唔著緊爭視后 胡定欣：我都攞過啦！
撰文：東方新地｜圖片：新傳媒圖片庫、胡定欣IG
胡定欣 得到比想像多
首先提到同馬浚偉演出的舞台劇《偶然·徐志摩》，胡定欣感歎：「真係一個好大嘅經歷，第一次做舞台劇，感受同拍劇好唔同，拍劇已經拍咗十幾年，拍劇方面，唔會有嘢令到我精神壓力咁大，今次舞台劇演出精神壓力真係好大，發夢會夢到自己唸台詞、做戲，就算做完舞台劇後幾個星期，我耳邊仲聽到對手講對白，瞓覺都仍然喺個夢度做緊戲。」有好多演員指舞台劇係演技終極，幾乎行步路都要識做戲，係咪真係好大挑戰？「我覺得唔同係個演繹手法同個空間，電影、電視劇同舞台劇，係三個唔同空間嘅演出，可能我將電視劇學習到嘅嘢，我帶去嘗試電影、舞台劇，將我根基知道嘅嘢，喺唔同空間再去改變、磨合。」
問佢有無睇向海嵐點做？胡定欣答：「無，我諗每個人對同一個角色嘅睇法都唔同，反而我覺得唔好受到大家嘅影響，完成香港演出，接住係Anne (向海嵐) 喺新加坡演出，反而Anne有嚟睇我綵排。」反應係咪達到預期？仲會唔會再做？「得著比我想像中大，我當初接，係想畀自己一個挑戰，成日睇好多舞台劇、同事去做舞台劇，唔同界別、歌手 去做舞台劇，我成日都諗好似要記好多嘢、畀我一定NG，或者我做唔做到呢？會好好奇，好想嘗試，但係又好戰戰兢兢。做《深宮計》嘅時候，遇上馬仔 (馬浚偉)，大家去傾呢樣嘢，促成咗呢次舞台劇嘅演出，知道咗係咩一回事，我得到嘅已經比我想像中多，同埋心入面嘅一啲疑問已經解決晒。好似之前我諗點會記到咁多對白，原來當一個戲排足兩個月嘅時候，你唔可能畀自己唔記得。但個難度係，當你好熟悉、重複又重複去演，你點可以忘記前一日嘅演出，再繼續有唔同嘅感覺，呢個至係最高嘅難度。」
拍《深宮計》太忘我
講到《深宮計》播出後，網民話胡定欣頻現高低眉，又話佢額上的花鈿似電話品牌logo⋯⋯問佢開頭有無戰戰兢兢，定係由頭到尾都咁有信心？佢表示：「網民講嘅時候，套劇都拍完，唔係我控制範圍以內，同埋覺得都幾有趣，我會覺得花鈿真係萬能key，擺咩喺嗰個位都係得，我覺得係網民好玩嘅地方，至於高低眉，其實唔係今日先知道，我做戲咁多年，有時有啲表情好肉緊、太忘我，我就會有呢個問題，化妝師就會好緊張，但其實唔關佢事。」
對於《深宮計》取得好成績，胡定欣笑說：「我覺得 (梅) 小青姐嘅作品，都會有信心嘅，但係當知道內地嘅點擊率，一日升一億，係好鼓舞嘅成績嚟，香港播碰上世界盃都有咁好嘅成績，我覺得真係好開心，呢套都係我今年唯一出街嘅劇集，每一年都有一部成績好好嘅作品，我真係好開心。」
望好姊妹攞視后
問胡定欣對視后有無信心？佢直言：「無嘞，我唔可以講我對自己無信心，今年我身邊都有兩個好朋友、好姊妹，我都好想佢哋得到好嘅成績，就係黃智雯同煒哥 (陳煒)，所以我反而無諗自己。我之前都曾經試過啦，佢哋能夠遇到一個咁好發揮嘅角色，我覺得佢哋都值得得到一啲成績。」
視后之後，有無樽頸位？有無諗過之後嘅路點行點走？胡定欣答：「我唔會形容係樽頸位，不如話我仲可以做啲咩呢?其實都仲有好多嘢未試過嘅，又或者有啲咩好適合我去做，可以再做多啲呢？其實同好多演員都未合作過，都想合作，電視劇方面，或者可以再做啲咩角色，係我呢十幾年嚟都未試過呢？」
而講到今年胡定欣夥拍吳鎮宇拍電影《逆流大叔》，鎮宇話搵胡定欣做女主角，首要係因為胡定欣唔驚佢，仲重提2002年拍《衝上雲霄》，新人中唯獨胡定欣唔驚佢，胡定欣就指：「當年開頭其實驚嘅，第一日開工驚嘅，之後就無。嗰時我哋成班都好細個，佢就好似一個哥哥咁。今次電影嘅合作，亦都因為我同佢嘅熟悉，有一份安全感。等我可以好好地做番我本份，唔使因為鎮宇哥喎，就好緊張。」
問胡定欣拍電影係咪好唔同？佢話：「好唔同，合作嘅同事唔一樣，依家電影出咗街、反應好好，好開心我第一套嘅電影有咁好嘅feedback，我有份參與一套充滿香港味、人情味、咁勵志、正面嘅一套電影。我希望呢一套係好嘅開始，之後繼續有機會嘗試拍電影。」
北上發展係辛苦錢
《包青天》喺內地拍，係咪又好唔同？胡定欣表示：「我諗同《深宮計》一樣，只不過係公司畀咗好好嘅budget可以去一啲好靚嘅地方取景，我會覺得係辛苦嘅，因為《包青天》去新疆，每一日來回坐七個鐘車，好辛苦，我坐到直情驚咗坐車，依家諗起坐車，我係要擺好成個陣先至去坐，我條腰已經坐到好痛，我要將頸枕變做坐墊我先坐到，可能新疆啲沙石路係多啲，我試過如果嗰程車無人，我會攤直個人⋯⋯」個景係咪咁值得先？「靚、真係值得！我哋去大峽谷、雪山、草原，第時播嘅時候大家就會睇到。」
連續兩套劇都北上，有無諗過長駐國內發展？胡定欣就話：「我真係無咁諗過，我相信唔容易，你見到咁多行家，可能將個基地移師喺國內，我相信收入係好可觀，但生活上模式嘅改變、付出，唔係咁容易，寄人籬下、離開自己屋企，離開香港去搵錢，我相信可能製作上或者價值上，或者係好好嘅機會，要好值得先至會去做。我覺得尤其是女仔，喺我心目中男仔會OK啲、適應啲，所以呢啲錢真係唔係咁易搵，我覺得係辛苦錢嚟。」
首度演舞台劇，胡定欣直言現場演出難免出錯，「當然有，但都係一啲細小嘅錯誤。」
入行17年，2015年及16年憑《鬼同你OT》及《城寨英雄》連奪兩屆視后，奠定當家花旦之位。胡定欣坦言想將機會留給其他同事。
對北上發展胡定欣另有一套看法，「唔好睇人哋好似搵好多錢，好羨慕或者點，係辛苦錢，唔容易。」
對《深宮計》中，被指頻現高低眉及額上花鈿萬能key一笑置之。「首先第一個應該擺自己公司嘅logo或者印個TVBuddy，哈哈哈哈哈！」
