【深宮計】曾經囂張乞人憎 蕭正楠：嗰時態度真係衰
這一「𠽌」，蕭正楠連自己的事業及運氣一次過「𠽌」走埋，敗走內地。錢搵唔到，知名度零，幸好在未衰到貼地之前有TV Buddy伸出援手。由籌款節目陪總理跳舞的蛋散，今時今日成為曾勵珍愛將，蕭正楠終於等到機會上位！
撰文：東方新地｜圖片：新傳媒圖片庫、蕭正楠IG
蕭正楠 態度囂張乞人憎
「以為自己好紅」的藝人多數的下場是銷聲匿跡於娛樂圈，蕭正楠當年正犯下這過錯，簽約成為李澤楷唱片公司旗下歌手，挾「電盈之子」之名加入樂壇，口不擇言令他一無所有。
「咁大間公司back up、加埋個老闆係邊個先得㗎，梗係飄飄然啦。出道頭兩年啲job真係多到唔停，做完一單趕住去第二單，太易得到嘅嘢唔會珍惜。」態度囂張、說話不留餘地，是做歌手時蕭正楠的特徵。「嗰時態度真係衰，啲歌上唔到榜少咗job就會用好倔嘅語氣怪責啲同事，可能老闆李進對我咁強硬，我又學埋佢啲嘢照樣咁鬧啲同事。咁咪戇居囉，佢係老闆我唔係，搞到自己乞人憎。」
蕭正楠自爆曾經找過一班舊同事，希望向他們說一句對不起，但最後不成事，「我真心想同以往曾經畀我得罪過嘅舊同事同埋記者講聲，我欠佢哋一句對唔住，今時今日我連個『囂』字點寫已經唔記得啦。」蕭正楠當年除了錯在態度差之外，最主要錯在太天真，他應該不明白大家只是畀面李澤楷而不是他！
欣賞Juno作品
與蕭正楠同樣於02年入行的樂壇新人，數數手指男的只剩下他當日的死敵麥浚龍（Juno）及余文樂、女的則有鄭希怡。研究當時與Juno交惡的原因，蕭正楠歸咎於一切都是新人博見報宣傳手法。「事實上我同Juno冇試過兜口兜面指摘過對方，你寸我兩句我咪窒番你三句囉，有好多說話經過第三者把口就會唔同晒。睇番轉頭呢件事真係小學生鬧劇，佢啲歌我有畀錢download㗎，咁多歌手之中佢做唱片真係好有誠意，早幾年佢套《殭屍》收得又好口碑，見到佢有咁好成績好戥佢開心。」
致命一擊
做錯事的人與飲醉酒的人抱着相同心態，做錯事的人不會覺得自己做錯，正如飲醉酒的人永遠話自己冇醉。「當年真係唔覺得自己有錯，到後期發覺記者朋友唔係咁鍾意我，出親活動冇人同我做訪問，心諗搞乜呀，點解會咁樣嘅！」令蕭正楠真真正正certified dead是一句「邪不能勝正」，其威力相等如蔡楓華的「一剎那光輝並不代表永恒」，說話的背後動機及過程，當事人早已解釋過。
要為他此舉作出總結，只想到三個字：「衰戇居」。「好多人問我後唔後悔講過呢句嘢，我唔識答，因為說話出咗口冇得收番、邊有得畀我後悔。換個角度慶幸係我十幾年前瀨嘢，如果依家先講死得仲慘。其實有人想幫你，呢句可能係金句，如果人哋要整死你，呢句嘢就會令你永不翻身。」好明顯當年報道的人屬於後者，禍從口出付出極大的代價，慎言成為他日後的座右銘。
衰多口得到的下場是返內地拍劇，人唔紅知名度唔高，三年只有四套劇兩齣戲，唔餓死經已要感恩。「04年嘅人民幣好低，一劇套唔過50萬，一套戲唔過10萬，公司抽埋佣，3年搵得好少錢，真係要慳住使。如果嗰3年我仲喺香港樂壇作垂死掙扎，應該衰到要食穀種。」
唔恨出碟
有幸得到機會加入無綫，蕭正楠𦧲飯應，聽教聽話肯做肯搏令他一劇接一劇，有傳是曾勵珍頭馬的他由《仁心解碼II》的「Jap榮」到《巨輪》的心「羅威信」，終於升上男一，近日更在《宮心計2深宮計》飾演「何離」，同馬浚偉、馬國明並列三大男主角，「真係要多謝珍姐畀好多機會我，有份拍重頭劇已經心滿意足，劇集出街之後觀眾會叫我劇中角色名，呢種認同最重要，獎項我唔敢諗太多。以前出碟唱歌冇人記得我啲歌名，依家真真正正感受到電視威力有幾大，起碼我做嘅角色有人知、套劇有人追。」以上對話粗略計算兩分鐘內出現了五次「多謝珍姐」。
至於會否心癢癢想再出唱片？蕭正楠斬釘截鐵表示：「唔使客氣啦，我戥依家啲歌手慘，本身搵嘅錢已經唔多，接一個job七除八扣分分鐘貼錢打工。我已經清醒晒㗎啦，做歌手時係好多人擁喺你身邊好似好威水咁，做電視乜都自己一腳踢，硬橋硬馬先學到嘢，虛榮感我唔再需要。」
余文樂及Juno與蕭正楠同屬02年樂壇新人，當年Juno與蕭正楠不和經常隔空互窒，充滿火藥味。
十多年前蕭正楠所拍的首個廣告劣評如潮，被踩騎呢又猥瑣令到很多廣告商拒絕起用他。近年終獲得第二次機會拍廣告，造型及對白都正常得多，但一味hard sell。
在娛樂圈兜兜轉轉，蕭正楠最終在電視圈找到自己的定位，2013年先憑《巨輪》一劇躍升成爲男主角，之後一連多套劇集《師奶Madam》、《巨輪II》、《超時空男臣》、《翻生武林》等都擔正做主角。
早幾年一齣《仁人解碼II》，蕭正楠飾演哨牙戆男醫生「Jap榮」角色相當搶鏡，令他人氣急升，之後受到不少監製賞識。
曾與何傲芝做「好朋友」
事業重返軌道，愛情同時來了，早幾年常被影到與何傲芝出雙入對，蕭正楠打死都唔認。「咁你打死我先啦！大家係好好嘅朋友，感情事我唔鍾意同其他人share，拍拖過程更加唔使公開，結婚時咪同大家講囉。依家剛剛叫有多啲機會，呢幾年唔會諗結婚，如果個女人認爲我值得佢等多幾年，自自然然就會等。」
但到2014年初，本刊踢爆蕭正楠拍《師奶Madam 》時撻著黃翠如，為此不惜狠飛拍拖三年女友何傲芝。兩人至今戀情仍甜蜜蜜，似乎翠如正是蕭正楠口中「認為佢值得等多幾年」的女人。
《深宮計》升呢做王子
蕭正楠(Edwin)近日在無綫重頭劇《宮心計2深宮計》飾演「何離」，原本隸屬龍武軍，同將軍馬國明、太子馬浚偉都係兄弟，後來得知自己的王子身份，被捲入皇位之爭！
謝雪心飾演的尚宮「瓊香」因發現蕭正楠胎記，懷疑其身份，四出調查後，終證實他是李旦(李龍基飾)與肅明皇后之嫡幼子，即李隆基(馬浚偉飾)同父異母的弟弟。
蕭正楠仲笑稱自己嘅角色「何離」花名係「河狸」，英文名係「Holy」！
Holy 好 happy !! 謝謝你支持 !! 讀一次..這是押韻的 !! #宮心計2深宮計 #河狸 #何離
Edwin Siu（@edwinsiu）分享的貼文 於張貼
此河狸貌似認真，其實也幾好笑，日飲一碗蜜可抗毒😂😂😂😂 #宮心計2深宮計 #河狸 #Holy
Edwin Siu（@edwinsiu）分享的貼文 於張貼
《美女廚房》替馬國明擔心
除咗《深宮計》外，蕭正楠近日仲擔任無綫節目《美女廚房》嘅主持，對於劇集拍檔黃心穎被網民封做「地獄廚神」，蕭正楠笑指替馬國明擔心：「建議心穎唔好煮嘢畀馬國明食！」
要為翠如平反
而早前出席活動，蕭正楠仲話想請女友黃翠如上節目晒廚藝：「希望佢會嚟，雖然我成日踩佢，其實佢真係唔係咁差嘅，我要幫佢平反！」
黯然煎蛋飯
事實上，翠如曾經喺活動上表演過佢嘅「拿手菜」煎蛋！
Back to Work😎✌🏻 With @bigbigchannel_official in Malaysia🐒 #BigBigChannel #表演煎蛋 #誰害的
Wongtsuiyu（@wongtsuiyu）分享的貼文 於張貼
但最愛食太陽蛋嘅蕭正楠，早前po咗張爆咗黃嘅煎蛋飯相，仲話：「革命尚未成功同志仍需努力！」唔通呢個係翠如BB嘅傑作？
日頭猛做，到而家輕鬆下，食個晚飯，要… Excuse me what is this 😦？ #一日一蛋 #最愛太陽蛋的是我 #你怎麼捨得佢爆黃 #革命尚未成功同志仍需努力 #鹹魚白菜也好好味
Edwin Siu（@edwinsiu）分享的貼文 於張貼
唔知翠如BB如果上到節目，蕭正楠會畀幾多分呢？
今晚都ok吖…多謝捧場😂😂😂 #美女廚房 #0分是一種鼓勵 #有笑有淚
Edwin Siu（@edwinsiu）分享的貼文 於張貼
>
