封視后惹負評 唐詩詠：好難令每個人都鍾意
撰文：東方新地
唐詩詠 封視后惹負評
成為視后的唐詩詠，得獎感受原來未見十分興奮，全因病魔作怪：「其實頒獎禮嗰日已經唔舒服，攞完獎基本上嗰幾日我都係處於一個昏迷嘅狀態，因為食藥、好攰，隻藥又令到我好眼瞓、好暈。我好多謝身邊嘅朋友，尤其係屋企人,佢哋好開心，好似完成咗佢哋一個心願，佢哋睇咗我咁多年，我拍咗咁多年好似依家個女畢業嘞，有一個咁樣嘅感覺囉！(你點慶祝？) 嗰晚好攰，但阿田(田蕊妮)同(黃)翠如佢哋好好，出咗尖沙嘴買咗個我好鍾意食嘅河粉畀我，去咗我屋企食，已經好足夠。其實有好多朋友約我嘅，但係我一路都病緊，所以可能 等之後先再約食飯。」
好多網友指佢在頒獎禮蔡思貝得獎一刻「黑面」，但其實詩詠指咁啱在頒獎禮上都同樣遇上女士唔方便嘅日子。又係喎！幾個頒奬禮都係相隔一個月！
《不懂撒嬌的女人》在播放期間引來很大迴響，當中擔任女主角的宣萱及唐詩詠就雙雙入圍最佳女主角，不過外界質疑唐詩詠得視后，全因勁敵宣萱缺席頒獎禮， 詩穎話：「冇得點睇，我都係去到嗰刻先知道佢冇嚟到。」有報道指詩詠續約換獎,亦有好多網民評論《不懂撒嬌的女人 》她不算是女主角，對此她又點睇呢？ 唐：「頒獎禮前都有人問過我，嗰時我都講咗我份約仲有好耐，耐到都唔需要做呢一樣嘢。我當然好明白，每個人心目中都會有一個最佳嘅人選，你問我，我能夠同到佢哋咁多位一齊(競逐)，我都已經好開心，因為好多都已經係視后、影后，好多好叻嘅人喺度，對我嚟講，我已經好開心，佢哋永 遠喺我心目中都係最佳女主角。我嘅睇法係，我好多謝一啲支持我嘅人，我亦都會好尊重一啲唔支持我嘅人，我唯一可以做嘅就係繼續做好我自己。」
對於宣萱話：「只要大部分人都支持，已經好開心，唔一定要攞住個獎先叫最開心。」詩詠又是不是抱這種心態呢？她說：「其實作為一個演員從來都會係咁嘅心態，因為對於我嚟 講，最開心嘅過程就係拍攝時嘅過程，我拍《不懂撒嬌》嘅時候，我已經經歷咗嗰五個月好開心嘅時間，去到最後，所有獎項對我嚟講都係bonus，係公司畀我嘅一個鼓勵，鼓勵我繼續行落去，我堅持咗嘅嘢，公司睇到,多謝公司，嚟緊就繼續堅持落去。」
慳家之達人
談到會不會買啲嘢獎勵吓自己？ 詩詠擰擰頭表示：「冇呀，我希望今年可以身體健康,嗰一刻好感受到呢樣嘢。 (得獎酬勞有冇加價?)冇呀，我冇諗過呢個問題，我會交畀公司，都好似冇人同我講會加人工，冇所謂啦！最緊要就係繼續有嘢做、有戲拍。如果之後可以加就加，冇得加都冇所謂。」節儉是一種美德，好多紅星名人賺賺埋埋咁多，花多啲錢享受生活，其實也好係好合理。但向來慳家的詩詠就唔同，她的座駕Volkswagen白色甲蟲車已經揸咗五年以上，就算年前意外撞車，佢都四出揾車房格價先落實維修，可謂慳得幾多得幾多。同圈中一車接一車的藝人相比，詩詠可算是一道清泉！
多謝田蕊妮
當年經歷分手，又同馬明傳緋聞，有冇唔開心？看得開的唐詩詠對此不以為然:「今年發生咁多事，過程總會唔開心，但人生就係有呢啲風風雨雨，係必須經歷嘅，我好感恩身邊朋友畀咗好多鼓勵再加智慧畀我，佢哋會教我點去面對呢啲風雨，其中一個就係阿田(田蕊妮)，佢畀咗好多智慧我去處理呢啲事，亦都好感恩我懂得去面對，喺呢行都做咗十幾年，一定要識得去面對好多唔同嘅嘢，最後我覺得最重要係點樣做好自己，好難去令到每個人都鍾意自己，我覺得亦都唔需要，最重要我做嘅每一個工作，我都有盡 力過，我覺得已經足夠！」
洪永城 撐前度做視后
雖然唐詩詠同洪永城已經分手，不過二人再見亦是朋友，繼兩人被拍到秘密約會後，洪永城在網上公開自己投詩詠做視后，並留言大讚詩詠人緣好、每次演出都非常投入認真：「你係我心目中嘅最佳女主角」
情路崎嶇不平
講到詩詠的戀情，又點可以唔提崔建邦 (Amigo)！詩詠同Amigo在2005年一同主持《K-100》時撻着，可惜男方不時背着女友夜蒲偷食， 以致兩人多次離離合合，分手復合又分手，拖拖拉拉近十年。其實Amigo偷食都唔係咩新鮮事，佢曾經多次食女被斷正，不過詩詠一樣係默默承受。
直至2009年，o靚模鄺敏慧(中巴)報警聲稱被Amigo虐打，惹來全城關注，男方形象跌至谷底。不過最終獲法庭撤銷控罪，只是守行為一年，不留案底。 Amigo負面新聞纏身，詩詠依然多次公開表示信任男友，再寫埋紙力撐！需知女孩子的青春係幾有限，但詩詠都不離不棄，對男方專一的程度已經近乎係麻木， 實在係聞者傷心……
下頁開始將詩詠優點逐個數，話俾大家知拋棄佢的男人都係走寶！
體貼之達人
詩詠曾被拍到同馬國明、林子善等人一齊食飯，期間詩詠更加剝埋蝦俾馬明，詩詠剝幾多馬明就食幾多，之後仲遞上紙巾，真係好窩心！但原來剝蝦都未夠，詩詠為人為到底，飯後仲載埋馬明返去太古城的住所。難怪事後馬明都大讚︰「佢不嬲都賢淑！」
大家都知道現今「港女」盛行，好似詩詠呢啲咁識照顧人的女友真係好難得，對身邊人一視同仁，又樂於照顧朋友，絕對唔會有異性無人性！詩詠為人咁好， 所以佢在圈中人緣甚佳，唔少同佢合作過的藝人都會成為其好友，好友包括鄭嘉穎、黎耀祥、胡定欣、鍾嘉欣、田蕊妮……下刪N個人。
