅慈善夜，八十個藝人之中，只有王祖藍係香港藝人。王祖藍喺國內真係好吃得開，問郭晉安同王祖藍合作，係咪想打開北上嘅市場？郭晉安指：「咁本身run咗咁多年，我有一個底喺度嘅，只不過係我點樣可以再引發大家嘅一啲共鳴，我覺得係等同03年我拍阿旺 (《戇夫成龍》) 嗰陣，其實已經儲落咗一堆觀眾，我要有一啲talking point或者一個劇集引起大家去鍾意、欣賞我，依家我返內地，可能都係行緊一條咁嘅路，我首先要搵一啲嘅演出，引到一啲回響。」
佢自認接受到新嘗試、新挑戰或者新嘅組合，又指自己雖然係天秤座，但唔會計晒條數先決定離開：「喺某年某月某日我已經唔同咗嘞，以前都有人同我講你計得太多、諗得太多嘞，反而會阻礙咗你，唔好諗咁多、路係人行嘅，某年某日突然間，啲嘢我拍吓心口就要做㗎嘞，可能九幾年嗰陣，我有兩、三年離開咗TVB，就係嗰次令我叮一聲諗咗好多嘢。我可以唔諗、孭住個背囊就上北京拍戲。」
有樓代表身價
講到由《創世紀》到國內資金投資嘅《再創世紀》，隔咗咁多年，問佢覺得科技上、拍攝手法上，故事、文化上有冇唔同？郭晉安就話：「好唔同！《創世紀》當年係回歸之後，講緊98、99年，嗰時面對完金融海嘯，所有樓市都跌，好似成個氣氛都無乜生機咁，突然有套《創世紀》講樓市前景、將來香港點發展到成為一個叫無煙城嘅城市，一個好大嘅理念，又好似真係實驗咗㗎喎！依家你住喺香港係好穩陣，有棟樓原來先代表咗你個人嘅身價、地位，呢個城市真係幾特別嘅。我覺得由《創》到依家，好似真係喺一個創作人個願景、景象，一步一步咁實現。咁啱08年有個金融風暴，喺嗰個環境衍生咗《再創世紀》個故事出嚟。講金融、講股票上嘅財技。會唔會又成為編劇筆下將來嘅遠景，大家面對金融嘅問題，會唔會又掀起一番嘅熱潮呢？」
問郭晉安覺得合拍劇、國內資金，係錢多好辦事，可以外地取景、更加多資源，定係要迎合國內同胞口味，冇咁本土情懷？佢話：「我覺得係走向世界嘅，亦都未必係迎合邊一類型嘅觀眾，劇集已經係好容易睇到，拎住個電話，全球嘅劇集，你都可以睇到，當你面向世界嘅時候，唔能夠故步自封㗎嘞，所有嘅製作，同我入行到依家比較 都已經係好大嘅突破。當然有一個資金嘅back up係最緊要㗎啦！無錢真係咩都做唔到，太多錢亦都未必識用，因為你慳慣吖嘛，突然間畀一大嚿錢你，你都要識用，用喺邊度呀？我可以講《再創世紀》裡面，有好多錢真係用咗喺啲好真實嘅場景裡面，例如我同楊怡有一場婚禮，我哋都結過婚，面對嗰場婚禮，我哋覺得有真實嘅感覺，拍得住我哋結婚嘅時候嗰種氣氛。連枱面上面啲小禮物都有晒，好認真！所有嘅酒都係真正紅酒，唔係飲提子汁，連backdrop啲相全部都精心設計，我覺得好真實，係需要嘅，作為一個演員，如果幕後能夠做到咁樣，我哋都好互相尊重，各自去攞最好嘅嘢出嚟。」
認同植入廣告
問到對演技上嘅要求會唔會更加高？郭晉安笑言：「會，更加要準確，因為大家都知道講緊係4K嘅製作，啲嘢好精細，連一個眼神或者動靜都好清楚，將個畫面壓縮，畀觀眾睇到你好似真係走咗出嚟咁，唔好講個妝、黑眼圈睇到，唔好講呢啲先，我覺得直頭睇到一個演員嘅演技。我覺得自從有咗4K之後，我反而斟酌咗喺呢方面，裡面一定要好豐富，裝好多嘢喺裡面。對我我覺得係著數啲，因為自己個年齡都有番咁上下、個演齡都有番咁上下。」
今時今日，收視對佢嚟講有冇壓力？郭晉安表示：「我自己都做緊生意，有陣時我都會諗，TVB嘅運作，咁大支出，都要睇住盤數㗎喎！咁盤數係嚟自咩嘢呢？真係收視，呢個係好現實嘅問題，但其實亦都可以有好多途徑搵錢，如果我哋睇番全球嘅劇集，佢哋搵錢可能係嚟自點擊，好似網上面主導咗投放幾多錢落一個劇，但係佢哋需要咩呢？係廣告！如果調番轉商品能夠喺劇集裡面出現嘅話，呢嚿就係錢嘞！如果劇裡面郭晉安一路食緊一啲健康食品，個影響力係強大過喺每個break入面嘅廣告，調番轉睇，收視係咪咁緊要呢？可能去到依家，嗰個影響力先最緊要。個劇嘅話題帶出嚟嘅影響力，然後再引致到裡面嘅商品，令到大家去談論嘅時候，都係一個好大嘅利潤。譬如睇之前有啲好受歡迎嘅韓劇，個女主角用嘅一支唇膏已經賣到斷晒市，個利益真係好大！」
講到香港政府都話講緊點放寬條例，今屆奧斯卡都繼續有植入賣薯片嘅環節，郭晉安認同：「幾好吖，生活嚟㗎嘛，對我嚟講，起初做戲嘅時候，無端端有啲廣告我唔習慣，譬如我哋之前拍劇集，無端端暈一暈要捽一捽藥油，無端端又去廁所洗個頭先，開頭唔習慣，但有時又覺得呢個都係一個代表嚟，如果我能夠影響到嗰個產品，真係引發一個好大嘅回響，呢個都係我嘅能力同價值。」
